ឧកញ៉ាបណ្ឌិត ប៊ុន មុនី៖ ការធ្វើអំណោយ គឺបង្កើតអ្នកសុំទាន

2017-03-24 04:03:30
ចំនួនមតិ 0 | ចំនួនចែករំលែក 0

ចន្លោះមិនឃើញ

"តាមគំនិតរបស់ខ្ញុំការធ្វើអំណោយ គឺបង្កើតអ្នកសុំទានទៅវិញទេ"។ នេះជាការលើកឡើងរបស់ឧកញ៉ាបណ្ឌិត ប៊ុន មុនី ប្រធានអគ្គនាយកស្ថាបនា លីមីតធីត នៅក្នុងសន្និសីទសារព័ត៌មាន ពាក់ព័ន្ធនឹងបញ្ហាកំណត់ពិដានអត្រាការប្រាក់ ១៨% របស់រាជរដ្ឋាភិបាល ចំពោះគ្រឹះស្ថានមីក្រូហិរញ្ញវត្ថុ កាលពីថ្មីៗកន្លងទៅនេះ។

ឧកញ៉ាបណ្ឌិត ប៊ុន មុនី

ប្រធានអគ្គនាយកស្ថាបនា លីមីតធីត និងជាទីប្រឹក្សានៃសមាគមមីក្រូហិរញ្ញវត្ថុបន្តទៀតថា អង្គការមនុស្សធម៌មានលក្ខណៈខុសគ្នា ពីមីក្រូហិរញ្ញវត្ថុ ចំពោះលោកយល់ឃើញថា អំណោយគឺបង្កើតអ្នកសុំទានទៅវិញទេ ហើយកាលណាបង្កើតអ្នកសុំទាន ប្រទេសជាតិនឹងអន់ថយទៅតាមហ្នឹងដែរ។ លោកឧកញ៉ា ប៊ុន មុនី លើកឡើងថា បើមានមានសហគ្រិនច្រើន ភាពជាម្ចាស់អាជីវកម្មច្រើន នោះទើបមានការរីកចម្រើន មានការផ្លាស់ប្ដូរ។

ឧកញ៉ាបណ្ឌិត ប៊ុន មុនី បន្ថែមទៀតថា ដើម្បីចង់ងើបផុតពីភាពក្រីក្រមិនមែនតាមរយៈការធ្វើអំណោយទេ គឺប្រជាពលរដ្ឋដែលមានភាពក្រីក្រទាំងឡាយ ត្រូវបង់តម្លៃមួយដើម្បីប្ដូរមកវិញនូវការផ្លាស់ប្ដូរជីវភាព តាមរយៈការខ្ចីលុយពីមីក្រូហិរញ្ញវត្ថុដែលត្រូវបង់ការប្រាក់នោះឯងគឺជាតម្លៃក្នុងការដែលគេជួយឱ្យរួចផុតពីភាពក្រីក្រ។

ដូចនេះនៅពេលដែលប្រជាពលរដ្ឋខ្ចីលុយពីមីក្រូហិរញ្ញវត្ថុនោះគេនឹងទៅតាមមើលថា ប្រជាពលរដ្ឋយកលុយនោះទៅធ្វើអាជីវកម្មមែនឬក៏អត់? ការដែលមានមីក្រូហិរញ្ញវត្ថុទៅតាមមើលញឹកៗនេះហើយ ទើបធ្វើឱ្យអ្នកខ្ចីលុយទាំងនោះមានអារម្មណ៍ថាខ្មាស ហើយក៏ក្លាយជាទម្លាប់ក្នុងការជំរុញឱ្យប្រជាពលរដ្ឋចេះបង្កើតអាជីវកម្ម។ ឧកញ៉ាបណ្ឌិត ប៊ុន មុនី បន្ថែម ៕