យឹង យន និងតារាចម្រៀងស្រី២នាក់ទៀត ទៅច្រៀងរកបច្ច័យឲ្យវត្តមួយនៅអូស្ត្រាលី

2017-03-18 05:29:14
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការបញ្ចេញឲ្យដឹងពីសាមីខ្លួនបានឲ្យដឹងថា លោក យឹង យន រួមជាមួយដៃគូតារាចម្រៀងស្រី២រូបទៀត ត្រៀមនឹងហោះទៅអូស្ត្រាលីជាលើកដំបូងក្នុងអាជីពសិល្បៈ ដែលការទៅនោះ គឺដើម្បីចូលរួមច្រៀងរកបច្ច័យវត្តខ្មែរមួយស្ថិតនៅទីនោះ។

លោក យឹង យន និងដៃគូ២នាក់ទៀតមានកញ្ញា អ៊ុន ស្រីលីស ហៅ កល្បាណី ស្រីលីស រួមជាមួយតារាចម្រៀង គ្រីប លក្ខិណា ហៅ ចំប៉ី លក្ខិណា នឹងចាកចេញពីកម្ពុជានៅថ្ងៃទី៤ មេសា ឆ្នាំនេះប្រសិនមិនមានអ្វីប្រែប្រួល។ នេះ គឺជាបេសកកម្មតន្ត្រីរបស់លោកដើម្បីបម្រើអារម្មណ៍បងប្អូនខ្មែរនៅទីនោះក្នុងឱកាសបុណ្យចូលឆ្នាំប្រពៃណីជាតិយើងខាងមុខ តបតាមការអញ្ជើញរបស់វត្តខ្មែរមួយ ហើយលោកគ្រោងវិលត្រឡប់មកកម្ពុជាវិញនៅថ្ងៃទី ១៥ ឧសភា ២០១៧។

តាមការបញ្ជាក់របស់អតីតជយលាភីលេខ២កម្មវិធី "ស្ដាប់ចម្រៀងរបស់ខ្ញុំ" រដូវកាលទី២រូបនេះ គឺបេសកកម្មរបស់លោក ដើម្បីរកបច្ច័យខ្លះចូលវត្ត ដើម្បីទុកប្រើប្រាស់ក្នុងកិច្ចការនានាក្នុងការកសាងសមិទ្ធផលក្នុងវត្តខ្មែរនេះ ដែលមានឈ្មោះហៅថា វត្តខ្មែរ មែលប៊ន រដ្ឋវិចតូរីយ៉ា។

ដោយសារតែនេះជាលើកទី១ សម្រាប់ខ្លួន លោក យឹង យន បានបង្ហាញពីភាពរីករាយ។ "ជាលើកដំបូងបង្អស់ហើយទៅអូស្ត្រាលី អីចឹងខ្ញុំមានអារម្មណ៍ថាសប្បាយ និងសង្ឃឹមថាបានផ្លែផ្កាល្អ ហើយពុកម៉ែបងប្អូននឹងជួយគាំទ្រ"។ លោក យឹង យន ថ្លែង។

ក្រៅពីទើបចេញអូស្ត្រាលីលើកនេះ តារាចម្រៀងនិយមច្រៀងបទមនោសញ្ចេតនាលន្លង់លន្លោចមកពីខេត្តកំពង់ធំរូបនេះ ធ្លាប់បានទៅប្រទេសជាច្រើនរួចមកហើយ ដែលមានដូចជា អាមេរិក ថៃ សិង្ហបុរី និងប្រទេសអូទ្រីសជាដើម៕

អត្ថបទ៖ ស៊ុនហួត