ចម្លែកមែន! ប្រកួតគ្នាផឹកទឹកដោះ និងឈាមគោ ៦ខែ ឲ្យធាត់បំផុត ដើម្បីទាក់ទាញមនុស្សស្រី
- 2017-03-30 02:02:32
- ចំនួនមតិ 0 | ចំនួនចែករំលែក 0
ចម្លែកមែន! ប្រកួតគ្នាផឹកទឹកដោះ និងឈាមគោ ៦ខែ ឲ្យធាត់បំផុត ដើម្បីទាក់ទាញមនុស្សស្រី
ចន្លោះមិនឃើញ
ក្រុមកុលសម្ព័ន្ធ នៅឯជ្រលងភ្នំដាច់ស្រយាលមួយ ក្នុងប្រទេសអេត្យូពី (Ethiopa) បានប្រកួតប្រជែងគ្នា ធ្វើយ៉ាងណាឲ្យខ្លួនធាត់ខ្លាំងតាមដែលអាចទៅបាន ក្នុងរយៈពេល៦ខែ។
រយៈពេលកន្លះឆ្នាំនេះ សមាជិកនៃក្រុមកុលសម្ព័ន្ធ Bodi នឹងមិនផឹកអ្វីទាំងអស់ ក្រៅពីទឹកដោះ និងឈាមសត្វគោស្រស់ ដើម្បីឡើងទម្ងន់។ ជាមួយគ្នានេះដែរ ពួកគេមិនត្រូវបានអនុញ្ញាតឲ្យរួមភេទ ឬ ចាកចេញពីខ្ទមរបស់ពួកគេឡើយ។
ជារៀងរាល់ព្រឹក ស្ត្រី ឬ ក្មេងស្រីបានយកទឹកដោះ និងឈាមគោ ដាក់នៅក្នុងចាន ឬបំពង់ឫស្សី ទៅឲ្យអ្នកប្រកួតទាំងនោះ។ បើទោះបីជាមិនមានរង្វាន់ សម្រាប់អ្នកឈ្នះ (ធាត់ជាងគេ) ប៉ុន្តែពួកគេនឹងទទួលបានមោទនភាព រួមទាំងទំហំចង្កេះធំ ដែលក្រុមកុលសម្ព័ន្ធទាំងនោះចាត់ទុកថា ជាភាពទាក់ទាញសម្រាប់ស្ត្រីក្នុងកុលសម្ព័ន្ធរបស់ពួកគេ។
គួរបញ្ជាក់ឲ្យដឹងថា ការប្រកួតនេះជាផ្នែកមួយ នៃពិធីបុណ្យ Ka'el ដែលបានប្រារព្ធធ្វើឡើង ដើម្បីអបអរ និងសម្គាល់ឆ្នាំថ្មី។
លោក Eric Lafforgue ជាអ្នកថតរូបនៅក្នុងការប្រកួតនេះ បាននិយាយថា «សត្វគោ គឺជាសត្វពិសិដ្ឋរបស់ក្រុមកុលសម្ព័ន្ធ Bodi ដូច្នេះពួកគេមិនសម្លាប់វាឡើយ។ គេប្រើលំពែង ឬពូថៅ ចោះរន្ធមួយតាមសរសៃឈាមគោដើម្បីបង្ហូរឈាម បន្ទាប់មកក៏យកដីឥដ្ឋមកបិទវិញ»។
លោក Eric បានបន្ថែមទៀតថា «ឈាមមួយចានដំបូង ត្រូវបានគេផឹកនៅពេលព្រះអាទិត្យរះ។ ពួកគេត្រូវផឹកវាឲ្យលឿន មុនពេលឈាមកក ប៉ុន្តែអ្នកខ្លះទ្រាំមិនបាន ហើយក៏ក្អួតចេញមកវិញ»៕