ស៊ាន ម៉ូនីតា ចែករំលែក៤ចំណុច ជាបទពិសោធប្រលងជាប់អាហារូបករណ៍ជប៉ុន

2017-03-28 06:11:58
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតី ស៊ាន ម៉ូនីតា អតីតសិស្សនៅវិទ្យាល័យ សម្ដេចតេជោ ហ៊ុនសែនសួង កន្លងទៅថ្មីៗនេះបានប្រលងប្រជែងជាមួយនិស្សិតជាង១ពាន់នាក់រហូតជាប់អាហារូបករណ៍ក្រសួងអប់រំ ជប៉ុន( MEXT ឬ Monbukagakusho Scholarship )ទៅសិក្សាផ្នែកស្ថាបត្យកម្មនៅប្រទេសជប៉ុន បានចែករំលែកពីគន្លឹះមួយចំនួន ជាបទពិសោធរបស់ កញ្ញាផ្ទាល់ទៅដល់អ្នកដែលមានចំណាប់អារម្មណ៍ចង់ប្រលងយកអាហារូបករណ៍ខាងលើ។

រៀបចំគោលដៅ៖

"ត្រូវដឹងពីខ្លួនឯង ថាចង់សម្រេចគោលដៅអ្វីខ្លះ"។ នេះជាសម្ដីរបស់ ម្ចាស់មេដាយមាសគណិតវិទ្យាឆ្នាំ២០១៦ខាងលើបាននិយាយ។ យុវតីរូបនេះបានលើកឡើងថា ជាមួយគោលបំណងច្បាស់លាស់ គឺធ្វើឲ្យនាងផ្ដោតសំខាន់លើសកម្មភាពសិក្សាប្រចាំថ្ងៃរបស់ខ្លួនចំទិសដៅ និងសម្រេចក្ដីបំណងបានដោយជោគជ័យ។ កញ្ញាក៏បានលើកឡើង ពីឧទាហរណ៍របស់ខ្លួនដែលនាងសម្រេចបាន ដូចជាក្លាយសិស្សពូកែមួយផ្នែកគណិតវិទ្យាមួយរូប ជាសិស្សទទួលបាននិទ្ទេសA និងប្រលងជាប់អាហារូបករណ៍ជប៉ុន ហើយជាលទ្ធផលនាងសម្រេចការបំណងប្រាថ្នាទាំងនោះ។

សរសេរសកម្មភាពដែលខ្លួនត្រូវធ្វើ៖

ម៉ូនីតាបានប្រាប់ថា បន្ទាប់ពីមានគោលដៅច្បាស់លាស់ហើយ ត្រូវលៃលកពីពេលវេលាសម្រាប់មុខវិជ្ជាសំខាន់ៗសម្រាប់ការប្រលង។ សិស្សនិទ្ទេស A ឆ្នាំ២០១៦រូបនេះ ក៏បន្ថែមថា ចំពោះសកម្មភាពរៀនទាំងនោះ គឺប្រឹងប្រែងរៀនឲ្យបានច្បាស់លាស់លើមុខវិជ្ជានីមួយៗ សម្រាប់មុខវិជ្ជាសំខាន់គឺត្រូវប្រឹងខ្លាំងជាងគេលើមុខវិជ្ជាទាំងនោះ។

ទំនាក់ទំនងសិស្សច្បងមុនៗ ៖

កញ្ញាម៉ូនីតា ដែលមានក្ដីស្រមៃចង់ទៅរៀននៅប្រទេសជប៉ុនតាំងនៅតូច បានប្រាប់ថា ទំនាក់ទំនងល្អជាមួយរៀមច្បងដែលបានជាប់អាហារូបករណ៍ពីមុនៗ ពិតជាមានសារសំខាន់។ កញ្ញាបានប្រាប់ថា កញ្ញាទទួលបានព័ត៌មានជាច្រើនពីសិស្សច្បង។ តាមរយៈទំនាក់ទំនងនេះ កញ្ញាដឹងមុនថាតើ របៀបរបបប្រលងយកអាហារូបករណ៍នោះយ៉ាងណា? និងការសម្ភាសជាដើម។ ជាមួយទំនាក់ទំនងល្អនោះ ម៉ូនីតាបានប្រាប់ថា នាងក៏ទទួលបានវិញ្ញាសាចាស់ៗពីរៀមច្បងផងដែរសម្រាប់រៀនត្រៀមផងដែរ។

ប្រឹងប្រែងអស់ពីសមត្ថភាព៖

ចំណុចនេះ យុវតីដែលមកពីខេត្តត្បូងឃ្មុំ រូបនេះបានប្រាប់ថា រាល់ពេលប្រលងប្រកួតប្រជែងផ្សេងៗ តាមបទពិសោធរបស់នាង គឺតែងតែប្រឹងប្រែងឲ្យអស់ពីសមត្ថភាព ដូចនេះបើទោះជាធ្លាក់ គប្បីគិតតាមបែបវិជ្ជមាន គឺត្រូវប្រឹងប្រែងបន្តទៀត រហូតសម្រេចក្ដីស្រមៃរបស់ខ្លួន។

គួររំលឹកដែរ ថា យុវតី សៀន ម៉ូនីតា គឺជាសិស្សពូកែមេដាយមាសផ្នែកគណិតវិទ្យា ព្រមទាំងជាសិស្សនិទ្ទេស A ឆ្នាំ២០១៦។ ក្រោយប្រលងបាក់ឌុបបានលំដាប់ពិន្ទុខ្ពស់ នាងបានជាប់អាហារូបករណ៍ក្នុងស្រុកពីរគឺ អាហារូបករណ៍រៀននៅវិទ្យាស្ថានបច្ចេកវិទ្យាកម្ពុជា(ITC) និងអាហារូបករណ៍១០០% នៅសាកលវិទ្យាល័យ ZAMAN។

ម៉ូនីតា បានជ្រើសរើសទៅសិក្សាជំនាញវិស្វកម្មស្ថាបត្យកម្មនៅសាកលវិទ្យាល័យ ZAMAN ហើយបន្ទាប់មកនាងក៏បានជាប់អាហារូបករណ៍របស់ក្រសួងអប់រំជប៉ុន MEXT ឬ Monbukagakusho Scholarship ឆ្នាំសិក្សា២០១៧ ជំនាញស្ថាបត្យកម្ម ហើយកញ្ញានឹងចេញដំណើរ ទៅសិក្សានៅប្រទេសជប៉ុននាដើមខែមេសាខាងមុខនេះ៕

អត្ថបទ៖ មាន រតនា