មេធាវី សុក សំអឿន៖ កម្ពុជាសព្វថ្ងៃកំពុងរងគ្រោះដោយសង្គ្រាមចរាចរណ៍

2017-03-30 04:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នគ្រោះថ្នាក់ចរាចរណ៍នៅក្នុងប្រទេសកម្ពុជាគឺនៅតែជាបញ្ហាដ៏ក្ដៅគគុកមួយដែលប្រជាជនកម្ពុជាទូទៅមានការខ្លាចរអា និង ព្រួយបារម្ភយ៉ាងខ្លាំង។ ជាពិសេសបញ្ហាមួយនេះក៏បានបង្កអោយមានភាពឈឺក្បាលមិនតិចនោះដែរចំពោះរាជរដ្ឋាភិបាលកម្ពុជា និង ក្រុមអ្នកច្បាប់កម្ពុជាដែលត្រូវប្រឈមមុខក្នុងការដោះស្រាយលើបញ្ហានេះអោយបានឆាប់បំផុត។

បើតាមការលើកឡើងរបស់ លោក សុក សំអឿន ដែលជាប្រធានមេធាវីប្រចាំក្រុមអ្នកច្បាប់ និង ទីប្រឹក្សាអមរិន្ទបានអោយដឹងថា លោកមានការព្រួយបារម្ភយ៉ាងខ្លាំងអំពីបញ្ហាគ្រោះថ្នាក់ចរាចរណ៍ដែលកំពុងកើតមានសព្វថ្ងៃនៅក្នុងប្រទេសកម្ពុជា។ លោកបានបញ្ជាក់ថា កាលពីមុនប្រជាជនកម្ពុជាបានបាត់បង់ជីវិតយ៉ាងច្រើននៅក្នុងភ្លើងសង្គ្រាម ប៉ុន្តែបច្ចុប្បន្នថ្វីបើកម្ពុជាមានសន្តិភាពមែនពិត ប៉ុន្តែកម្ពុជាកុំពុងប្រឈមមុខនឹងសង្គ្រាមថ្មីមួយទៀតដែលបានឆក់យកអាយុជីវិតរបស់ប្រជាជនកម្ពុជាជារៀងរាល់ថ្ងៃនៅតាមដងផ្លូវ ដែលលោកអោយឈ្មោះវាថា សង្គ្រាមចរាចរណ៍។

លោក សុក សំអឿន ប្រធានមេធាវីប្រចាំក្រុមអ្នកច្បាប់ និង ទីប្រឹក្សាអមរិន្ទ

លោកបានពន្យល់ថា ដោយសារតែបច្ចេកវិទ្យាកាន់តែទំនើប បានធ្វើអោយយានយន្តគ្រប់ប្រភេទមានកម្លាំងខ្លាំងដែលអនុញ្ញាតអោយអ្នកបើកបរ អាចបើកក្នុងល្បឿនលឿននៅលើដងផ្លូវ។ កត្តាទី២ គឺដោយសារតែកំណើនយានយន្តគ្រប់ប្រភេទនៅក្នុងប្រទេសកម្ពុជាជារៀងរាល់ឆ្នាំ ស្របពេលដែលផ្លូវធ្វើចរាចរណ៍នានា ហាក់នៅមានភាពតូចចង្អៀតនៅឡើយ ជាពិសេសគឺការយកចិញ្ចើមផ្លូវសាធារណៈដើម្បីធ្វើអាជីវកម្មនានា។

មួយវិញទៀតលោកបានអោយដឹងថា ដោយសារតែការមិនគោរពច្បាប់ចរាចរណ៍ពីសំណាក់អ្នកបើកបរយានយន្តមួយចំនួនក៏ជាហេតុបណ្ដាលអោយងាយកើតមានគ្រោះថ្នាក់ចរាចរណ៍ផងដែរ។ ក្រៅពីនេះអាចមានកត្តារួមផ្សំទៀតជាច្រើន ដូចជាកត្តាបច្ចេកទេសរបស់យានយន្តដែលអាចខូចដោយចៃដន្យ និង ការមិនអធ្យាស្រ័យគ្នាក្នុងពេលបើកបរជាដើម។ តាមទស្សនៈផ្ទាល់ខ្លួន លោកសុក សំអឿន បានថ្លែងថា សព្វថ្ងៃប្រទេសកម្ពុជាហាក់កំពុងអភិវឌ្ឍវិស័យយានយន្តខ្លាំងជាងការអភិវឌ្ឍផ្នែកផ្លូវថ្នល់។

គួរបញ្ជាក់ផងដែរថា បើយោងតាមទិន្នន័យមួយរបស់វេបសាយ icebike.org បានអោយដឹងថា កាលពីឆ្នាំ ២០១៥ កន្លងទៅ ប្រទេសកម្ពុជាមានអ្នកស្លាប់ ដោយសារគ្រោះថ្នាក់ចរាចរណ៍ប្រមាណ ៤៦៤ នាក់ និង រងរបួសប្រមាណ ៣,៦៨៧ នាក់។ ចំពោះកម្រិតហានិភ័យនៃការស្លាប់ក្នុងគ្រោះថ្នាក់ចរាចរណ៍មួយមានរហូតដល់ ០,៩% ឯណោះ។ ជាងនេះទៅទៀត គ្រោះថ្នាក់ចរាចរណ៍ក្នុងឆ្នាំ ២០១៥ ក៏បានបណ្ដាលអោយខូចខាតទ្រព្យសម្បត្តិគិតជាទឹកប្រាក់សរុបប្រមាណជាង៧៧លានដុល្លារផងដែរ។

អត្ថបទ៖ ចន្ថា