លួចស្រឡាញ់គេមធ្យម ងំគេមានសង្សារហើយ
- 2017-03-20 06:42:23
- ចំនួនមតិ 0 | ចំនួនចែករំលែក 0
លួចស្រឡាញ់គេមធ្យម ងំគេមានសង្សារហើយ
ចន្លោះមិនឃើញ
ហឹមម..គិតៗទៅរាល់ថ្ងៃមិនដឹងជាមានកម្មអីទេ បានជាលង់ស្នេហ៍តែជាមួយមនុស្សដែលគេមានម្ចាស់ហើយ ឯមនុស្សនៅទំនេរម៉ាគគោកបែរជាមើលមិនឃើញ មិនចាប់អារម្មណ៍ ចូលចិត្តតែស្រឡាញ់អ្នកណាដែលមិនអាចទៅរួច ហើយវាមិនមែនជាលើកទី១ទេពីរបីដងហើយតែហេតុអីមិនចេះចោះត្រចៀកចឹង?
ថ្ងៃនេះចង់និយាយរឿងពិតមួយ មិនដឹងថាគួរប្រាប់អ្នកណា មានតែពឹងបងSabayហើយ។ និយាយទៅខ្ញុំបានលង់ស្រឡាញ់មនុស្សម្នាក់ដោយមិនដឹងខ្លួន ហើយម្នាក់នឹងគាត់មិនមែនជាមនុស្សប្រុសសង្ហាអីទេ តែគួរសមដែរ ប្រហែលខ្ញុំមិនមែនលង់លើរូបសម្បត្តិគាត់ទេ តែអាចមកពីគាត់ជាមនុស្សពូកែ មានសមត្ថភាព ទើបបានជាអាចឆក់យកបេះដូងរបស់ខ្ញុំបាន។
លួចប្រចណ្ឌគេ លួចខឹងគេ ចង់ដឹងរឿងគេ ទាំងគ្មានត្រូវជាមួយអ្វីនឹងគេផង ជាមិត្តក៏មិនមែន ជាអីក៏មិនមែន តើខ្ញុំជាមនុស្សឆ្កួតមែនទេ? ប្រសិនបើខ្ញុំសារភាពប្រាប់គាត់ តើនឹងមានរឿងអ្វីកើតឡើងទៅ? តែខ្ញុំពិតជាពិបាកប្រឈមមុខខ្លាំងណាស់ពេលជួបមុខគេម្ដងៗ ចង់នៅក្បែរគេ ចង់ស្និទ្ធស្នាលជាមួយគេ ទាំងដឹងថាវាមិនអាចទៅរួចទេ ហឹមម.. តើខ្ញុំគួរធ្វើយ៉ាងម៉េចទៅ ព្រោះខ្ញុំស្រឡាញ់គេខ្លាំងណាស់។ តាមពិតប្រសិនបើគេជាអ្នកដទៃ ខ្ញុំនឹងសាកល្បងសារភាពមិនខាន តែនេះយើងជាមិត្តរួមការងារ ចុះបើត្រូវគេបដិសេធ តើខ្ញុំអាចនៅធ្វើការក្នុងក្រុមហ៊ុនជាមួយគ្នាបានទៀតទេ? ចឹងហើយបានជាត្រូវខាំមាត់សង្កត់ចឹងមិនហ៊ានសារភាព បានត្រឹមលួចមើលគេតែប៉ុណ្ណោះ។
លួចស្រឡាញ់គេមធ្យមទេងំ គេមានសង្សារហើយទៀត តែអ្វីដែលធ្វើឱ្យខ្ញុំភ្ញាក់ផ្អើលខ្លាំងនោះ សង្សារគេជាមិត្តជិតស្និទ្ធខ្ញុំធ្វើការជាមួយគ្នាដែរ ឱព្រះអើយហេតុអីក៏ចៃដន្យម្ល៉េះ? ហឹមម... ទោះដឹងចឹងហើយនៅតែមិនព្រមដកចិត្តទៀត កាន់តែដកចិត្តកាន់តែនឹក កាន់តែឈឺចាប់ ហើយចង់បំភ្លេចគេឱ្យបាន ធ្វើម៉េចបាន បើនៅតែជួបមុខគ្នារាល់ថ្ងៃនឹង? ចឹងខ្ញុំត្រូវប្ដូរការងារមានទេ? ហើយប្ដូរយ៉ាងម៉េចទៅ បើការងារនេះខ្ញុំស្រឡាញ់ចង់ស្លាប់ទៅហើយ។
ពេលនេះ វេលានេះ សំណួរចាក់ស្រ្តេសពេញខួរក្បាលខ្ញុំហើយ តើខ្ញុំគួរដោះស្រាយយ៉ាងម៉េចទៅ? បើខ្ញុំសារភាពតើនឹងមានអ្វីកើតឡើងទៅ? ប្រាកដណាស់ពិតជាមើលមុខគ្នាលែងត្រង់មិនខាន ព្រោះខ្ញុំដឹងថាគាត់គ្មានចាប់អារម្មណ៍ខ្ញុំសូម្បីប៉ុនក្រចក កុំថាឡើយស្នេហា សូម្បីជាមិត្តក៏គេមិនចង់ផង។ ហ៊ើយ.. បើនៅទ្រាំសឹងតែដាច់ខ្យល់ម្ដងៗ តើខ្ញុំទ្រាំទ្របានយូរប៉ុណ្ណា?
និយាយឱ្យអស់ទៅ ថ្ងៃមុនទើបតែទៅឱ្យលោកស្រោចទឹក ដើម្បីលាងជម្រះបាបកម្មដែលលួចស្រឡាញ់សង្សារគេ ហើយក៏ដើម្បីចង់បំភ្លេចគេតាមរយៈទឹកមន្តព្រះសង្ឃ តែគ្មានទេយប់ឡើងនៅតែស្រមៃឃើញគេ នៅតែនឹកគេ នៅតែចង់ឃើញមុខគេដដែល។ ហឹមម..កម្មក្រាស់ដល់ហើយខ្ញុំអាសូរតែខ្លួនឯងមិនស្អាតអីទៅ ចាំទៅលួចស្រឡាញ់គេ តែនេះស្អាតប៉ុណ្ណឹងដែរ បែរជាទៅលង់ស្នេហ៍មនុស្សមានម្ចាស់ ហើយថែមទាំងមិនសូវស្អាតទៀត។ ពេលនេះខ្ញុំជឿហើយថា លើលោកនេះពិតជាមានកម្មមែន។
តែសរុបមកវិញការងារខ្ញុំនៅតែបន្តធ្វើ ខ្ញុំមិនអាចដាក់ពាក្យលាឈប់ព្រោះតែរឿងនេះទេ។ ដូច្នេះហើយមានតែជូនពរគាត់ និងនារីម្នាក់នោះស្រឡាញ់គ្នារហូតបានដល់ថ្ងៃរៀបការជាមួយគ្នា ស្រឡាញ់លុះដល់ចាស់កោងខ្នង។ ចំពោះខ្ញុំវិញមានតែកាត់ចិត្តហើយ យើងគ្មានសិទ្ធិអីទៅចង់ហួងហែងគេទេ ព្រោះគ្មានត្រូវជាអ្វីនឹងគេទេ ហើយគម្រោងសារភាពក៏ត្រូវរំលាយចោលដែរ ព្រោះដឹងថាគ្មានផ្លូវទៅហើយ។ ចាប់ពីថ្ងៃនេះតទៅខ្ញុំនឹងធ្វើខ្លួនឱ្យឆ្ងាយពីគេ តាមដែលអាចទៅរួច ព្យាយាមរិះរកគ្រប់មធ្យោបាយដើម្បីបំភ្លេចគាត់ឱ្យទាល់តែបាន៕