មន្រ្តីកាំកុងត្រូលខេត្តកំពង់ធំ រកឃើញទឹកក្រូច ចាហួយដូង មីកំប៉ុង ខូចគុណភាព លក់នៅផ្សារស្រយូវ
- 2017-03-29 07:17:23
- ចំនួនមតិ 0 | ចំនួនចែករំលែក 0
មន្រ្តីកាំកុងត្រូលខេត្តកំពង់ធំ រកឃើញទឹកក្រូច ចាហួយដូង មីកំប៉ុង ខូចគុណភាព លក់នៅផ្សារស្រយូវ
ចន្លោះមិនឃើញ
កំពង់ធំ ៖ មន្ត្រីសាខាកាំកុងត្រូលខេត្តកំពង់ធំ នៅព្រឹកថ្ងៃទី២៩ ខែមីនា ឆ្នាំ២០១៧នេះ បានសហការជាមួយមន្ទីរពាណិជ្ជកម្ម អាជ្ញាធរដែនដី បានបន្តចុះពិនិត្យ និងផ្សព្វផ្សាយ អំពីគុណភាព និងសុវត្ថិភាពម្ហូបអាហារ នៅក្នុងផ្សារស្រយូវ ស្ថិតនៅភូមិពុកយុក សង្កាត់ស្រយូវ ក្រុងស្ទឹងសែន ខេត្តកំពង់ធំ ដែលជាលទ្ធផលរកទឹកភេសជ្ជៈ មួយចំនួនខូចគុណភាព និងមីតុងយុំាខូចគុណភាព ។
មន្ត្រីកាំកុងត្រូលខេត្តកំពង់ធំ បានឲ្យដឹងថា «ដោយគិតពីសុវត្ថិភាពម្ហូបអាហារ សុខភាពប្រជាពលរដ្ឋ មន្ត្រីកាំកុងត្រូលខេត្ត បានយកចិត្តទុក្ខដាក់ មកពិនិត្យទំនិញនៅក្នុងផ្សារស្រយូវ ហើយបានរកឃើញផលិតផលមួយចំនួន ខូចគុណភាព ដូចជា ចាហួយដូង ម៉ាក Thanh Binh ចំនួន១០៨កញ្ចប់ ផលិតនៅប្រទេសវៀតណាមទឹកដោះគោ ម៉ាកAD ចំណុះ ១៣០ml ចំនួន៣៥ដប ចំណុះ២៥០ml ចំនួន ១៦ដប ផលិតនៅប្រទេសថៃ ទឹកដោះគោ ម៉ាក Wahaha ចំណុះ២៨០mlចំនួន២០ដប ផលិតនៅប្រទេសថៃ ភេសជ្ជៈប៉ូវកម្លាំង ម៉ាកConkia ចំណុះ២៧០ml ចំនួន១៥ដប ផលិតនៅប្រទេសកម្ពុជា ទឹកក្រូចម៉ាកកូកាកូឡា ចំណុះ៣០០ml ចំនួន៧ដប ផលិតនៅប្រទេសថៃ តែបៃតង ចំណុះ៣៥០ml ចំនួន១២ដប មីកំប៉ុងតុងយុំាម៉ាម៉ា ៥កំប៉ុង ផលិតនៅប្រទេសថៃ ទឹកក្រូចចម្រុះ ចំណុះ៦០០ml ចំនួន៤៥ដប ផលិតនៅប្រទេសកម្ពុជា ទឹកក្រូច ម៉ាកសុំារ៉ៃហ៍ ចំនួន៦៦កំប៉ុង ផលិតនៅប្រទេសកម្ពុជា ។សមត្ថកិច្ចជំនាញយើងបានធ្វើកំណត់ហេតុ ដកហូតយកទៅដុតកម្ទេចចោលផងដែរ»។
ឆ្លៀតឱកាសនោះដែរ ក្រុមការងារក៏បានចែកផ្សាយនូវ រូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ ឲ្យបានយល់ ដឹងអំពីផលវិបាកដែលបណ្ដាលមកពី ការបរិភោគអាហារហួសកាលបរិច្ឆេទ ប្រើប្រាស់និងការដាក់លាយបន្ថែម សារធាតុគីមី ហាមឃាត់ចូលក្នុងម្ហូបអាហារ។
ទន្ទឹមនឹងនេះ ក្រុមការងារបានធ្វើការណែនាំ ដល់អាជីវករឲ្យចៀសវាង ក្នុងការប្រើប្រាស់សារធាតុគីមីបន្ថែម ទៅលើផលិតផលម្ហូបអាហារ ឬការកែច្នៃម្ហូបអាហារ ដែលធ្វើឲ្យមានគ្រោះថ្នាក់ ដល់សុខភាព និងបានណែនាំ អាជីវករឲ្យយល់ដឹងពីអនាម័យ និងការរៀបចំទំនិញលក់ដូរ ឲ្យមានសណ្ដាប់ធ្នាប់ទៅ តាមប្រភេទទំនិញហូបចុក និងទំនិញប្រើប្រាស់ផ្សេងៗ ដាក់ដាច់ដោយ ឡែកៗពីគ្នា ចៀសវាងនូវការដាក់តាំងលក់ទំនិញហួស កាលបរិច្ឆេទប្រើប្រាស់ កំប៉ុងកំពិត ប៉ោង ច្រែះស៊ីស និងទំនិញដែលមានសារធាតុគីមីហាមឃាត់។
មន្ត្រីកាំកុងត្រូលសាខាខេត្តកំពង់ធំ បានបន្តថា ការធ្វើបែបនេះ គឺជាផ្នែកមួយយ៉ាងសំខាន់ ក្នុងការជួយកាត់បន្ថយផលប៉ះពាល់ ដល់អ្នកប្រើប្រាស់ និងប្រជាពលរដ្ឋយើង។ មន្ត្រីកាំកុងត្រូលបានឲ្យដឹងថា ក្រោមការណែនាំពីសំណាក់លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជាអគ្គនាយកកាំកុងត្រូល ក្រសួងពាណិជ្ជកម្ម សាខាកាំក្រុងត្រូលនៅទូទាំងប្រទេស បាននិងកំពុងបន្តយុទ្ធនាការ ចុះត្រួតពិនិត្យមើលទំនិញ ដែលដាក់តាំងលក់តាមផ្ទះ តាមទីផ្សារ ពិសេស ទំនិញនាំចូលតាមច្រកទ្វារអន្តរជាតិ ដើម្បីចូលរួមចំណែកលើការការពារ សុវត្ថិភាពចំណីអាហារដល់ប្រជាពលរដ្ឋ៕