ញ៉ូវ ម៉ាក មិនអស់ចិត្ត នឹងដាក់ ផល សោភ័ណ្ឌ សងសឹកវិញពេលជាពីរបួស

2017-03-13 09:54:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាការភ្ញាក់ផ្អើលមួយសម្រាប់អ្នកនិយមចូលចិត្តគុនខ្មែរនៅកម្ពុជា ដោយសារការចាញ់ដោយសន្លប់និងលឿនបំផុតត្រឹមទឹកទី១ របស់ជើងខ្លាំងលំដាប់ជួរមុខ ផល សោភ័ណ្ឌ កាលពីយប់ថ្ងៃទី១០ ខែមិនា ឆ្នាំ ២០១៧ នៅសង្វៀនអាស៊ីអាគ្នេយ៍ ទើបព្រឹទ្ធាចារ្យជើងចាស់សុំឲ្យដាក់គូរនេះសងសឹកវិញ។

លោកតា ញ៉ូវ ម៉ាក ដែលជាគ្រូបង្វឹកប្រដាល់គុនខ្មែរជើងចាស់បានឲ្យដឹងដែរថា បន្ទាប់ពីកូនសិស្សរបស់លោក (ផល សោភ័ណ្ឌ) ជាសះស្បើយពីរបួសវិញលោកនឹងសុំខាងស្ថានីយទូរទស្សន៍អាស៊ីអាគ្នេយ៍ឲ្យផ្គូផ្គងគូរនេះសងសឹកឡើងវិញ។ ព្រោះថាការចាញ់នៅថ្ងៃសុក្រនោះ ហាក់ដូចជាលឿនពេក មិនទាន់និងដឹងថាល្អក្បាច់អ្វីខ្លះ ហើយក្បាច់ទាំងនោះល្អជាងកូនសិស្សលោកឬអត់នោះទេ ទើបដូចនេះលោកចង់ឲ្យមានការប្រកួតម្ដងទៀត។

កីឡាករ ផល សោភ័ណ្ឌ ត្រូវអាជ្ញាកណ្ដាលរាប់

ទាក់ទិនទៅនិងការភ្នាក់ស្នៀតសន្លប់របស់កូនសិស្សសំណព្វចិត្តរូបនេះ គ្រូប្រចាំក្លឹបតាឡីដំរីមានរិទ្ធ ឲ្យដឹងទៀតថា កីឡាករថៃដែលដាក់ឲ្យប្រកួតលើកនេះ គេបានសិក្សាក្បាច់របស់ សោ ភ័ណ្ឌ ច្បាស់។ មួយទៀតពួកគេឆ្ងល់(ថៃ) ថាហេតុអ្វីដាក់កីឡាករថៃមកចេះតែចាញ់អ្នកប្រដាល់កម្ពុជារូបនេះទើបគេព្យាយាមហើយព្យាយាមទៀតរហូតទល់តែចាប់ក្បាច់ដូចនេះ។ ហេតុដូចនេះហើយទើបកីឡាករថៃរូបនេះ មិនចាំយូរនោះទេ លឺសូរជួងភ្លាមដើរចូលវ៉ៃតែម្ដង ដោយមិនគិតស្ទង់ស្ទាបយូរនោះទេ ហើយការចាញ់របស់កូនសិស្សលោកទៀតសោតក៏មកពីកីឡាករថៃខ្ពស់ជាងផងដែរ។

កីឡាករថៃ ខុនក្រុងថេប

ការជួបប្រកួតជាមួយជើងខ្លាំងរបស់ថៃរូបនេះលើកទី២ ព្រឹទ្ធាចារ្យម្នាក់នេះបង្វឹក ផល សោភ័ណ្ឌ ឲ្យត្រៀមទប់ទល់និងក្បាច់មួយនេះបន្ថែមទៀតថាត្រូវប្រើក្បាច់អ្វីដើម្បីកាត់ចង្វាក់ ឬគេចដោយរបៀបណា ហើយត្រូវវ៉ៃបកវិញដូចម្ដេច។

ផល សោភ័ណ្ឌ ជាកូនសិស្សមកពីក្លឹបប្រដាល់តាឡីដំរីមានរិទ្ធ ស្ថិតនៅខណ្ឌដង្កោ ជាយរាជធានីភ្នំពេញ។ កីឡាកររូបនេះចាញ់ជើងខ្លាំងឆ្លងដែនមកពីថៃ (ខុន ក្រុងថេប) ក្នុងទឹកទី១ ដោយរបួសបែកក្រោមភ្នែកឆ្វេងដេរអស់ ១៤ថ្នេរ៕

អត្ថបទ៖ នួន ស៊ីណា