សួង វីរៈ ជាខ្សែប្រយុទ្ធល្អ តែនៅខ្វះមួយចំណុចត្រូវតែពង្រឹងឱ្យមែនទែន

2017-03-21 02:02:45
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមលោក មាស ចាន់ណា គ្រូបង្វឹកក្រុមណាហ្គាវើលបានបញ្ជាក់ថាខ្សែប្រយុទ្ធ សួង វីរៈ មានសមត្ថភាពល្អហើយ ប៉ុន្តែរូបគេនៅខ្វះការការពារដែលចំណុចនេះត្រូវតែពង្រឹងបន្ថែមឱ្យមែនទែន។

វីរៈ ផ្លាស់ទៅលេងឱ្យណាហ្គាវើលនៅរដូវកាលនេះ ប៉ុន្តែមិនទាន់បានបង្ហាញសមត្ថភាពរកគ្រាប់បាល់បានច្រើនឬយ៉ាងណានោះទេ ដោយរូបគេទើបតែចូលលេងជម្រើស១១នាក់ដំបូងបានប៉ុន្មានប្រកួតចុងក្រោយនេះប៉ុណ្ណោះ។ យ៉ាងណាមិញ ទាក់ទិននឹងទម្រង់លេងរបស់អតីតកីឡាករ Cambodian Tiger នេះដែរ លោក មាស ចាន់ណា មើលឃើញថារូបគេជាកីឡាករល្អ មានបច្ចេកទេស ប៉ុន្តែនៅខ្វះការការពារ។

គ្រូបង្វឹកណាហ្គាវើលបានលើកឡើងបន្ថែមថា អតីតកីឡាករភ្នំពេញក្រោនរូបនេះត្រូវតែពង្រឹងការការពាររបស់ខ្លួនឱ្យបានមែនទែន ព្រោះចង្វាក់លេងរបស់គេល្អហើយ តែបើការការពារបាល់មិនទាន់បានល្អទេ វាងាយនឹងឱ្យដៃគូមកដណ្ដើមណាស់។ មួយវិញទៀត នេះគ្រាន់តែបើករដូវកាលបានប៉ុន្មានប្រកួតប៉ុណ្ណោះ ខណៈដែលរូបគេនៅមានឱកាសច្រើនទៀតហ្វឹកហាត់ជាមួយណាហ្គា ហើយសង្ឃឹមអ្វីគ្រប់យ៉ាងនឹងកាន់តែល្អថែមទៀត។

នៅរដូវកាលនេះដែរ សួង វីរៈ មានឱកាសបានលេងឱ្យក្រុមជម្រើសជាតិកម្ពុជាផងដែរ ក្រោមការដឹកនាំរបស់លោក Leonardo Vitorino ដែលជាគ្រូបង្វឹកថ្មីសម្រាប់ក្រុមបាល់ទាត់ជម្រើសជាតិកម្ពុជា។ មិនតែប៉ុណ្ណោះ គ្រូបង្វឹកសញ្ជាតិប្រេស៊ីលរូបនេះក៏បានសរសើរដល់ វីរៈ ថាជាខ្សែប្រយុទ្ធល្អបំផុតរបស់កម្ពុជានាពេលបច្ចុប្បន្នផង៕

អត្ថបទ៖ មុន្នីរម្យ