KRE ជាស្ពានមួយសម្រាប់កីឡាករបោះជំហានចូលលីគកំពូលកម្ពុជា
- 2017-03-20 08:55:41
- ចំនួនមតិ 0 | ចំនួនចែករំលែក 0
KRE ជាស្ពានមួយសម្រាប់កីឡាករបោះជំហានចូលលីគកំពូលកម្ពុជា
ចន្លោះមិនឃើញ
ការប្រកួតពានរង្វាន់ Khmer Real Estate League 2017 រដូវកាលទី៦បានដំណើរការសប្តាហ៍ទី១ហើយកាលពីថ្ងៃចុងសប្តាហ៍កន្លងទៅហើយដោយការប្រកួតឆ្នាំនេះហាក់មានភាពងាយស្រួលជាងរដូវកាលមុនសម្រាប់ក្រុមនីមួយ។
ក្នុងពិធីបើកកាលពីព្រឹកថ្ងៃអាទិត្យ ទី១៩ មីនា លោក គឹម ហ៊ាង អគ្គនាយកក្រុមហ៊ុនខ្មែររៀល អ៊ីស្ទេត និងជាស្ថាបនិកពានរង្វាន់ពាក់កណ្តាលអាជីពមួយនេះបានឲ្យដឹងថា ការប្រកួតឆ្នាំនេះជាលក្ខណៈប្រកួតសន្សំពិន្ទុដូចលីគកំពូលដែលខុសពីឆ្នាំមុនៗបែងចែកជាពូល។ ការប្រកួតរូបមន្តបែបនេះដើម្បីឲ្យមានលក្ខណៈពេញលេញ និងងាយស្រួលដល់រៀបចំការប្រកួត។
ទន្ទឹមជាមួយគ្នានេះ លោក គឹម ហ៊ាងបាននិយាយចំពោះមុខកីឡាករថា លោកមានថវិកាផ្ទាល់ខ្លួនគ្រប់គ្រាន់សម្រាប់រៀបចំការប្រកួតរយៈពេល១០ឆ្នាំដែលរហូតដល់ពេលនេះឈានដល់ឆ្នាំទី៦ហើយ។ លោកគ្មានទទួលបានប្រាក់ឧបត្ថម្ភគាំទ្រមកពីណាឡើយសម្រាប់ការចំណាយនេះពោលគឺប្រាក់ផ្ទាល់ខ្លួនទាំងស្រុង។ ដូច្នេះលោកសង្ឃឹមថា កីឡាករម្នាក់ៗត្រូវខិតខំប្រឹងប្រែងលេងឲ្យអស់ពីកម្លាំងចិត្តកាយចិត្តដើម្បីឈានឆ្ពោះទៅលេងលីគកំពូលកម្ពុជា។
លោកបញ្ជាក់ថា ពិតណាស់ពាន Khmer Real Estate League ជាស្ពានដ៏សំខាន់មួយសម្រាប់កីឡាករម្នាក់ៗមិនថាកីឡាករខ្មែរ ឬបរទេសទេគឺពេលចូលលេងពានរង្វាន់នេះហើយជាឱកាសបង្ហាញបង្ហាញសមត្ថភាពរបស់ខ្លួនពិតដែលធ្វើឲ្យក្លឹបដែលកំពុងលេងលីគចាប់អារម្មណ៍។ មួយរយៈពេលចុងក្រោយនេះ កីឡាករបរទេសមួយចំនួនជាពិសេសមកពីតំបន់អាហ្វ្រិកបានចូលលេងពាន KRE ហើយធ្វើឲ្យពួកគេមានបទពិសោធន៍ក្នុងការចរចាជាមួយក្លឹបលីគកម្ពុជាដើម្បីបោះ ជំហានទៅលេងលីគកំពូលកម្ពុជា។ ចំណែកកីឡាករមួយចំនួនដែលកំពុងលេងលីគកម្ពុជាសព្វថ្ងៃនេះក៏ធ្លាប់ឆ្លងកាត់លេងពាន Khmer Real Estate League។
លទ្ធផលសប្តាហ៍ទី១កន្លងទៅ ថ្ងៃសៅរ៍ ក្រុម Anvaya ១-០ ក្រុម Havas ក្រុម White Tiger ៣-០ ក្រុ្ម HHK
ថ្ងៃអាទិត្យ ក្រុម Blue Dragon ២-៣ ក្រុ្មម Goodhill ក្រុម Kon Khmer ២–៦ ក្រុម Avatar ក្រុម Bayon ២-២ ក្រុម Khmer United ក្រុម Glant FC ២-៤ ក្រុម Kampong Cham ក្រុម Nissay ៥-០ ក្រុម V.train ក្រុម Narita ៣-៣ ក្រុម Bassac
ពានរង្វាន់ Khmer Real Estate League 2017 នេះគឺមាន១៦ក្រុមចូលរួម ហើយត្រូវធ្វើការប្រកួតវិលជុំ សន្សំពិន្ទុមួយជើង ដើម្បីចម្រាញ់រកក្រុមខ្លាំងជាងគេ ៤ក្រុមឡើងទៅវគ្គខ្វែង និងវគ្គផ្ដាច់ព្រ័ត្រ។ ចំពោះប្រាក់រង្វាន់ជយលាភីវិញ រួមមានលេខ១ នឹងទទួលបានប្រាក់ ១០០០ដុល្លារ ពាន១ មេដាយមាស និង សម្ភារៈកីឡា ដែលសរុបថវិកា១៧២០ដុល្លារអាមេរិក។ ក្រុមលេខ២ ទទួលបាន ៧០០ដុល្លារ មេដាយប្រាក់ និងសម្ភារៈកីឡា ដែលសរុបថវិកា១០៧០ដុល្លារអាមេរិក និងលេខ៣ទទួលបាន៣០០ដុល្លារ មេដាយសំរឹទ្ធ និងសម្ភារៈកីឡា ដែលសរុបថវិកា៦៤៥ដុល្លារ ៕