Marco Verratti ចង់ចេញពី PSG ទៅ Barcelona ក្រោយចប់រដូវកាលនេះ

2017-03-14 04:16:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើ Marco Verratti បានប្រាប់ភ្នាក់ងាររបស់គេថា ចង់ចាកចេញពីក្លឹប Paris Saint-Germain ក្រោយចប់រដូវកាលនេះ និងចង់ទៅក្លឹបយក្សអេស្ប៉ាញ FC Barcelona ដើម្បីត្រៀមជំនួសតំណែង Andres Iniesta នាពេលអនាគត។ នេះបើតាមសេចក្ដីរាយការណ៍ពីអេស្ប៉ាញ។

សារព័ត៌មាន Mundo Deportivo បានឲ្យដឹងថា កីឡាករជម្រើសជាតិអ៊ីតាលី បានប្រាប់ដល់ភ្នាក់ងាររបស់គេលោក Donato Di Campli ថាចង់ចាកចេញពីក្លឹបនៅ Ligue 1 ពេលចប់រដូវកាលនេះ។ សេចក្ដីរាយការណ៍ដដែល បន្ថែមថា ក្លឹបអ្នកមានបុណ្យ Barca ចង់បាន Verratti យ៉ាងខ្លាំង ដើម្បីយកទៅជំនួសតំណែងខ្សែបម្រើចាស់វស្សាវ័យ៣២ឆ្នាំ Iniesta និងត្រៀមដេញថ្លៃ៧០លានផោន នៅរដូវក្ដៅខាងមុខនេះ។

កីឡាករវ័យ២៤ឆ្នាំ Verratti ជាកីឡាករដ៏សំខាន់របស់ PSG ដែលរួមចំណែកជួយឲ្យក្រុមឈ្នះ Barca ៤-០ កាលប្រកួត UEFA Champions League វគ្គ១៦ក្រុម ជើងទី១ នៅទីក្រុងប៉ារីស ប៉ុន្តែត្រឡប់ទៅជើងទី២ នៅកីឡដ្ឋាន Nou Camp រូបគេលេងពុំសូវបានល្អនោះទេ ដែលធ្វើឲ្យ PSG ចាញ់ Barca ៦-១ ធ្លាក់ចេញពីពានរង្វាន់នោះវិញ។

ខ្សែបម្រើ Blaise Matuidi ដែលជាមិត្តរួមក្រុមរបស់ Verratti បានបង្ហើបឲ្យដឹងថា ពេល PSG ឈ្នះ Barca ៤-០ នៅជើងទី១ ប្រធានក្រុមអ្នកមានបុណ្យ Iniesta បានស្ងើចសរសើរចំពោះសមត្ថភាព Verratti យ៉ាងខ្លាំង ហើយថែមទាំងនិយាយថា រូបគេពេញចិត្តកីឡាកររូបនេះ ដើម្បីជំនួសតំណែងរបស់ខ្លួន នៅក្រុម Barca នាពេលអនាគតផងដែរ៕

ប្រភព៖ The Sun ប្រែសម្រួល៖ វិន ជីវ័ន្ត