អង្គភាពប្រឆាំងអំពើពុករលួយ៖ មន្ដ្រីតែងតាំងថ្មី មកប្រកាសទ្រព្យសម្បត្តិមានចំនួន៣៥៧នាក់

2017-03-29 01:38:44
ចំនួនមតិ 0 | ចំនួនចែករំលែក 0

ចន្លោះមិនឃើញ

(ភ្នំពេញ) ៖ អង្គភាពប្រឆាំងអំពើពុករលួយ( ACU) បានបញ្ជាក់ឱ្យដឹងថានាខែមីនាឆ្នាំ២០១៧នេះមានមន្ដ្រីតែងតាំងថ្មី មកប្រកាសទ្រព្យសម្បត្ដិនិងបំណុល សរុបមានចំនួន៣៥៧ នាក់ ។

យោងតាមសេចក្ដីជូនដំណឹង របស់ក្រឹមប្រឹក្សាជាតិប្រឆាំងអំពើពុករលួយដែលបានបើកកិច្ចប្រជុំកាលពីរសៀលថ្ងៃទី២៧ ខែមីនាឆ្នាំ២០១៧ បានឲ្យដឹងថា មន្ដ្រីតែងតាំងថ្មីដែលបានចូលខ្លួនមកប្រកាសទ្រព្យសម្បត្ដិនិងបំណុល នៅក្នុងខែមីនានេះគឺមានចំនួន៣៥៧នាក់។ មន្ដ្រីប្រកាសក្រោយលាឈប់ ឬចប់អាណត្តិ មកប្រកាសទ្រព្យសម្បត្ដិនិងបំណុល៥០នាក់ និងមន្ដ្រីចូលនិវត្ដន៍មកប្រកាសទ្រព្យសម្បត្តិនិងបំណុល៧៨នាក់។

ក្នុងសេចក្ដីជូនដំណឹងដដែលនេះបានឱ្យដឹងផងថាក្នុងខែមីនានេះដែរអង្គភាពប្រឆាំងអំពើពុករលួយបានទទួលពាក្យប្ដឹងចំនួន៤៥ពាក្យ “អនាមិក២២ពាក្យ ស្មើនឹង៤៩ ភាគរយ” បានបើកបន្ទប់ស្ដាប់ចម្លើយ៣៤លើក និងបានធ្វើលិខិតព្រមានដល់មន្ដ្រីចំនួន ៦រូប។

ប្រភពនេះបានបញ្ជាក់បន្ថែមថាក្រៅពីសង្កេតការណ៍ការប្រឡងនិងការធ្វើកោសលក្យវិច័យ អង្គភាពប្រឆាំងអំពើពុករលួយ បានប្រតិបត្តិការលើករណីមួយចំនួនដូចជាករណីមន្ត្រីសាលារាជធានីភ្នំពេញករណីមានមន្ត្រីនគរបាលសេដ្ឋកិច្ច ករណីមន្ត្រីតុលាការខេត្តបន្ទាយជ័យជាដើម។ក្រៅពីនេះអង្គភាពប្រឆាំងអំពើពុករលួយក៏កំពុងបន្តចាត់វិធានការអំពីករណីមួយចំនួនទៀតផងដែរ។

ជុំវិញកិច្ចការក្នុងខែមីនានេះអង្គភាពប្រឆាំងអំពើពុករលួយក៏នៅបានបន្តបើកកិច្ចពិគ្រោះពិភាក្សាលើសេចក្តីព្រាងច្បាប់ស្តីការការពារសាក្សី និងបុគ្គលរាយការណ៍និងបើកវគ្គបណ្តុះបណ្តាលបន្តស្តីពីការលាងសម្អាតប្រាក់ និងហិរញ្ញប្បទានភេរវកម្ម ដល់មន្ត្រី អង្គភាពប្រឆាំងអំពើពុករលួយនិងមន្ត្រីក្រសួងពាក់ព័ន្ធផ្សេងៗជាច្រើនទៀត៕