គ្រប់គ្រឹះស្ថានមីក្រូហិរញ្ញវត្ថុទាំងអស់នៅតែផ្ដល់កម្ចីខ្នាតតូចទោះអត្រាការប្រាក់ត្រឹម១៨%
- 2017-03-24 02:16:05
- ចំនួនមតិ 0 | ចំនួនចែករំលែក 0
គ្រប់គ្រឹះស្ថានមីក្រូហិរញ្ញវត្ថុទាំងអស់នៅតែផ្ដល់កម្ចីខ្នាតតូចទោះអត្រាការប្រាក់ត្រឹម១៨%
ចន្លោះមិនឃើញ
ថ្លែងនៅក្នុងសន្និសីទសារព័ត៌មានជុំវិញបញ្ហា ការកំណត់ពិដានអត្រាការប្រាក់ត្រឹម ១៨% ចំពោះមីក្រូហិរញ្ញវត្ថុទាំងអស់ ដែលចេញប្រកាសដោយធនាគារជាតិកាលពីថ្មីៗកន្លងទៅនេះ លោកឧកញ៉ា បណ្ឌិត ហួត អៀងតុង ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានឱ្យដឹងថា អត្រាការប្រាក់មិនកំណត់ចំពោះទំហំកម្ចីទេ ទោះទំហំប៉ុណ្ណាក៏ដោយក៏ត្រឹមតែ១៨%ប៉ុណ្ណោះក្នុងមួយឆ្នាំសម្រាប់ប្រជាពលរដ្ឋ។
លោកបន្ថែមទៀតថា ទោះកម្ចីខ្នាតតូចត្រឹម ៣០០០ដុល្លារ ឬក្រោមនឹងទៀតដែលជាកម្ចីខ្នាតតូចនៅតែបន្តផ្ដល់ជូនប្រជាពលរដ្ឋដដែលមិនមានការលប់បំបាត់ដូចការលើកឡើងកន្លងមករបស់អ្នកវិភាគសេដ្ឋកិច្ចនោះទេ។ លោកឧកញ៉ា ហួត អៀងតុង បញ្ជាក់ថា ក្នុងប្រទេសកម្ពុជាបច្ចុប្បន្ននេះកម្ចីធំជាង៣០០០ដុល្លារប្រហែលពី ៦០% ទៅ៧០ ចំណែកឯកម្ចីក្រោមចំនួននេះមានចំនួនតិចតួច។ ដូច្នេះហើយបណ្ដាមីក្រូហិរញ្ញវត្ថុទាំងអស់ហាក់មិនមានការព្រួយបារម្ភអំពីបញ្ហានេះឡើយ។
បន្ថែមលើពីនេះទៀត លោកឧកញ៉ា បណ្ឌិត ប៊ុន មុនី ទីប្រឹក្សានៃសមាគមមីក្រូហិរញ្ញវត្ថុកម្ពុជា បានលើកឡើងទៀតថា ចំពោះបញ្ហាបញ្ចុះអត្រាការប្រាក់ចំពោះបណ្ដាមីក្រូហិរញ្ញវត្ថុទាំងអស់ គឺមិនមែនជារឿងថ្មីទេ ហើយមីក្រូហិរញ្ញវត្ថុទាំងអស់ក៏ចង់បានបែបនេះដែរ។ លោកបន្តទៀតថា កាលពី១៥ឆ្នាំមុនអត្រាការប្រាក់ទៅលើកម្ចី រហូតទៅដល់ ៣៥%ឯណោះ ទើបក្រោយមកបញ្ចុះត្រឹម ២០%។ ដូច្នេះហើយដើម្បីកាន់តែជួយសម្រួលដល់ប្រជាពលរដ្ឋ ឱ្យទទួលប្រាក់ទុនក្នុងតម្លៃអត្រាការប្រាក់សមរម្យទើបរាជរដ្ឋាភិបាលកំណត់ពិដានអត្រាការប្រាក់ត្រឹម ១៨%នេះឡើង។
លោកឧកញ៉ា បណ្ឌិត ហួត អៀងតុង និង លោកឧកញ៉ា បណ្ឌិត ប៊ុន មុនី ក៏បានបន្ថែមទៀតផងដែរថា ដើម្បីកុំឱ្យមានបញ្ហាចំពោះការផ្ដល់កម្ចីខ្នាតតូចនេះ គ្រប់គ្រឹះស្ថានមីក្រូហិរញ្ញវត្ថុទាំងអស់ត្រូវមានយុទ្ធសាស្ត្រកាត់បន្ថយការចំណាយមិនចាំបាច់ផ្សេងៗ ដូចជាចំណាយទៅលើការងាររដ្ឋបាលនានាក្នុងការផ្ដល់កម្ចីជាដើម។ លោកទាំងពីលើកឡើងថា គ្រឹះស្ថានមីក្រូហិរញ្ញវត្ថុអាចប្រមែប្រមូលកម្ចីខ្នាតតូចផ្សេងៗពីគ្នា ហើយបញ្ចូលគ្នាតែ១ បន្ទាប់មកផ្ដល់កម្ចីទាំងនោះទៅកាន់ប្រជាពលរដ្ឋក្នុងពេលតែមួយ មិនចាំបាច់ធ្វើកម្ចីច្រើនសារនាំឱ្យមានការចំណាយរដ្ឋបាលកាន់តែច្រើននោះទេ៕