ប៊ីល ហ្គេត រក្សាចំណាត់ថ្នាក់ជាមហាសេដ្ឋីលេខ១លើលោក តែត្រាំ ធ្លាក់ចុះរាប់រយ

2017-03-22 02:39:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថាបនិកក្រុមហ៊ុន Microsoft លោក ប៊ីល ហ្គេត រក្សាបានចំណាត់ថ្នាក់ជាមហាសេដ្ឋីលេខមួយលើលោកម្ដងទៀត ខណៈប្រធានាធិបតីអាមេរិក ដូណាល់ ត្រាំ ធ្លាក់លេខរៀងជាង ២០០ឯណោះ។ នេះបើតាមការចេញផ្សាយរបស់ទស្សនាវដ្ដី Forbe ថ្មីៗនេះ។

ប៊ីល ហ្គេត, រូបភាពផ្ដល់សិទ្ធិដោយ Reuters

ប៊ីល ហ្គេត បច្ចុប្បន្នមានទ្រព្យសម្បត្តិប្រមាណ ៨៦ពាន់លានដុល្លារ កើនពី ៧៥ពាន់លានដុល្លារ កាលឆ្នាំ២០១៦ បាននាំមុខគេក្នុងបញ្ជីរយៈពេល ៤ឆ្នាំជាប់ៗគ្នា។ លោកត្រូវបានតាមពីក្រោយដោយមហាសេដ្ឋី Warren Buffett មានទ្រព្យសម្បត្តិប្រមាណ ៧៥,៦ពាន់លានដុល្លារ និងបន្តបន្ទាប់ទៀតទាំង១០កំពូលគេ ភាគច្រើនជាម្ចាស់ក្រុមហ៊ុនបច្ចេកវិទ្យា។

ក្នុងនោះស្ថាបនិកក្រុមហ៊ុន Amazon លោក Jeff Bezos ស្ថិតនៅលេខរៀងទី ៣ ជាមួយទ្រព្យសម្បត្តិ ៧២,៨ពាន់លានុដល្លារ។ ម្ចាស់ជំនួញហាងលក់សំលៀកបំពាក់ Zara លោក Amancio Ortega សញ្ជាតិអេស្ប៉ាញ ធ្លាប់ស្ថិតនៅលេខរៀងទី២ ពេលនេះធ្លាក់មកនៅលេខ ៤ ជាមួយទ្រព្យ ៧១,៣ពាន់លានដុល្លារ។

ឯម្ចាស់បណ្ដាញសង្គមយក្ស Facebook លោក Mark Zuckerberg ស្ថិតនៅលេខរៀងទី ៥ ជាមួយទ្រព្យ ៥៦ពាន់លានដុល្លារ។ ចំណែកមហាសេដ្ឋីលេចធ្លោ និងទើបជាប់ជាប្រធានាធិបតីអាមេរិកទី ៤៥ថ្មីៗនេះ លោក ដូណាល់ ត្រាំ បានធ្លាក់ចំណាត់ពីលេខរៀងទី ២២០ ទៅ ៥៤៤ ជាមួយទ្រព្យសម្បត្តិ ៣,៥ពាន់លានដុល្លារអាមេរិក។

ប្រភព Forbe ដដែលរៀបរាប់ថា ការធ្លាក់ចុះទ្រព្យសម្បត្តិរបស់លោក ត្រាំ ប្រមាណ ១ពាន់លានដុល្លារ គឺដោយសារការធ្លាក់ចុះទីផ្សារអចលនទ្រព្យនៃក្រុមហ៊ុន Manhattan ដែលរ៉ាប់រងចំនួនទ្រព្យសម្បត្តិរបស់ត្រាំ មួយភាគធំ។ ទ្រព្យសម្បត្តិ ៤០% របស់ត្រាំ គឺពាក់ព័ន្ធជាមួយអគារ Trump Tower និងការវិនិយោគជាមួយសំណង់អគា រ៨កន្លែង ផ្សេងទៀតនៅក្បែរនោះ។

ក្នុងឆ្នាំនេះ អ្វីដែលគេចាប់អារម្មណ៍ គឺចំនួនមហាសេដ្ឋីពាន់លានដុល្លារបានកើនឡើង ១៣% ធៀបនឹងឆ្នាំមុន ដែលជាចំនួនកើនឡើងច្រើនបំផុតមិនធ្លាប់មានរយៈពេល ៣១ឆ្នាំ ពោលចាប់តាំងពីទស្សនាវដ្ដី Forbe ចាប់ផ្ដើមចងក្រងមក។

មហាសេដ្ឋីទ្រព្យពាន់លានដុល្លារទាំងអស់មានចំនួន ២ ០៤៣នាក់ ដោយអាមេរិកមាន ៥៦៥នាក់, ចិននៅលេខ២ មាន ៣១៩នាក់ និងលេខ ៣ ប្រទេសអាល្លឺម៉ង់មាន ១១៤នាក់៕

មហាសេដ្ឋីកំពូលគេទាំង១០៖

១. Bill Gates (Microsoft co-founder): $86bn

២. Warren Buffett (US investor): $75.6bn

៣. Jeff Bezos (Amazon founder): $72.8bn

៤. Amancio Ortega (Inditex founder): $71.3bn

៥. Mark Zuckerberg (Facebook founder): $56bn

៦. Carlos Slim (Mexican magnate): $54.5bn

៧. Larry Ellison (Oracle co-founder): $52.2bn

៨. Charles Koch (US businessman): $48.3bn

៩. David Koch (US businessman): $48.3bn

១០. Michael Bloomberg (Bloomberg founder): $47.5bn