បែកធ្លាយព័ត៌មាន ហ្វៃ សំអាង លាឈប់ពីទូរទស្សន៍អប្សរាហើយ!

2017-03-29 02:09:07
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហ្វៃ សំអាង ដែលគេដឹងថាជាអ្នកផលិត និងគ្រប់គ្រងកម្មវិធីសិល្បៈកម្សាន្តដ៏ល្បីឈ្មោះនោះ ពេលនេះមានព័ត៌មានបែកធ្លាយមកថា លោកបានលាឈប់ពីទូរទស្សន៍អប្សរា ដែលលោកបានបម្រើការអស់ពេលជាច្រើនឆ្នាំនោះហើយ។

ប្រភពដែលសុំមិនបញ្ចេញឈ្មោះស្ថិតរង្វង់ក្រុមការងារទូរទស្សន៍ក្នុងស្រុកមួយនេះ បានបង្ហើបពីបញ្ហាខាងលើប្រាប់ Sabay ដោយរូបគេបញ្ជាក់ថា លោក ហ្វៃ សំអាង ដែលជាអ្នកផលិត និងគ្រប់គ្រងកម្មវិធីសិល្បៈទាំងអស់របស់អប្សរា បានលាឈប់ពីតួនាទីរបស់ទូរទស្សន៍បាត់ហើយ គឺតាំងពីខែកុម្ភៈម្ល៉េះ។ ប៉ុន្តែយ៉ាងណា គេមិនដឹងថា មានហេតុផលអ្វីខ្លះដែលនាំឲ្យលោកលាឈប់ឡើយ។

ក្រៅពីនេះ គេក៏មិនទាន់ដឹងថា ពេលលាឈប់ហើយ បុគ្គលមានឥទ្ធិពលក្នុងសង្គមសិល្បៈរូបនេះ នឹងទៅបន្តការងារនៅទីណានៅឡើយដែរ។ បើទោះយ៉ាងនេះក្ដី ប្រភពមួយផ្សេងទៀតចេញពីទូរទស្សន៍ Nice TV ដែលជាទូរទស្សន៍កូនពៅទើបនឹងកើតនេះ ប្រាប់ថា បានឃើញលោក ហ្វៃ សំអាង ចេញចូលស្ថានីយរបស់គេ។ ប៉ុន្តែក៏មិនដឹងថា លោកមកក្នុងគោលបំណងអ្វីពិតប្រាកដដែរ។

ជុំវិញបញ្ហាខាងលើនេះ លោក ហ្វៃ សំអាង បានឆ្លើយប្រាប់អ្នកយកព័ត៌មានយើងថា លោកពិតជាបានលាឈប់ពីការងារនៅទូរទស្សន៍អប្សរាពិតមែន គឺដោយសារមានធុរៈផ្ទាល់ខ្លួន មិនមែនមកពីបញ្ហាអ្វីផ្សេងទេ។ "បងឈប់មែនប្អូន គឺឈប់កាលពីចុងខែកុម្ភៈនេះទេ ដោយសារបងមានធុរៈផ្ទាល់ខ្លួន!”។

ដោយឡែកពាក់ព័ន្ធនឹងទូរទស្សន៍ Nice TV វិញលោកថា ក្រោយពីដឹងថា លោកឈប់ពីទូរទស្សន៍អប្សរា មានទូរទស្សន៍ក្នុងស្រុក២-៣ បានទាក់ទងលោក ក្នុងនោះក៏មានទូរទស្សន៍កូនពៅគេនេះដែរ។ ប៉ុន្តែយ៉ាងណា លោកមិនទាន់ទទួលខាងណាមួយនៅឡើយ ដោយសារតែលោកមានធុរៈចាំបាច់ផ្ទាល់ខ្លួនត្រូវធ្វើជាមុនសិន។

តាមការបញ្ជាក់របស់លោក ហ្វៃ សំអាង គឺថា មួយរយៈចុងក្រោយនេះ លោកមានភារកិច្ចត្រូវឡើងចុះប្រទេសអូស្ត្រាលីញឹកញាប់ទៅមើលការសិក្សារបស់កូនពីរនាក់ដែលកំពុងសិក្សានៅទីនោះ ធ្វើឲ្យប៉ះពាល់ដល់ការងារ។ ដូច្នេះហើយ លោកក៏សម្រេចចិត្តលាឈប់តែម្ដង តែមុននឹងលាឈប់ គឺលោកបានបញ្ចប់កម្មវិធីរបស់លោករួចរាល់ទាំងអស់ហើយ។

“កាលពីមុនគាត់រៀននៅ Hight School មិនសូវពិបាកទេ តែឆ្នាំនេះ គាត់រៀនមហាវិទ្យាល័យឆ្ងាយពីផ្ទះអីចឹងបាន ត្រូវឧស្សាហ៍ទៅមើលគាត់ណាប្អូន"។ លោក ហ្វៃ សំអាង មានកូនទាំងអស់ ៤នាក់ គឺកូនបងឈ្មោះ សំអាង ដួងចិត្ត កំពុងសិក្សាមហាវិទ្យាល័យពេទ្យនៅអូស្ត្រាលី រួមជាមួយកូនទី២ សំអាង ដួងសិទ្ធិ សិក្សានៅអូស្ត្រាលីដែរ និងត្រូវប្រឡងបាក់ឌុបឆ្នាំនេះ។

រូបភាព៖ ផ្ដល់ដោយលោក ហ្វៃ សំអាង

ដោយឡែកកូនពីរនាក់ទៀត ជាកូនភ្លោះស្រីមួយប្រុសមួយ កំពុងរស់នៅជាមួយលោកនៅស្រុកខ្មែរ។ ដោយសារកូនបងទាំងពីរនៅអូស្ត្រាលី ម្នាក់ត្រៀមប្រឡងបាក់ឌុប និងម្នាក់រៀននៅមហាវិទ្យាល័យឆ្ងាយពីផ្ទះទើបលោកចាំបាច់ត្រូវឡើងទៅមើលការខុសត្រូវពួកគេ ហើយក៏ជាហេតុដែលលោកត្រូវតែលាឈប់ពីការងារសិនដែរ។

លោក ហ្វៃ សំអាង បានចូលបម្រើការងារនៅទូរទស្សន៍អប្សរាក្នុងឆ្នាំ ២០១២ ប្រមាណ ៥ឆ្នាំមកនេះលោកបានបង្កើតកម្មវិធីសិល្បៈឲ្យទូរទស្សន៍នេះជាច្រើនមានដូចជា៖ កម្មវិធី "ផ្កាយរះក្នុងសួន" “តន្ត្រីពេជ្រ" “មេផ្ទះលេខ១" “អប្សរា Award” "ស្ពានលេខ១១" "ប្រស្នាតារា" "កំណប់អារម្មណ៍" និងកម្មវិធី "The Best Star"។

បើទោះលាឈប់ពីការងារគ្រានេះ អ្នកផលិតកម្មវិធីល្បីឈ្មោះខាងលើបញ្ជាក់ថា ក៏មិនចោលសិល្បៈរហូតដែរ ពោលគឺបន្ទាប់ពីរួចរាល់ការងារផ្ទាល់ខ្លួន លោកនឹងត្រឡប់មកវិញ និងនាំសមិទ្ធផលថ្មីមកបង្ហាញជូនផង៕

អត្ថបទ៖ ស៊ុនហួត