Facebook បញ្ចេញមុខងារថ្មី ៣ ចម្លងគេទាំង ៣ តែម្តង
- 2017-03-29 02:03:44
- ចំនួនមតិ 0 | ចំនួនចែករំលែក 0
Facebook បញ្ចេញមុខងារថ្មី ៣ ចម្លងគេទាំង ៣ តែម្តង
ចន្លោះមិនឃើញ
កាលពីម្សិលមិញនេះ Facebook បានធ្វើការអាប់ដេតដើម្បីបន្ថែមមុខងារថ្មីចំនួនបីដែលមុខងារទាំង បីតាមពិតទៅចម្លងតាមកម្មវិធីកម្សាន្ត Snapchat។
@Facebook Camera Effects ចម្លងតាម Snapchat Filters
មុខងារទីមួយគឺ Camera Effect ដែលអ្នកប្រើប្រាស់អាចដាក់ម៉ាស់មុខ, ស៊ុម និង Filter មានចលនាទៅលើរូបថតរបស់ខ្លួនបាន។ Effect ប្លែកដែលបានបន្ថែមនេះតាមពិតជាចំណុចស្នូលដ៏សំខាន់មួយដែលមានលើ Snapchat យូរមកហើយ ដោយវាជាចំណុចមួយធ្វើឲ្យយុវវ័យប្រើ Snapchat។
@Facebook Direct ចម្លងតាម Snapchat Snaps
មុខងារថ្មីមួយទៀតគឺ Facebook Direct ដែលអនុញ្ញាតឲ្យអ្នកប្រើប្រាស់ចែករំលែករូបភាព ឬ វីដេអូ របស់ខ្លួនជាមួយមិត្តភ័ក្ដិ ដែលរូបភាព និង វីដេអូនឹងរលាយបាត់ក្នុងពេល ២៤ ម៉ោង។ នេះក៏ជាមុខងារដែលជួយឲ្យ Snapchat ទទួលបានការពេញនិយមខ្លាំង។
@Facebook Stories ចម្លងតាម Snapchat Stories
តាំងពីខែសីហាឆ្នាំមុន Facebook បានបញ្ចូលមុខងារ Stories ទៅលើកម្មវិធី Instagram ដោយអ្នកប្រើប្រាស់អាចប្រើវាដើម្បីបង្ហោះរូបភាព ឬ វីដេអូដែលនឹងបាត់ទៅវិញក្នុងពេល ២៤ ម៉ោង ហើយមុខងារថ្មីនេះក៏ទើបបានបញ្ចូលលើ Facebook កាលពីម្សិលមិញផងដែរ។ មុខងារ Stories នេះដែរមានប្រើលើ Snapchat តាំងពីឆ្នាំ ២០១៤ មកម្ល៉េះ។
Connor Hayes អ្នកគ្រប់គ្រង់ផលិតផលប្រចាំក្រុមហ៊ុន Facebook បានលើកឡើងអំឡុងសន្និសីទកាសែតកាលពីថ្ងៃចន្ទថា ៖ «មែនហើយ! នេះជាអ្វីដែល Snapchat បានធ្វើមុនគេបង្អស់។ ពួកយើងយល់ថាពួកគេ (Snapchat) ធ្វើបានល្អក្នុងការបង្កើតមុខងារ Stories ដោយវាជាវិធីមួយធ្វើឲ្យអ្នកប្រើប្រាស់ពិតជាចង់ចែករំលែករូបភាព ឬ វីដេអូក្នុងកម្មវិធីទំនាក់ទំនងសង្គម»៕