មើល LiveStream សោះ តែហ្វេននៅខ្មែរបានកាន់ Galaxy S8/S8+ ឡើងពេញដៃ

2017-03-30 06:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទូរសព្ទជំនាន់ចុងក្រោយម៉ូឌែល Galaxy S8/S8+ បានប្រកាសចេញរូបរាងផ្លូវការ និងបញ្ចប់ពាក្យចចាមអារាមកន្លងមក។ អ្វីដែលពិសេសគឺហ្វេននៅកម្ពុជា និងអ្នកសារព័ត៌មានជាច្រើនរូប គ្រាន់តែអង្គុយមើលការផ្សាយផ្ទាល់ពីទីក្រុងញ៉ូវយ៉ក សហរដ្ឋអាមេរិកយប់មិញសោះ ប៉ុន្តែមានឱកាសបានកាន់និងប៉ះកំពូលទូរសព្ទនេះផ្ទាល់តែម្ដង។

ជាអ្នកគាំទ្រទូរសព្ទត្រកូល Galaxy និងជាអ្នកសារព័ត៌មានមួយរូប ដែលមានឱកាសបានចាប់កាន់ Galaxy S8/S8+ មុនដំបូងគេ បានរៀបរាប់ថា ទាំងអេក្រង់ S8 និង S8+ កាន់ទៅពេញដៃល្មម ទោះជាអេក្រង់របស់វាដល់ ៥.៨ និង ៦.២ អុីញក៏ដោយ តែស្រួលកាន់ដៃម្ខាង បើធៀបជាមួយ S7 និង S7 edge ដែលលោកកំពុងប្រើ។

ចំពោះបទពិសោធន៍របស់ Sabay ដែលបានចាប់កាន់កំពូលទូរសព្ទ S8 និង S8+ ក្នុងពេលដំណាលគ្នាដែរឃើញថា ការរចនារូបរាងទូរសព្ទទាំងពីរម៉ូឌែលនេះ ពិតជាយកចិត្តទុកដាក់មែនទែន អេក្រង់ជាមួយនឹងតួខ្លួនសុីគ្នាណាស់ ឯកាមេរ៉ាខាងក្រោយ មិនលៀនចេញក្រៅខ្លាំង មានភ្លើង Flash មួយគ្រាប់និងទ្រនាប់ស្កេនក្រយៅនៅជាមួយគ្នាទៀតផង។ ប៉ុន្តែក្រុមការងារនិងហ្វេនបានត្រឹមតែកាន់ប៉ុណ្ណោះ មិនអាចថតបាននោះទេ និងត្រូវរង់ចាំរហូតដល់អំឡុងពាក់កណ្ដាលខែមេសា ទើបអាចចាប់កាន់និងធ្វើបទបង្ហាញពីលក្ខណៈសម្បត្តិជូនលម្អិតបាន។

ចំណុចពិសេសៗលើ Galaxy S8/ S8+ មាន៖

ការរចនាប្លែកជាមួយអេក្រង់កោងសឹងតែគ្មានគែម។
មិនមានប៊ូតុង Home ប្រភេទគ្រាប់ចុច ជំនួសដោយប៊ូតុងសិប្បនិមិត្ត AI លេីអេក្រង់។
មានបច្ចេកវិទ្យាសុវត្ថិភាពស្កេនក្រយៅដៃ ស្កេនប្រស្រីភ្នែក និងស្កេនមុខ បន្ថែមពីលើមុខងារចុចលេខសំងាត់។
ផលិតក្រោមស្តង់ដារ IP 68 ដែលមិនជ្រាបទឹកជម្រៅកន្លះម៉ែត្ររយៈពេល ៣០ នាទី និងការពារការឆ្កូតពីលំអងធូលី។
Galaxy S8 មានអេក្រង់កោង ៥,៨ អ៊ីញ ថាមពលថ្មកម្រិត ៣០០០mAh និង Galaxy S8+ មានអេក្រង់កោង ៦,២ អ៊ីញ ថាមពលថ្ម ៣ ៥០០mAh។
ស្មាតហ្វូនទាំងពីរប្រើបន្ទះឈីបថ្មី Octa-core Qualcomm Snapdragon 835 និង Exynos 8895 ។
កាមេរ៉ាក្រោយ ១២ MP ភ្ជាប់បច្ចេកវិទ្យា Dual Pixel ផលិតរូបគុណភាពដូចកាមេរ៉ាប្រភេទ DSLR ហើយអាចថតវីដេអូ 4k និងកាមេរ៉ាមុខ ៨ MP។
ចេញលក់ចាប់ពីខែ ២១ មេសា ២០១៧ ជាមួយពណ៌ប្រាំជម្រើស៕