ប្រវត្តិ Mane លួចទៅប្រកបអាជីពបាល់ទាត់នៅអឺរ៉ុប ដោយមិនប្រាប់ម្ដាយ

2017-03-17 08:31:21
ចំនួនមតិ 0 | ចំនួនចែករំលែក 0

ចន្លោះមិនឃើញ

Sadio Mane ជាតារាឆ្នើមរបស់ក្រុមហង្សក្រហម Liverpool នាពេលបច្ចុប្បន្ន និងជាកីឡាករស៊ុតបញ្ចូលទីច្រើនជាងគេ (Top Scorer) នៅក្នុងក្រុមរដូវកាលនេះ។

ខ្សែបម្រើប្រយុទ្ធ វ័យ២៤ឆ្នាំ បានផ្ដល់បទសម្ភាសន៍ដល់វិបសាយក្លឹប Liverpool ថា ឪពុកម្ដាយរបស់គេ មិនចង់ឲ្យរូបគេលេងបាល់ទាត់ទេ ព្រោះគិតថាជារឿងអត់ប្រយោជន៍ខាតតែពេលវេលា។ ប៉ុន្តែ Mane បានចាកចេញពីភូមិ Bambali ភាគនិរតីប្រទេសសេណេហ្គាល់ ទៅរស់នៅជាមួយពូនៅទីក្រុង Dakar ដើម្បីហាត់បាល់ទាត់នៅឈុតយុវជន Generation Foot នៅអាយុ១៩ឆ្នាំ ព្រោះមានបំណងចង់ក្លាយជាកីឡាករបាល់ទាត់អាជីពល្បីល្បាញម្នាក់។

ចាកចេញពីសេណេហ្គាល់ ទៅបារាំងដោយមិនប្រាប់ម្ដាយ

Mane បានផ្ទេរមកក្លឹបបារាំង Metz នៅឆ្នាំ២០១១ លេងនៅលីគលំដាប់ទី២ Lique 2 និងលីគលំដាប់ទី៣ Championnat National រដូវកាល ២០១២-១៣ បានតិចតួច។ ២រដូវកាលលេងឲ្យក្រុមបារាំង សរុបបាន២៣ប្រកួត ស៊ុតបាន២គ្រាប់ប៉ុណ្ណោះ។

“ខ្ញុំចាកចេញមកបារាំង ខ្ញុំប្រាប់តែពូខ្ញុំម្នាក់ប៉ុណ្ណោះ។ សូម្បីម្ដាយរបស់ខ្ញុំ ក៏គាត់មិនដឹងដែរ។ ខ្ញុំចាំថា ថ្ងៃដំបូងទៅដល់បារាំង ខ្ញុំចង់ហ្វឹកហាត់ភ្លាម ប៉ុន្តែគ្រូបង្វឹកបានប្រាប់ឲ្យខ្ញុំសម្រាកនៅផ្ទះសិន ហើយពេលនោះទូរស័ព្ទរបស់ខ្ញុំអស់លុយ ពុំបានតេប្រាប់ម្តាយរបស់ខ្ញុំទេ”។

“ថ្ងៃបន្ទាប់ ខ្ញុំបានទៅជួបមិត្តភ័ក្ដិរបស់ខ្ញុំ ដែលពួកគេនៅក្លឹប Metz ដែរ ដើម្បីទិញកាតទូរសព្ទ។ ខ្ញុំបានតេទៅគាត់ ហើយនិយាយថា ម៉ាកខ្ញុំនៅបារាំង។ គាត់ឆ្លើយថា បារាំងនៅឯណា? ខ្ញុំតប បារាំងនៅអឺរ៉ុប។ មានន័យម៉េចនៅអឺរ៉ុប បើឯងនៅសេណេហ្គាល់? ខ្ញុំថា អត់ទេខ្ញុំមកដល់អឺរ៉ុបហើយ”។

Mane បន្ថែមថា ម្តាយរបស់គេពិតជាភ្ញាក់ផ្អើលខ្លាំង ពេលដឹងថារូបគេ មកប្រកបអាជីពជាកីឡាករបាល់ទាត់នៅអឺរ៉ុប។ "គាត់ភ្ញាក់ផ្អើលខ្លាំងណាស់ ហើយតែងតេសួរខ្ញុំស្ទើររាល់ថ្ងៃ ដើម្បីចង់ដឹងការពិត។ ឪពុកម្តាយរបស់ខ្ញុំ មិនចង់ឲ្យខ្ញុំលេងបាល់ទាត់ទេ ព្រោះពួកគាត់យល់ថា វាខាតតែពេលវេលាអត់ប្រយោជន៍”។

ភាគជោគជ័យ និងល្បីឈ្មោះនៅក្លឹបអាជីពលេងនៅលីគកំពូលៗ៖

Red Bull Salzburg

រដូវកាល២០១២-២០១៣ Mane បានចាកចេញពីក្លឹបបារាំង ទៅលេងឲ្យក្លឹប Red Bull Salzburg និងលេង៣រដូវកាល បង្ហាញខ្លួន៨៧ប្រកួត ស៊ុត៤៥គ្រាប់ ជួយឲ្យក្រុមរបស់គេលើកពានកំពូលលីគអូទ្រីស រដូវកាល២០១៣-១៤ និងពាន Austrian Cup ក្នុងរដូវកាលនោះផងដែរ។

Southampton

ខែកញ្ញា ឆ្នាំ២០១៤ Mane បានចុះកុងត្រាលេងឲ្យ Southampton នៅលីគកំពូលអង់គ្លេស Premier League។ នៅ Southampton ២រដូវកាល Mane នៅតែបន្តធ្វើបានល្អ ដោយ៧៥ប្រកួត ស៊ុតបាន២៥គ្រាប់។

Liverpool

ខែមិថុនា ឆ្នាំ២០១៦ Mane បានផ្ទេរមកក្លឹប Liverpool ក្នុងតម្លៃ៣៤លានផោន (ជាតម្លៃកីឡាករអាហ្វ្រិកថ្លៃបំផុតក្នុងប្រវត្តិសាស្ត្រ) និងបច្ចុប្បន្នរូបគេ បានក្លាយជាកីឡាករដ៏សំខាន់បំផុតរបស់ក្រុម Liverpool និងជា Top Scorer រដូវកាលនេះ ដោយ២៤ប្រកួត ស៊ុតបាន១១គ្រាប់ លើ Roberto Firmino ៩គ្រាប់ និង Adam Lallana ៧គ្រាប់។

ជម្រើសជាតិសេណេហ្គាល់

Mane បានជាប់ឈ្មោះលេងឲ្យជម្រើសជាតិសេណេហ្គាល់ ឈុតអូឡាំពិកឆ្នាំ២០១២ គ្រប់ប្រកួតនៅពូល A និងបានបញ្ចប់ចំណាត់ថ្នាក់លេខ២ ក្នុងពូលបន្ទាប់ពីអង់គ្លេស។ ប៉ុន្តែនៅវគ្គ៨ក្រុម ពួកគេបានចាញ់ក្រុមជើងឯកម៉ិកស៊ិក ៤-២ នៅម៉ោងបន្ថែម១៥នាទី២ដង។

នៅឈុតធំវិញ Mane បានបង្ហាញខ្លួននៅពានធំៗដូចជា Africa Cup of Nations ចំនួន២លើកគឺឆ្នាំ២០១៥ និង២០១៧ថ្មីៗកន្លងទៅនេះ។ ប៉ុន្តែរូបគេស៊ុតប៉េណាល់ទីមិនចូល ធ្វើឲ្យសេណេហ្គាល់ ចាញ់ក្រុមជើងឯកកាមេរ៉ូន នៅវគ្គ៨ក្រុម ឆ្នាំ២០១៧។

សរុបមក រយៈពេលមិនដល់៦ឆ្នាំ ដែល Mane ចាកចេញពីស្រុកកំណើត និងចាកចេញពីឪពុកម្ដាយ ពិតជាមិនខកបំណងនោះទេ ពោលគឺរូបគេបានធ្វើឲ្យឪពុកម្ដាយរបស់គេ មានមោទនភាពបំផុត ដោយសារបច្ចុប្បន្ន ខ្សែបម្រើល្បឿនលឿន និងមានបច្ចេកទេសញាក់ល្អរូបនេះ បានក្លាយជា Super Star នៅជម្រើសជាតិសេណេហ្គាល់ និងកីឡាករម្នាក់ ដែលមានតម្លៃខ្លួន ថ្លៃជាងគេបំផុតប្រចាំទ្វីបអាហ្វ្រិកផងដែរ៕

ប្រែសម្រួល៖ វិន ជីវ័ន្ត | ប្រភព៖ Mirror | Wiki