២៦រូប សម្រាំងចេញពីនិស្សិត ១២០០នាក់ នឹងបន្តការសិក្សានៅជប៉ុន ដើម្បីអភិវឌ្ឍប្រទេស
- 2017-03-26 09:07:57
- ចំនួនមតិ 0 | ចំនួនចែករំលែក 0
២៦រូប សម្រាំងចេញពីនិស្សិត ១២០០នាក់ នឹងបន្តការសិក្សានៅជប៉ុន ដើម្បីអភិវឌ្ឍប្រទេស
ចន្លោះមិនឃើញ
និស្សិតកម្ពុជា ២៦រូប ដែលជាប់អាហារូបករណ៍ក្រសួងអប់រំ ជប៉ុន MEXT ឬ Monbukagakusho Scholarship ឆ្នាំសិក្សា២០១៧ បានទទួលការអញ្ជើញស្វាគមន៍កក់ក្ដៅ ពីមន្ត្រីនៅស្ថានទូតជប៉ុនប្រចាំកម្ពុជា កាលពីពេលថ្មីៗកន្លងទៅនេះ មុនពេលចាកចេញដំណើរទៅបន្តការសិក្សានៅ ប្រទេសជប៉ុន នាដើមខែមេសាខាងមុខ។
ឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំនៅកម្ពុជា បានអបអរសាទរយ៉ាងជ្រាលជ្រៅដល់ និស្សិតជាប់អាហារូបករណ៍ទាំង២៦រូប ព្រោះមុននឹងជាប់ជយលាភី បេក្ខជនទាំងអស់ត្រូវឆ្លងកាត់ការប្រកួតប្រជែងដ៏លំបាក ដែលមានបេក្ខជន ១២០០នាក់ បានដាក់ពាក្យប្រលងប្រជែងនៅកម្ពុជា និងបេក្ខជននៃ បណ្ដាប្រទេសផ្សេងទៀតផងដែរ។ ឮ
ឯកអគ្គរាជទូតជប៉ុនប្រចាំនៅកម្ពុជា បាននិយាយលើកទឹកចិត្ត ឲ្យនិស្សិតជាប់ជយលាភីខិតខំប្រឹងប្រែងសិក្សា ដើម្បីក្លាយជាសសរទ្រូង អភិវឌ្ឍប្រទេសកម្ពុជា និងជាស្ពានរឹងមាំ នៃមិត្តភាព រវាងកម្ពុជា និងជប៉ុន។
នាក្នុងកម្មវិធីអបអរសាទរនោះ ឯកឧត្ដម ពិត ចំណាន រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា ប្រទេសជប៉ុនបានដើរតួនាទីសំខាន់ ក្នុងការជួយដល់បណ្ដាប្រទេសកំពុងអភិវឌ្ឍនានា ពិសេសកម្ពុជា ដូចជាជំនួយលើ ហេដ្ឋារចនាសម្ព័ន្ធ និងការបណ្ដុះបណ្ដាលធនធានមនុស្ស ជាដើម។ ដូចនេះលោក អំពាវនាវឲ្យនិស្សិតជាប់អាហារូបករណ៍ទាំងអស់ ខិតខំប្រឹងប្រែងរៀនសូត្រ និងត្រឡប់មកវិញដោយភាពជោគជ័យ។
យុវជន អ៊ុក សុខខេន ជានិស្សិតម្នាក់ក្នុងចំណោម ជយលាភីអាហារូបករណ៍ជប៉ុនទាំង២៦នាក់ នឹងទៅសិក្សាផ្នែកស្រាវជ្រាវ នៅសាកលវិទ្យាល័យ Hitotsubashi នៅក្នុងទីក្រុងតូក្យូប្រទេសជប៉ុន។
និស្សិត បញ្ចប់ការសិក្សាមកពីវិទ្យាស្ថានភាសាបរទេស ដេប៉ាតឺម៉ង់ភាសាជប៉ុន ឆ្នាំ២០១៥ រូបនេះ បានឲ្យដឹងថា ខ្លួននឹងខិតខំក្រេបយកចំណេះវិជ្ជាដោយចិត្តទុកដាក់ពីប្រទេសជប៉ុន ដើម្បីមកជួយអភិវឌ្ឍជាតិមាតុភូមិរបស់ខ្លួន។
ជាសារដល់យុវជនជំនាន់ក្រោយ ដែលមានចិត្តចង់ប្រលងអាហារូបករណ៍ជប៉ុន យុវជនសម្បុរស្រអែមរូបនេះ បានលើកឡើងថា ការប្រលងរៀបចំដោយក្រសួងអប់រំ និងស្ថានទូតជប៉ុនមិនមានភាពងាយស្រួលនោះទេ ព្រោះមានទាំងវិញ្ញាសាសរសេរជាភាសាអង់គ្លេស និងភាសាជប៉ុន។ ប៉ុន្តែក៏មិនពិបាកនោះដែរ ប្រសិនបើ យុវជនដាក់ចិត្តរៀនសូត្រឲ្យបានច្រើន ព្រមទាំងសិក្សាស្វែងយល់ពីប្រទេសដែលខ្លួនចង់ទៅ តួយ៉ាងប្រទេសជប៉ុននោះតែម្ដង។ ដូច្នេះ អ្នកមានចំណាប់អារម្មណ៍ដាក់អាហារូបករណ៍គប្បីស្វែងយល់ និងយកចិត្តទុកដាក់លើចំណុចនោះឲ្យបានច្រើន នឹងទទួលបានលទ្ធផលជាវិជ្ជមាន៕