អតីតសិស្សវិទ្យាល័យទួលទំពូង រៀបចំពិធីជួបជុំសិស្សគ្រប់ជំនាន់នៅខែមេសានេះ
- 2017-03-23 04:34:32
- ចំនួនមតិ 0 | ចំនួនចែករំលែក 0
អតីតសិស្សវិទ្យាល័យទួលទំពូង រៀបចំពិធីជួបជុំសិស្សគ្រប់ជំនាន់នៅខែមេសានេះ
ចន្លោះមិនឃើញ
ក្លឹបអតីតសិស្សវិទ្យាល័យទួលទំពូង នឹងរៀបចំព្រឹត្តិការណ៍ពិធីជួបជុំប្រចាំឆ្នាំមួយ របស់អតីតវិទ្យាល័យទួលទំពូងតាំងពីជំនាន់ឆ្នាំ ១៩៨០-២០១៦ នាថ្ងៃសៅរ៍ ទី០១ មេសា ឆ្នាំ២០១៧ខាងមុខនេះ នៅសាលសន្និបាត និងពិព័រណ៍កោះពេជ្រអគារ K L ចាប់ពីម៉ោង៥ល្ងាច ដល់ម៉ោង១០យប់។
ព្រឹត្តិការណ៍ធំខាងលើនេះ ត្រូវបានផ្ដួចផ្ដើម រៀបចំឡើងក្នុងបំណងសំខាន់ៗ ៣គឺ ទីមួយ ការជួបជុំប្រចាំឆ្នាំរបស់អតីតសិស្សរបស់វិទ្យាល័យ ដើម្បីរំលឹកអនុស្សាវរីយសប្បាយរីករាយ កម្សត់ និងរសជាតិជាសិស្សកាលពីនៅវ័យសិក្សាយូរយារណាស់មកហើយ។
គោលបំណងទី២ គឺជួបជុំ ដើម្បីរៃអង្គាសថវិកាទ្រទ្រង់ដល់ការសាងសង់បណ្ណាល័យថ្មីរបស់វិទ្យាល័យ ឈ្មោះថា បណ្ណាល័យ ព្រះកែវមរកត និងគោលបំណងចុងក្រោយគឺចង់រៃអង្គាសថិវកាដើម្បីឧបត្ថម្ភដល់លោកគ្រូ អ្នកគ្រូ ចាស់ៗដែលបានចូលនិវត្តន៍។
ពិធីជួបជុំអតីតសិស្សវិទ្យាល័យទួលទំពូងសម្រាប់ឆ្នាំ២០១៧នេះ ក្លឹបអតីតសិស្សវិទ្យាល័យទួលទំពូង គ្រោងនឹងរៀបចំឲ្យមានលក្ខណៈអធិកអធម ដោយរំពឹងថានឹងមានការចូលរួមពីឯកឧត្ដម លោកជំទាវ អ្នកឧកញ៉ា មន្ត្រី ឥស្សរជនជាន់ខ្ពស់ និងលោក លោកស្រី អ្នកនាង កញ្ញាដែលជាអតីតសិស្ស គ្រប់ជំនាន់រហូតដល់ ១ពាន់នាក់ ព្រមទាំងមានវត្តមាន ពីលោកគ្រូអ្នកគ្រូ នាយក នាយិកា ពីជំនាន់មុន និងបច្ចុប្បន្ន ប្រមាណជាង៣០០នាក់ ចូលរួមជាកិត្តិយស។
ក្រៅពីការជួបជុំ ពិសារភោជនីយអាហារ និងមានការរាំលេងកម្សាន្ត អបអរពិធីបុណ្យចូលឆ្នាំខ្មែរ ប្រពៃណីជាតិខាងមុខ ផងដែរ។
សូមបញ្ជាក់ផងដែរថា សំបុត្រចូលរួមក្នុងព្រឹត្តិការណ៍ខាងលើ ១តម្លៃ៣០ដុល្លារ តែលោកអ្នក និងបានជួបមិត្តរួមថ្នាក់ រួមសាលាចាស់ៗ ពិសេសលោកគ្រូ អ្នកគ្រូជាទីគោរពស្រលាញ់ ដែលខិតខំបង្ហាត់បង្រៀនលោកអ្នកផងដែរ។ ដោយឡែកការចូលរួមរបស់អតីតនាយក នាយិកា និងលោកគ្រូ អ្នកគ្រូ មិនតម្រូវឲ្យមានការបង់ប្រាក់នោះទេ។
សម្រាប់សំបុត្រមានលក់នៅវិទ្យាល័យទួលទំពូងផ្ទាល់ជារៀងរាល់ថ្ងៃ ឬទំនាក់ទំនងទិញតាមរយៈទូរស័ព្ទលេខ ០១០ ២២១ ០៩៦ ឬ ០៩២ ៤២០ ៦៨៩ ក្រុមយុវជនស្ម័គ្រចិត្ត និងដឹកជូនដល់ទីកន្លែង។
សម្រាប់ព័ត៌មានលម្អិតបន្ថែម សូមទំនាក់ទំនងទៅក្រុមការងាររៀបចំ តាមរយៈលេខទូរស័ព្ទ៖ ០៩៣ ៦០ ៧០ ៤២ ឬ០៩៧ ៧៩០ ២៦០០ ឬតាមរយៈអ៊ីម៉ែល៖ ttphsalumni@gmail.com ៕