ខាងស្រីទារបណ្ណាការដល់ខ្ទង់ម៉ឺនដុល្លារ តើប្រុសៗគិតយ៉ាងម៉េច?

2017-03-17 01:57:32
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះយើងឃើញថា ថ្លៃបណ្ណាការ ឬ មនុស្សទូទៅហៅថាថ្លៃទឹកដោះនោះ ចេះតែកើនឡើងជាលំដាប់នៅក្នុងប្រទេសកម្ពុជា ជាពិសេសគឺកូនស្រីអ្នកមាន ស្អាត និង រៀនសូត្របានខ្ពស់។ ហើយពេលខ្លះថ្លៃបណ្ណាការខាងស្រីទារដល់មួយម៉ឺនដុល្លារ ឬ លើសពីនេះទៀតផង។ តើបុរសៗគិតយ៉ាងម៉េចដែរចំពោះរឿងនេះ ហើយគួរដោះស្រាយដោយវិធីណា ទើបជាការល្អ?

បើតាមការលើកឡើងរបស់ លោក លាង លីណាដែលជាអ្នកជំនាញខាងថតរូប និង វីដេអូបានបញ្ជាក់ថា លោកមានអារម្មណ៍មិនល្អប៉ុន្មានឡើយពេលគិតដល់រឿងនេះម្ដងៗ។ លោកបន្តថា សព្វថ្ងៃការងាររបស់លោកអាចរកចំណូលបានមធ្យមនៅឡើយ ហើយបើសន្សំលុយវិញ គឺប្រហែល ១០ឆ្នាំបានមានលុយសល់មួយម៉ឺនដុល្លារ ដូចនេះលោកគ្មានលទ្ធភាពអាចរៀបការបាននោះទេ។ លោកនិយាយថា អ្វីដែលល្អគឺយើងត្រូវនិយាយជាមួយខាងស្រីអោយគាត់ជួយបន្ធូរបន្ថយចំពោះថ្លៃបណ្ណាការនេះ។ ប្រការសំខាន់គឺគួរតែរៀបចំពិធីមង្គលការអោយមានលក្ខណៈសមរម្យបានហើយ មិនបាច់អធឹកអធមពេកនោះទេ។ កត្តាមួយទៀតគឺអាចកាត់បន្ថយការចំណាយបានតាមរយៈការជួលផ្នួង ចុងភៅ និង ដាក់ស្រាល្មមៗបានហើយ។ លីណាប្រាប់ថា ប្រសិនបើខាងប្រុសមិនមានលុយច្រើនទេ គាត់គួរតែពិភាក្សាជាមួយមនុស្សស្រីដែលគាត់ស្រលាញ់ អំពីការសន្សំលុយរួមគ្នាដើម្បីរៀបការ។ វិធីចុងក្រោយ បើមិនសូវមានលុយដុំទេគឺអាចខ្ចីលុយធនាគារសិនយកមកប្រើការ រួចចាំយកលុយចំណងដៃ និង រកស៊ីបង់រំលោះលុយសងទៅគេវិញបន្តិចម្ដងៗក៏បានដែរ។

ងាកមកយុវជន វ៉ាន់ ស៊ីដារ៉ូវិញម្ដងបានបញ្ចេញជាទស្សនៈថា លុយមួយម៉ឺនដុល្លារគឺពិតជាច្រើនណាស់សម្រាប់លោក ហើយបើពឹងលើប្រាក់ខែដែលសល់វិញ វារាងពិបាកបន្តិច។ អ្នកខេត្តកំពង់ឆ្នាំងរូបនេះបានរៀបរាប់ថា ប្រសិនបើលោកជួបនូវបញ្ហាបែបនេះគឺ លោកនឹងពន្យល់ទៅឪពុកម្ដាយខាងស្រីថា ការរៀបការធំដុំវាមិនមែននាំមកនូវសុភមង្គលដល់ប្ដីប្រពន្ធនោះទេ។ អ្វីដែលសំខាន់គឺការស្រលាញ់គ្នា ហើយចាប់ដៃគ្នាខិតខំរកស៊ីទៅបន្ទាប់ពីនោះ ទើបវាជារឿងប្រសើរ។ ដូចនេះមានតែសុំអោយគាត់យោគយល់ និង បន្ធូរបន្ថយតែប៉ុណ្ណោះ។ លោកបានបន្ថែមទៀតថា ជាធម្មតាមនុស្សស្រីតែងតែមានចិត្តប្រៀបធៀបខ្លួនឯងជាមួយមិត្តភក្តិជាមិនខាន ដោយខ្លាចថាខ្លួនឯងអន់ បានថ្លៃទឹកដោះតិចជាងអ្នកនេះ អ្នកនោះជាដើម។ ដូចនេះ ក្នុងនាមជាបុរសម្នាក់ក៏គួរចេះលួងលោម និង ពន្យល់ប្រាប់ទៅនាងដោយចិត្តស្មោះនូវស្ថានភាពដែលអ្នកកំពុងរស់នៅ។ ចំណែកការចំណាយមួយផ្នែកលើពិធីមង្គលការវិញ គឺខាងប្រុសអាចប្រជុំគ្នាជាមួយបងប្អូន ឪពុកម្ដាយថាតើពួកគាត់អាចជួយអ្វីបានខ្លះទេ ដើម្បីយកលុយចំណងដៃរបស់ពួកគាត់ទៅប្រើការជាមុន។ មួយវិញទៀត លោកដារ៉ូបានប្រាប់ថា មុននឹងបុរសម្នាក់សម្រេចចិត្តចង់រៀបការ គាត់គួរមានគោលជំហររឹងមាំជាមុនសិន និង គួរចាប់ផ្ដើមសន្សំលុយទុកបណ្ដើរៗពេលនៅក្មេង ដោយកុំដើរលេង ឬ ស៊ីផឹកអត់ប្រយោជន៍ច្រើនពេក។

ចំណែកលោក រៀម សុវណ្ណដែលជាបុគ្គលិក IT នៅក្រុមហ៊ុនចំណីអាហារមួយបានបញ្ចេញយោបល់ថា បើថ្លៃទឹកដោះខាងស្រីចេះតែឡើងកប់ក្ដោងបែបនឹងគឺលោកច្បាស់ជាបានត្រឹមលួចស្រលាញ់ប៉ុណ្ណោះ ហើយមិនបានរៀបការជាមួយគ្នាទេមើលទៅ។ លោកបានបន្តថា ធ្វើការសព្វថ្ងៃនេះគឺបានត្រឹមមួយចាយវាយ និង សេសសល់តិចតួចជូនទៅឪពុកម្ដាយនៅស្រុកប៉ុណ្ណោះ។ លោកនិយាយដោយត្រង់ថា លោកគ្មានលុយមួយម៉ឺនដុល្លារកាន់ក្នុងដៃដើម្បីរៀបការនោះឡើយ។ បើជួបរឿងបែបនេះ លោកមានតែសម្រេចចិត្តស្វែងរកនារីណាផ្សេងដែលមានជីវភាពមធ្យមដើម្បីចាប់ដៃគ្នាជាគូរអនាគតប៉ុណ្ណោះ ដោយមិនរំពឹងមើលមុខកូនស្រីអ្នកមាននោះឡើយ។

អត្ថបទ៖ ចន្ថា