"ស្នូរជើងអ្នកណា" ជ្រើសរើសតួសមតាមសាច់រឿង មិនបានជ្រើសតាមទីផ្សារភាពយន្តទេ

2017-03-13 03:29:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្សិលមិញនេះផលិតកម្ម Wonder Film បានធ្វើពិធីក្រុងពាលីរឿង "ស្នូរជើងអ្នកណា" នៅព្រែកហូរ ក្រុងតាខ្មៅ ខេត្តកណ្ដាល និងជាស្នាដៃថ្មីទី៣របស់ខ្លួន។ ក្នុងនោះដែរលោក សែម វិសាល ចាងហ្វាងផលិតកម្ម និងជាអ្នកនិពន្ធបានលើកឡើងថា រឿងនេះលោកបានជ្រើសរើសតួឲ្យស័ក្តសមជាមួយសាច់រឿង មិនបានជ្រើសរើសតួតាមទីផ្សារភាពយន្តទេ។

លោក ថា៖ "យើងមើលលំនាំដូចជាខ្សែភាពយន្តខ្លះបានឈានមុខគេមិនបាច់ត្រូវការតួល្បីសូម្បីតែម្នាក់ទេ ដូច្នេះហើយការកំណត់របស់ខ្ញុំតាំងពីដើមរហូតមកដល់ឥឡូវ ខ្ញុំមិនដែលព្រួយបារម្ភអំពីរឿងតួទេខ្ញុំព្រួយបារម្ភទៅលើតែគុណភាពតែប៉ុណ្ណោះ រឿងដែលល្អមើលគឺអាស្រ័យទៅលើការយើងជ្រើសរើសតួឲ្យសមហ្នឹងសាច់រឿង។បាទខ្ញុំសូមបញ្ជាក់គ្រប់រឿងទាំងអស់របស់ផលិតកម្ម Wonder Film មិនចម្លងគឺសរសេរថ្មីទាំងអស់ ទាំងឈុតឆាក ការតាក់តែងនិពន្ធសាច់រឿងឆ្អឹងរឿងទូទៅគឺថ្មីសុទ្ធសាតមួយរយភាគរយបាទ"។

រឿងនេះយើងនឹងចេញថតនៅថ្ងៃទី ១៧ ខែមិនា ឆ្នាំ ២០១៧ នេះបាទ"។

លោកបន្ថែមថា រឿង "ស្នូរជើងអ្នកណា" ជាប្រភេទខ្សែភាពយន្តខ្នាតធំខ្មោចបែបភ័យរន្ធត់ និងមានចំណុចអប់រំជាច្រើននៅក្នុងរឿងទាំងមូល។ ចំពោះរឿងមួយនេះដែរក្រុមការងាររបស់លោកត្រៀមចំណាយពេលថតរយៈពេល៣ ខែចំណែកទីតាំងជ្រើសរើសយកក្រុងតាខ្មៅដើម្បីថតនៅថ្ងៃទី ១៧ ខែមិនា ឆ្នាំ ២០១៧ ខាងមុខនេះហើយ។

រឿង "ស្នូរជើងអ្នកណា" ជាខ្សែភាពយន្តទី៣បន្ទាប់ពីរឿង "ប្រាសាទកំបាំងមុខ" និងរឿង "ផ្ទះចិញ្ចឹមខ្មោច" ។ ខ្សែភាពយន្តមួយនេះចូលរួមសម្ដែងដោយ លោក សេម លីងលីង នីតា លោក ហេង លោក ណារ៉ា និងតារាកិត្តិយសស្រីប្រុសជាច្រើនរូបទៀត៕