ម្ចាស់យានយន្តទាំងអស់ មិនទាន់កាត់ឈ្មោះកម្មសិទ្ធិ នឹងត្រូវផាកពិន័យ
- 2017-03-29 10:33:53
- ចំនួនមតិ 0 | ចំនួនចែករំលែក 0
ម្ចាស់យានយន្តទាំងអស់ មិនទាន់កាត់ឈ្មោះកម្មសិទ្ធិ នឹងត្រូវផាកពិន័យ
ចន្លោះមិនឃើញ
គ្រប់ម្ចាស់យានយន្តទាំងអស់ ដែលមិនទាន់កាត់ឈ្មោះកម្មសិទ្ធិនឹងត្រូវផាកពិន័យ ហើយនឹងត្រូវបញ្ជូនទៅតុលាការ នាពេលខាងមុខនេះ។ នេះបើតាមការលើកឡើងរបស់ឯកឧត្ដម ឧត្ដមសេនីយ៍ឯក ហ៊ឹម យ៉ាន អគ្គស្នងការរងនគរបាលជាតិ នាថ្ងៃ ២៩ មីនា ២០១៧នេះ។
នៅក្នុងពិធីបើកវគ្គបំប៉នស្ដីពីបច្ចេកទេសត្រួតពិនិត្យរឹតបន្តឹងការបើកបរក្នុងស្ថានភាពស្រវឹង ការបើកបរល្មើសល្បឿនកំណត់ និងប្រព័ន្ធកត់ត្រាបទល្មើសចរាចរណ៍ ឧត្ដមសេនីយ៍ឯក ហ៊ឹម យ៉ាន បានបញ្ជាក់ថា ការផាកពិន័យបទល្មើសចរាចរណ៍គឺធ្វើទៅតាមស្លាកលេខយានយន្ត ហើយវិក្កយបត្រនឹងផ្ញើទៅតាមអាសយដ្ឋានស្លាកលេខយានយន្ត។ រាល់ម្ចាស់យានយន្តដែលមិនទាន់កាត់ឈ្មោះ ត្រូវយកលិខិតទិញ-លក់ នៅពេលមកទទួលការផាកពិន័យ ហើយតម្រូវឲ្យកាត់ឈ្មោះម្ចាស់យានយន្តបើមិនដូច្នោះទេ នឹងត្រូវរងការផាកពិន័យ ឬត្រូវបញ្ជូនទៅតុលាការលើការមិនកាត់ឈ្មោះនៅពេលមានច្បាប់អនុម័តពីអន្តរក្រសួង។
អគ្គស្នងការរងនគរបាលជាតិ ក៏បានបញ្ជាក់ថា រាល់ការអនុវត្តរឹតបន្តឹងបទល្មើសចរាចរណ៍ត្រូវបានអនុវត្តនៅតាមតំបន់ដើមទី និងចុងទី ហើយលោកក៏បានផ្ដាំផ្ញើដល់មន្ត្រីនគរបាលចរាចរណ៍ គោរពវិន័យរបស់នគរបាល និងត្រូវមានក្រមសីលធម៌ក្នុងការប្រាស័យទាក់ទងជាមួយប្រជាពលរដ្ឋ ព្រោះរាល់មន្ត្រីនគរបាលណាដែលប្រព្រឹត្តខុស នឹងត្រូវទទួលពិន័យកងកម្លាំង ឬត្រូវអនុវត្តទៅតាមច្បាប់តុលាការផងដែរ៕