Real Madrid ចង់ទិញខ្សែប្រយុទ្ធម្នាក់ តម្លៃជិត១៣០លានផោន

2017-03-23 01:44:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបយក្សអេស្ប៉ាញ Real Madrid គ្រោងនឹងទិញយកខ្សែប្រយុទ្ធឆ្នើមវ័យក្មេងជម្រើសជាតិបារាំង Kylian Mbappe របស់ក្លឹប AS Monaco នៅរដូវក្ដៅខាងមុខនេះ ដែលមានតម្លៃខ្លួនថ្លៃបំផុតបំបែកកំណត់ត្រាលើពិភពលោក ជិត១៣០លានផោន (ជាង១៦២លានដុល្លារ)។

Mbappe វ័យទើប១៨ឆ្នាំ បានបង្ហាញទម្រង់លេងដ៏ភ្ញាក់ផ្អើល ដោយស៊ុតឲ្យ Monaco ១៩គ្រាប់ហើយរដូវកាលនេះ និងទើបជាប់ជម្រើសជាតិបារាំង ត្រៀមបង្ហាញខ្លួននៅជម្រុះ World Cup 2018 ទល់នឹងលុចហ្សំបួរ នៅថ្ងៃសៅរ៍ និងលេងមិត្តភាពទល់នឹងអេស្ប៉ាញ នៅថ្ងៃអង្គារផងដែរ។

បើតាម AS បានឲ្យដឹងថា ក្លឹបស្តេចសបានបញ្ជូនភ្នាក់ងារមើលជើងកីឡាកររបស់ខ្លួន ទៅមើល Mbappe រួចហើយ ខណៈដែលពួកគេជឿថា តារាវ័យក្មេងរូបនេះ អនាគតអាចនឹងក្លាយជា Super Star លំដាប់ពិភពលោកដូច Ronaldo ប្រេស៊ីល ដូច្នេះទើបចង់ទិញឲ្យបាននៅរដូវកាលក្រោយ។ សេចក្ដីរាយការណ៍ដដែលបន្ថែមថា Monaco ធ្លាប់បដិសេធក្លឹបអង់គ្លេសដេញថ្លៃ ៩៥លានផោនម្តងហើយ ប៉ុន្តែពួកគេចង់បានតម្លៃប្រហែល១២៩លានផោន ដែលជាតម្លៃបំបែកកំណត់ត្រាលើពិភពលោក ថ្លៃជាង Paul Pogba ផ្ទេរទៅ Manchester United ៨៩លានផោនទៀត៕

ប្រភព៖ The Sun ប្រែសម្រួល៖ វិន ជីវ័ន្ត