ស្ថាបត្យករខ្មែរមួយរូប ប្រាប់ចំណុចសំខាន់ ឲ្យទីក្រុងមួយមានភាពទាក់ទាញ និងរស់រវើក
- 2017-03-17 02:54:38
- ចំនួនមតិ 0 | ចំនួនចែករំលែក 0
ស្ថាបត្យករខ្មែរមួយរូប ប្រាប់ចំណុចសំខាន់ ឲ្យទីក្រុងមួយមានភាពទាក់ទាញ និងរស់រវើក
ចន្លោះមិនឃើញ
លោក ហ៊ុន ចាន់សាន ស្ថាបត្យករខ្មែរមួយរូប ដែលកាលពីថ្ងៃ ១៥ មីនា កន្លងទៅ សារព័ត៌មាន របស់សិង្ហបុរី Channel News Asia បានចុះផ្សាយពីបំណងរបស់លោក ចង់ឃើញរាជធានីភ្នំពេញទទួលបានស្ថាបត្យកម្មប្រកបដោយគំនិតច្នៃប្រឌិតថ្មីៗ បានទទួលការចាប់អារម្មណ៍ជាខ្លាំងនៅលើបណ្ដាញសង្គមនៅកម្ពុជា។
ជួបបទសម្ភាសជាមួយ Sabay ស្ថាបត្យករខ្មែរដែលបានបញ្ចប់ការសិក្សាថ្នាក់អនុបណ្ឌិត មកពីសាកលវិទ្យាល័យ North Eastern សហរដ្ឋអាមេរិកខាងលើ ក៏បានលើកឡើងពីចំណុចមួយចំនួន ដែលធ្វើឲ្យទីក្រុងមួយមានភាពរស់រវើក និងទាក់ទាញប្រជាជនឲ្យចង់រស់នៅ តាមមតិផ្ទាល់ខ្លួនរបស់លោកដូចខាងក្រោម៖
តម្រូវការគ្រប់គ្រាន់៖ លោក ហ៊ុន ចាន់សានបាននិយាយថា ទីក្រុងមួយកើតឡើងដោយសារមានមនុស្សគ្នារស់នៅ ហើយនៅទីនោះ មានមនុស្សប្រមូលផ្ដុំគ្រប់ជីវភាព ទាំង មាន មធ្យម និងក្រ។ ដូចនេះ ទីក្រុងដ៏ទាក់ទាញ គឺមានបំពេញតម្រូវការរបស់ពួកគេ ដូចជា សួនច្បារសាធារណៈ មធ្យោបាយធ្វើដំណើរ សារមន្ទីរ រោងមហោស្រព ទីកន្លែងកម្សាន្ត និងហេដ្ឋារចនាសម្ព័ន្ធ (ផ្លូវថ្នល់ ស្ពាន សាលារៀន មន្ទីរពេទ្យ) ។
អត្តសញ្ញាណទីក្រុង៖ ចំណុចនេះ ស្ថាបត្យករខ្មែរ ដែលអាចប្រើភាសាអង់គ្លេសស្ទាត់ជំនាញ និងអាចប្រើភាសាចិនតិចតួច រូបនេះបាននិយាយសំដៅទៅលើ ស្ថាបត្យកម្មបុរាណ ដែលមាន គឺគប្បីអភិរក្សថែរក្សាទុក។ មរតកពីបុរាណទាំងនោះ គឺជាតំណាងឲ្យរដ្ឋធានីមួយ រាជធានីមួយ ដែលធ្វើទីក្រុងនោះមានលក្ខណៈប្លែកពីគេ រក្សាបានវប្បធម៌របស់ខ្លួន ព្រមទាំងមានឥទ្ធិពលដល់ពលរដ្ឋជំនាន់ក្រោយឲ្យបានសិក្សាស្វែងយល់ផងដែរ។
ស្ថាបត្យកម្មថ្មីៗ តែមានតុល្យភាព៖ "ស្ថាបត្យកម្មត្រូវការផ្លាស់ប្ដូរ វាមិនអាចនៅតែដដែលទេ ... ព្រោះមនុស្យយើងផ្លាស់ប្ដូរ ចឹងយើងត្រូវផ្លាស់ប្ដូរតាមសម័យរបស់យើង ប៉ុន្តែយើងក៏ត្រូវចេះរក្សាទុកអ្វីទៅដែលជា វត្ថុបុរាណរបស់យើង អ្វីជាប្រពៃណីរបស់យើង"។ នេះបើតាម ស្ថាបត្យករខ្មែរ ដែលបញ្ចប់ការសិក្សា នៅសហរដ្ឋអាមេរិកបាននិយាយ ដែលចំណុចនេះលោកចង់សំដៅទៅលើ ការសាងសង់ស្ថាបត្យកម្មថ្មីៗសម្រាប់ទីក្រុង ក៏ប៉ុន្តែត្រូវថែរក្សាសំណង់អគារចាស់ៗពីមុនផងដែរ ដើម្បីឲ្យទីក្រុងនោះមាន អគារចម្រុះ មានតុល្យភាព (អគារថ្មីក៏មាន សំណង់អគារបុរាណក៏មាន)។
គិតបានគ្រប់ជ្រុងជ្រោយ៖ ត្រង់ចំណុចនេះ ប្រធានក្រុមហ៊ុនស្ថាបត្យកម្មខ្មែរ Re-Edge Architecture +Design បានលើកឡើងពីទស្សនៈផ្ទាល់ខ្លួនថា មុននឹងធ្វើការសាងសង់សំណង់អគារថ្មីៗ ឬរុះរើចាស់ គឺត្រូវគិតឲ្យបានជ្រៅ ថាតើវាអាចបង្កផលប៉ះពាល់ដែលអាចបង្កឲ្យមានការកកស្ទះចរាចរ តើបំពានលើផ្លូវដើរសាធារណឬទេ? តើវាអាចមានទីកន្លែងងាយស្រួលសម្រាប់ចំណតរថយន្តឬទេ? ដែលការគិតបានសព្វគ្រប់ទាំងនេះ នឹងជួយឲ្យទីក្រុងមួយប្រែប្រួលមុខមាត់ថ្មី គួរឲ្យចង់រស់នៅ។
គួររំលឹកដែរលោក ហ៊ុន ចាន់សាន ជាស្ថាបត្យករខ្មែរមួយរូបដែលបានបញ្ចប់ការសិក្សាថ្នាក់បរិញ្ញាបត្រស្ថាបត្យកម្មនៅ សាកលវិទ្យាល័យ Boston សហរដ្ឋអាមេរិក។ ហើយអតីតសិស្សវិទ្យាល័យបាក់ទូករូបនេះ សព្វថ្ងៃគឺជាប្រធាន ក្រុមហ៊ុនស្ថាបត្យកម្មខ្មែរ Re-Edge Architecture +Design៕