ព័ត៌មានលម្អិតជុំវិញហេតុការណ៍ឆេះផ្ទះ ខាត់ វៃហាំង ម្សិលមិញ

2017-03-13 03:09:01
ចំនួនមតិ 0 | ចំនួនចែករំលែក 0

ចន្លោះមិនឃើញ

រសៀលម៉ោង ៣ កាលពីម្សិលមិញផ្ទះនៅឯស្រុកកំណើតរបស់តារាសម្ដែង ខាត់ វ៉ៃហាំង នៅភូមិ/ឃុំ ឬស្សីក្រោកស្រុកមង្គលបុរី ខេត្តបន្ទាយមានជ័យ ត្រូវបានអគ្គីភ័យលេបត្របាក់ខ្ទេចខ្ទីក្នុងរយៈពេលមួយប៉ប្រិចភ្នែកដោយសារការទុស្សេខ្សែភ្លើង។

ពាក់ព័ន្ធនឹងការឆេះផ្ទះនេះ ខាត់វ៉ៃហាំង ប្រាប់ថាមិនមាននរណាម្នាក់រងរបួសនៅក្នុងហេតុការណ៍នេះឡើយ ប៉ុន្តែទ្រព្យសម្បត្តិ ទាំងប៉ុន្មានដែលនៅក្នុងផ្ទះនេះឆេះទៅតាមភ្លើងខ្ទេចខ្ទីអស់ហើយ។ ផ្ទះដែលត្រូវបានអគ្គីលេបត្របាក់នេះស្ថិតនៅស្រុកមង្គលបុរី ដែលជាផ្ទះកេរ្តិ៍សល់ពីដូនតាមក ហើយផ្ទះនេះទៀតសោត រស់នៅជុំគ្នាច្រើនគ្រួសារ។

ម្សិលមិញក្រោយពីបានដឹងហេតុការណ៍ឆេះភ្លាម តារាប្រុសរូបនេះបានឡើងទៅមង្គលបុរីទាំងយប់ ក្នុងនោះលោកអះអាងថានេះជាហេតុការណ៍មួយដែលតក់ស្លុតនិងមិនអាចបំភ្លេចបាន សម្រាប់ក្រុមគ្រួសារលោកទាំងមូល។

"ផ្ទះនេះមិនមែនជាផ្ទះរបស់ខ្ញុំទេ តែជាផ្ទះរបស់ក្រុមគ្រួសារខ្ញុំ ដែលកុងម៉ាបានបន្សល់ទុកឲ្យ ម្យ៉ាងក៏ជាផ្ទះដែលខ្ញុំបានកើតនៅទីនោះដែរ ត្បិតថាសព្វថ្ងៃ ប៉ាម៉ាក់ខ្ញុំ បានទិញផ្ទះមួយនៅផ្សារសិរីសោភ័ណក៏ពិតមែន។ ផ្ទះនោះខ្ញុំនិងបងប្អូនផ្សេងទៀតតែងចេញចូលទៅវិញទៅមកប្រៀបដូចជាផ្ទះរៀងខ្លួន ពេលបុណ្យទានយើងទៅជុំគ្នានៅទី នោះ"។ តួប្រុសក្នុងរឿង "ទីងមោង" ថ្លែង។

ប្រភេទនៃផ្ទះដែលបានឆាបឆេះនេះ ឈើលើថ្មក្រោម មានទំហំ ទទឹង ១០ ម៉ែត្រ បណ្តោយ ៣០ម៉ែត្រ។ កំឡុងពេលឆេះ ខាត់ វ៉ៃហាំង ប្រាប់ថាក្រុមគ្រួសារបានហៅឡានទឹកមកដែរ ប៉ុន្តែមិនអាចជួយពន្លត់ផ្ទះដែលឆេះនោះបានទាន់ពេលឡើយត្បិតអីមុនពេកមកដល់ភ្លើងឆេះសឹងតែ៨០ភាគរយទៅហើយ។

អត្ថបទ៖ ថា ម៉ាលីដា