អេ ភូថង៖ កីឡាករគុនខ្មែរជម្រើសជាតិជំហានដំបូងត្រូវហាត់កម្លាំង

2017-03-22 07:53:50
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូជម្រើសជាតិប្រដាល់គុនខ្មែរ អេ ភូថង ប្រាប់ពីវិធីសាស្ត្របង្ហាត់ខ្លះៗដល់កីឡាករនៅជំហានដំបូងនេះដែលបានចាប់ផ្ដើមនេះ៥-៦ សប្ដាហ៍នេះ។

លោកគ្រូ អេ ភូថង

លោក អេ ភូថង ដែលជាគ្រូបង្វឹកជម្រើសជាតិបានឲ្យដឹងថា ដំណាក់ការដំបូងនេះលោកផ្ដោតខ្លាំងលើការហ្វឹកហាត់កម្លាំងជាពិសេស។ ទី១ កីឡាករទាំងអស់ត្រូវរត់យកកម្លាំងស៊ុហ្វបន្ថែមឲ្យឆ្ងាយជាងហាត់ធម្មតា។ ទី២ ហាត់យកល្បឿនកីឡាករត្រូវព្យាយាមប្រើក្បាច់សម្លាប់ឲ្យរហ័សជាងមុនទៅទៀត។ ឧទាហរណ៍បើការប្រកួតធម្មតាក្នុង១នាទីគេវ៉ៃបាន១០ដៃ ត្រូវរៀនវ៉ៃឬបង្កើនការវ៉ៃឲ្យច្រើនជាងនេះទ្វេដង។ ទី៣ បន្ថែមចំនួនរយៈពេលហ្វឹកហាត់មានន័យថា ធម្មតាពួកគេហាត់តែវ៉ៃខ្យល់ ទាត់ស៊ីប និងឡាំជង្គង់ ៥ទឹក ដូច្នេះត្រូវបន្ថែមយូរជាងនេះ អាចទៅដល់ ៦-៧ទឹក។

អតីតអ្នកប្រដាល់ជើងខ្លាំងរបស់កម្ពុជារូបនេះបន្តទៀតថា បើនិយាយពីស្នៀតផ្ដួលគួប្រកួតវិញកីឡាករជម្រើសជាតិទាំងនេះសុទ្ធតែល្អសឹងតែគ្រប់ក្បាច់ទៅហើយ មិនថា កែង ជង្គង់ និងកណ្ដាប់ដៃនោះទេ។

កីឡាករ ឡៅ ចន្រ្ទា

ស៊ីហ្គេមលើកទី២៩ នេះនឹងធ្វើឡើងនៅប្រទេសម៉ាឡេស៊ី ចាប់ពីថ្ងៃទី១៩ ខែសីហា ឆ្នាំ២០១៧នេះតទៅ។ នេះជាលើកទី១ហើយកីឡាប្រដាល់គុនខ្មែររបស់កម្ពុជាចូលរួមប្រកួតប្រជែងយកមេដាយ។ មុនពេលកម្មវិធីចាប់ផ្ដើម២ខែ កីឡាករជម្រើសជាតិប្រដាល់ទាំងអស់ផ្អាកការឡើងសង្វៀនតាមប៉ុស្តិ៍ផ្សេងៗដើម្បីថែខ្លួនរហូតដល់ថ្ងៃចេញទៅតែម្ដង៕

អត្ថបទ៖ នួន ស៊ីណា