លម្អិតប្រវត្តិរបស់ Rain មុនមកធ្វើការប្រគំតន្ត្រីនៅកម្ពុជា
- 2017-03-27 23:10:00
- ចំនួនមតិ 0 | ចំនួនចែករំលែក 0
លម្អិតប្រវត្តិរបស់ Rain មុនមកធ្វើការប្រគំតន្ត្រីនៅកម្ពុជា
ចន្លោះមិនឃើញ
តារាចម្រៀងកូរ៉េល្បី Rain នឹងមកការប្រគំតន្ត្រីនៅកម្ពុជានៅថ្ងៃទី ៣០ ខែ មីនាខាងមុខនេះ។ ព័ត៌មាននេះបានធ្វើឲ្យប្រជាជននៅកម្ពុជាដែលជាអ្នកគាំទ្ររបស់ Rain រំភើបឥតឧបមា។ យ៉ាងណាមិញ មុនតារាជួរមុខកូរ៉េរូបនេះ មកដល់ប្រទេសកម្ពុជា សូមមើលប្រវត្តិរូបរបស់គេសិន។
ប្រវត្តិផ្ទាល់ខ្លួន
Rain មានឈ្មោះពិតប្រាកដជាភាសាកូរ៉េ Jung Ji-hoon កើតនៅឆ្នាំ១៩៨២ រាប់តាមចំនួនលេខមានអាយុ៣៤ឆ្នាំ។ មានអាជីពជាតារាចម្រៀង សម្ដែង និពន្ធចម្រៀងនិងអ្នកដឹកនាំចម្រៀង។ Jung Ji បានបាត់បង់ម្ដាយនៅខែ ធ្នូ ឆ្នាំ ២០០០ ដោយសារកើតជំងឺទឹកនោមផ្អែម។ តែនៅក្នុងឆ្នាំដ៏សោកសៅ Rain ក៏មានដំណឹងល្អបានក្លាយជាអ្នកហ្វឹកហាត់នៅផលិតកម្ម JYP ដោយមានការដឹកនាំដោយលោក Park Jin-young។ អំឡុងពេលហ្វឹកហាត់ Rain បានក្លាយត្រឹមជាអ្នករាំនៅពីក្រោយគេប៉ុណ្ណោះ។
ជីវិតក្នុងអាជីពចម្រៀង
គ្រាអាយុ១៦ឆ្នាំម្ចាស់បទ "LA SONG” រូបនេះផ្ដើមចាប់អាជីពចម្រៀងជាមួយក្រុម Fanclub ក្នុងឆ្នាំ១៩៩៨-២០០០។ តែក្រុមនេះមិនសូវមានប្រជាប្រិយភាពខ្លាំងក្លាទេ ពោលចេញ បានតែ២អាល់ប៊ុម។ លុះក្រោយមកក្នុងឆ្នាំ២០០២-២០០៦ Jung ចាប់ផ្ដើមបង្ហាញមុខដំបូងជាតារាចម្រៀងទោល ដោយចេញអាល់ប៊ុមដំបូងចំណងជើងថា Bad Guy។ វេលានោះហើយជាពេលដែលគេណែនាំខ្លួនឯងឲ្យគ្រប់គ្នាស្គាល់ឈ្មោះលើឆាករបស់គេជា "Rain”។
Rain បានចេញអាល់ប៊ុមជាភាសាជប៉ុនដំបូងចំណងជើងថា Eternal Rain ក្នុងឆ្នាំ២០០៦។ គេបានធ្វើការប្រគំតន្ត្រីនៅជប៉ុនដំបូងឈ្មោះថា Rainy Day Japan សំបុត្របានលក់អស់ត្រឹម៣០វិនាទី បន្ទាប់ពីដាក់លក់។ ឆ្នាំ២០០៦ដដែល Rain ត្រូវបានទស្សនាវដ្ដីអាមេរិក Time ចុះក្នុងបញ្ជីមនុស្សមានឥទ្ធិពលម្នាក់ ""100 Most Influential People Who Shape Our World"។ ចាប់ពេលនោះមកកេរ្តិ៍ឈ្មោះរបស់កាន់តែល្បីៗខ្លាំងឡើងៗក្នុងអាស៊ី។
អាជីពការសម្ដែង
Rain ចូលសម្ដែងក្នុងរឿងភាគទូរទស្សន៍លើកទី១ក្នុងរឿង “Sang Doo! Let's Go To School” ក្នុងឆ្នាំ២០០៣។ រឿងនេះទទួលបានការគាំទ្រខ្លាំង នាំឲ្យ Rain ឈ្នះពាន "Most Popular TV Actor” ឆ្នាំ២០០៤ ក្នុងកម្មវិធី Baeksang Arts Awards។ ភាពល្បីល្បាញរបស់តារាភ្នែកតូចនេះកាន់តែបន្ត ពេលដែលរូបគេសម្ដែងក្នុងរឿងស្នេហា “Full House” ជាតួ លី យ៉ុងជេ។ ២០០៦ ជាឆ្នាំល្អបំផុត Rain បានសម្ដែងភាពយន្តដំបូងក្នុងរឿង “I'm a Cyborg, But That's OK”។ រឿងនេះបានទទួលពាន Alfred Bauer Award លើកទី៥៧ក្នុងកម្មវិធីមហោស្រពភាពយន្ត Berlin International Film Festival ។
២០០៨ Jung Ji-hoon បានឈានជើងក្នុងហូលីវូដ ដោយសម្ដែងក្នុងរឿង " Speed Racer”។ ក្រោយមកក៏មានឱកាសសម្ដែងក្នុងតួឯក Raizo ក្នុងរឿង " Ninja Assassin” ឆ្នាំ២០០៩។ ងាកទៅក្រោយបន្តិចនាឆ្នាំ២០០៧ Rain បានប្រកាសថា លោកបានចាកចេញពីផលិតកម្ម JYP ដើម្បីបង្កើតផលិតកម្មផ្ទាល់ខ្លួនឈ្មោះថា J. Tune Entertainment ។ J. Tune Entertainment ជាអ្នក Dubute ក្រុម MBLAQ ឆ្នាំ២០០៩។
ជីវិតចូលបម្រើទ័ព
Rain បានបំពេញកាតព្វកិច្ច ជាយោធា ចាប់ពីខែតុលា ឆ្នាំ ២០១១ រហូតដល់ខែកក្កដា ឆ្នាំ ២០១៣។ នៅក្នុងឆ្នាំ ២០១៣នោះដែរ លោកបានទទួលស្គាល់ថា លោកមានទំនាក់ទំនងជាមួយតារាសម្ដែងស្រីដ៏ល្បីឈ្មោះ Kim Tae Hee។ ហើយកាលពីថ្ងៃទី ១៩ ខែមករា ឆ្នាំ ២០១៧កន្លងទៅថ្មីៗនេះ គូស្នេហ៍ទាំងពីរបានរៀបអាពាហ៍ពិពាហ៍ជាមួយគ្នា បន្ទាប់ពីទាក់ទងគ្នាអស់រយៈពេល៥ឆ្នាំ៕