សរុបចចាមអារ៉ាមពី Galaxy S8 ចេញយប់ស្អែក
- 2017-03-28 09:06:52
- ចំនួនមតិ 0 | ចំនួនចែករំលែក 0
សរុបចចាមអារ៉ាមពី Galaxy S8 ចេញយប់ស្អែក
ចន្លោះមិនឃើញ
Samsung នឹងប្រកាសចេញ Galaxy S8/S8+ នៅយប់ស្អែកនេះ ហើយមុននឹងការប្រកាសនេះមកដល់ក៏មានពាក្យចចាមអារ៉ាមបែកធ្លាយជាច្រើនឲ្យដឹងខ្លះៗពីចំណុចពិសេសរបស់ស្មាតហ្វូនជំនាន់ថ្មីនេះ។
@ ការរចនា
រូបរាង Galaxy S8/S8+ អាចមិនខុសគ្នាពី Galaxy S7/S7 Edge ឡើយ ប៉ុន្តែវានឹងមានផ្ទៃអេក្រង់ទូលាយជាងមុន ដោយមានគែមអេក្រង់តិចតួចប៉ុណ្ណោះ។ ចំពោះប៊ូតុង Home ដែលអាចចុចបាននឹងលែងមានដោយជំនួសមកវិញនូវប៊ូតុង Home បង្កប់លើផ្ទៃអេក្រង់ផ្ទាល់។ មុខងារស្កេនក្រយៅដៃត្រូវបានផ្លាស់ទីទៅផ្នែកខាងក្រោយនៅក្បែរកាមេរ៉ាវិញ។ ពណ៌វិញមាន ៧ ជម្រើសរួមមានពណ៌មាស, ខ្មៅរលោង, ខ្មៅងងឹត, ខៀវ, ស្វាយ, ផ្កាឈូក និង ពណ៌ប្រាក់។
@ អេក្រង់
ទាំង Galaxy S8 និង S8+ នឹងសុទ្ធតែមានអេក្រង់រាងកោង ថែមមានផ្ទៃអេក្រង់ធំជាងមុនដោយ S8 ទំហំ ៥,៨ អ៊ីញ និង S8+ ទំហំ ៦,២ អ៊ីញ។ ត្បិតថាអេក្រង់ទំហំធំជាង Galaxy S7/S7 Edge ប៉ុន្តែតួខ្លួនវានឹងមិនខុសគ្នាប៉ុន្មានឡើយព្រោះថា S8/S8+ ស្ទើរតែគ្មានគែមអេក្រង់ទៅហើយ។
@ កាមេរ៉ា
Galaxy S8/S8+ នឹងមានបំពាក់កាមេរ៉ាដូចគ្នាដោយកាមេរ៉ាមុខកម្រិត ៨ MP និង កាមេរ៉ាក្រោយកម្រិត ១២ MP។ គេរំពឹងថាកាមេរ៉ាខាងមុខនឹងមានបំពាក់មុខងារ Focus បានលឿនដូចដែលមានលើកាមេរ៉ាខាងក្រោយរបស់ Galaxy S7 ហើយកាមេរ៉ាខាងក្រោយរបស់ S8 ក៏រំពឹងថាអាចចាប់យករូបភាពបានដល់ ១០០០ ប្លង់ក្នុងមួយវិនាទី។
@ ម៉ាស៊ីន
Galaxy S8/S8+ ដែលលក់នៅទីផ្សារសហរដ្ឋអាមេរិក, ជប៉ុន និង ចិន នឹងប្រើបន្ទះឈីប Snapdragon 835 ឯប្រភេទដែលលក់នៅទីផ្សារអាស៊ី និង អឺរ៉ុប នឹងប្រើបន្ទះឈីប Exynos 8895។ ចំពោះ RAM វិញ ម៉ូដែលដែលលក់ក្នុងទីផ្សារភាគច្រើនមានទំហំ 4 GB ចំណែកឯម៉ូដែលលក់នៅទីផ្សារកូរ៉េខាងត្បូង និង ចិន នឹងមានទំហំដល់ 6 GB។
@ ថាមពលថ្ម
Galaxy S8 នៅតែមានថ្មទំហំ 3000 mAh ដូច Galaxy S7 ប៉ុន្តែ S8+ វិញមានទំហំថ្ម 3500 mAh តូចជាង S7 Edge ដែលមានទំហំ 3600 mAh។ យ៉ាងណាក្ដីជាមួយនឹងបន្ទះឈីបរួមទាំងប្រព័ន្ធប្រតិបត្តិការថ្មីគេរំពឹងថា S8/S8+ នឹងអាចប្រើបានយូរជាងមុន។
@ មុខងារពិសេសដទៃ
មុខងារពិសេសដែលរំពឹងនឹងឃើញលើ S8/S8+ រួមមានបច្ចេកវិទ្យាចំណាំផ្ទៃមុខ, បច្ចេកវិទ្យាស្កេនប្រស្រីភ្នែក, អាចធន់នឹងទឹកកម្រិត IP68, រន្ធបំពងសំឡេងបែប Stereo និង អាចប្រើជា Desktop Mode ជាដើម។
@ តម្លៃ និង កាលបរិច្ឆេទចេញលក់
ដំណឹងចុងក្រោយបំផុតពីតម្លៃ S8 នៅទីផ្សារអឺរ៉ុប និង ចិន គឺប្រហែល ៨៥០ ដុល្លារ និង Galaxy S8+ តម្លៃប្រហែល ៩៧៥ ដុល្លារ។ ដោយឡែកការកុម្ម៉ង់ទិញនៅទីផ្សារមួយចំនួនអាចចាប់ផ្ដើមពីថ្ងៃទី ១០ ខែមេសា ហើយការចេញលក់វិញអាចចាប់ផ្ដើមពីថ្ងៃទី ២១ ខែមេសា។ សម្រាប់ប្រទេសកាណាដាការចេញលក់ផ្លូវការអាចអូសបន្លាយដល់ថ្ងៃទី ២៨ ខែមេសា៕