ឧកញ៉ាល្បីៗឈ្មោះក្នុងស្រុក រួមគ្នាជួយមូលនិធិសិល្បករចាស់ជរា

2017-03-30 03:24:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងគួរឲ្យភ្ញាក់ផ្អើលមួយ ឧកញ៉ាធំៗក្នុងស្រុកខ្មែរដែលមានឧកញ៉ា ហុង ពីវ ម្ចាស់បុរីពិភពថ្មី ឧកញ៉ា តែ ជាហួត ម្ចាស់បុរីប៉េងហួត ឧកញ៉ា លាង ឃុន និងឧកញ៉ា ជីព ម៉ុង ជាដើមបានបរិច្ចាគថវិការៀងខ្លួន ជួយមូលនិធិទ្រទ្រង់សិល្បករចាស់ៗ។ នេះបើតាមសមាគមសិល្បៈស្ម័គ្រចិត្តជួយសង្គម។

(រាប់ពីឆ្វេង) ទី១.ឧកញ៉ា ហុង ពីវ អគ្គនាយកក្រុមហ៊ុនបុរីពិភពថ្មី ទី២.ឧកញ៉ា សៀ រិទ្ធី អគ្គនាយកក្រុមហ៊ុន Oxley Worldwide Bridge (Cambodia) Co., Ltd ទី៣.ឧកញ៉ា លាង ឃុន អគ្គនាយកក្រុមហ៊ុន ខ្មែរប្រ៊ូវើរី លីមីធីត និងទី៤.ឧកញ៉ា ថៃ ជាហួត ប្រធានក្រុមហ៊ុនបុរី ប៉េងហួត

តាមលោក ហេង ឡុង ថ្នាក់ដឹកនាំសមាគមខាងលើ បានឲ្យដឹងថា ឧកញ៉ាទាំង៤រូបខាងលើមាន លោកឧកញ៉ា ហុង ពីវ អគ្គនាយកក្រុមហ៊ុនបុរី ពិភពថ្មី ចូលរួមវិភាគទាន ៥០.០០០$។ លោកឧកញ៉ា លាង ឃុន អគ្គនាយកក្រុមហ៊ុន ខ្មែរប្រ៊ូវើរី លីមីធីត ចូលរួម ៥០.០០០$ ដែរ។ លោកឧកញ៉ា ថៃ ជាហួត ប្រធានក្រុមហ៊ុនបុរី ប៉េងហួត ៣០.០០០$។

បន្តមកទៀត មានលោក លី យូ ប្រធានក្រុមហ៊ុន តិចសេង ២០.០០០$។ លោកឧកញ៉ា សៀ រិទ្ធី អគ្គនាយកក្រុមហ៊ុន Oxley Worldwide Bridge (Cambodia) Co., Ltd ៥.០០០$ រួមទាំងសម្ដេចនាយករដ្ឋមន្ត្រី ហ៊ុន សែន និងលោកជំទាវ ក៏បានចូលរួមវិភាគទាន ៥០.០០០$ ថែមទៀត។

ការចូលរួមវិភាគទានរបស់សម្ដេចនាយករដ្ឋមន្ត្រី និងលោកជំទាវ ព្រមទាំងលោកឧកញ៉ាទាំង៤រូបខាង ដើម្បីជួយទ្រទ្រង់មូលនិធិ "សិល្បករចាស់ជរា" ខណៈ មូលនិធិនេះ ត្រៀមនឹងប្រកាសផ្លូវការនាដើមខែមេសាខាងមុខ។

លោក ហេង ឡុង ថ្នាក់ដឹកនាំសមាគមសិល្បករស្ម័គ្រចិត្តជាមួយអ្នកនាង ចន ច័ន្ទលក្ខិណា បានឲ្យដឹងថា នេះចាត់ជាប្រវត្តិសាស្ត្រមួយក្នុងសង្គមសិល្បៈខ្មែរ ដែលកន្លងមកមិនដែលមានឧកញ៉ារូបណា មានទឹកចិត្តជួយសិល្បករចាស់ៗបែបនេះហើយ។ ដូច្នេះហើយលោករីករាយ និងសង្ឃឹមថា មូលនិធិដែលផ្ដល់ក្ដីសង្ឃឹមដល់សិល្បករចាស់ៗដែលបាត់បង់លទ្ធភាពបម្រើសិល្បៈតទៅទៀតនោះ និងទទួលបានវិភាគទានពីឯកឧត្ដម អ្នកឧកញ៉ា ក៏ដូចជាសប្បុរសជននានាបន្ថែមទៀត។

វត្តមានមូលនិធិ "សិល្បករចាស់ជរា" ត្រៀមនឹងប្រកាសជូននៅថ្ងៃទី០៦ មេសា ក្នុងកម្មវិធីធំមួយដែលផ្ដួចផ្ដើមដោយសមាគមន៍សិល្បស្ម័គ្រចិត្ត ហៅថា "កតញ្ញូរាត្រី"។ កម្មវិធីដ៏ធំនេះ ធ្វើឡើងនៅអូតែលសុខា គឺជាជួបជុំគ្នារវាងឯកឧត្ដម អ្នកឧកញ៉ា សប្បុរសជននានា ដើម្បីកៀរគររកការឧបត្ថម្ភបន្ថែមទៀតទ្រទ្រង់មូលនិធិ៕

អត្ថបទ៖ ស៊ុនហួត