ប្រជាពលរដ្ឋខ្មែរនៅមន្ទីរពេទ្យគន្ធបុប្ផាក្ដុកក្ដុលចិត្ត និងបួងសួងឱ្យលោកវេជ្ជបណ្ឌិត បេអាត វិចឆ្នឺរ
- 2017-03-30 07:33:17
- ចំនួនមតិ 0 | ចំនួនចែករំលែក 0
ប្រជាពលរដ្ឋខ្មែរនៅមន្ទីរពេទ្យគន្ធបុប្ផាក្ដុកក្ដុលចិត្ត និងបួងសួងឱ្យលោកវេជ្ជបណ្ឌិត បេអាត វិចឆ្នឺរ
ចន្លោះមិនឃើញ
ប្រជាជនកម្ពុជា ជាច្រើននាក់បន្ទាប់ពីឮដំណឹងថា លោកវេជ្ជបណ្ឌិត បេអាត រិចឆ្នឺរ កំពុងមានជំងឺជាទម្ងន់ បានបង្ហាញទឹកមុខក្រៀមក្រំយ៉ាងខ្លាំង ហើយក៏បាននិយាយជាពាក្យពេចន៍ជាការជូនពរ និងលើកទឹកចិត្តដល់ លោកវេជ្ជបណ្ឌិតឲ្យបានឆាប់ជាសះស្បើយ។
ខាងក្រោមនេះជាសារជូនពររបស់ពួកគេទៅ លោកវេជ្ជបណ្ឌិត៖
** ចំណុចកត់សម្គាល់ **
មកទល់ពេលនេះ ទោះជាអតីតប្រធានមន្ទីរពេទ្យគន្ធបុប្ផាកំពុងសម្រាកព្យាបាលនៅមន្ទីរពេទ្យប្រទេសស្វីស ប៉ុន្តែមន្ទីរពេទ្យនៅតែបន្តដំណើរការដោយឯករាជ្យដូចធម្មតា។
** ប្រធានគ្រប់គ្រងមន្ទីរពេទ្យគន្ធបុប្ផាជាបណ្ដោះអាសន្ន **
ក្នុងចំណោមបុគ្គលិកទាំង២៥០០នាក់ មានតែលោកវេជ្ជបណ្ឌិត បេអាត រិចឆ្នឺរ និងលោកវេជ្ជបណ្ឌិត ដេនីស ឡូរ៉ង់ ដែលជាប្រធានមន្ទីរពិសោធន៍ និងភស្តុភារ គឺជាជនជាតិបរទេស។ ដើម្បីការបន្តដំណើរទៅមុខនៃមន្ទីរពេទ្យ លោកវេជ្ជបណ្ឌិត ភីធឺរ ស្ទូដឺរ នឹងកាន់តំណែងជាប្រធានគ្រប់គ្រងមន្ទីរពេទ្យនោះជាបណ្ដោះអាសន្ន។
លោកវេជ្ជបណ្ឌិត ភីធឺរ ស្ទូដឺរ មានការយល់ដឹងពីមន្ទីរពេទ្យខាងលើច្បាស់លាស់ ដោយលោកបានធ្វើការងារនោះ ជាមួយលោកវេជ្ជបណ្ឌិត បេអាត រិចឆ្នឺរ និងលោកវេជ្ជបណ្ឌិត ដេនីស ឡូរ៉ង់ ចាប់តាំងពីមន្ទីរពេទ្យនោះបានកកើតមក។
** ដំណើរការដោយមានការគាំទ្រ និងជំនួយសប្បុរសនានា **
គួររំលឹកដែរថា មន្ទីរពេទ្យគន្ធបុប្ផានៅភ្នំពេញ និងនៅខេត្តសៀមរាប គឺជាផ្នែកមួយរបស់ក្រសួងសុខាភិបាលកម្ពុជា ហើយមានឋានៈជាមន្ទីរពេទ្យសាកលវិទ្យាល័យ។
មន្ទីរពេទ្យគន្ធបុប្ផា ដំណើរការទៅមុខដោយជោគជ័យ ដោយការគាំទ្រផ្នែកហិរញ្ញវត្ថុរបស់ម្ចាស់ជំនួយឯកជនមួយចំនួន នៅប្រទេសស្វីស និងនៅកម្ពុជា ព្រមទាំងការគាំទ្រពីរាជរដ្ឋាភិបាលកម្ពុជា និងស្វីសផងដែរ។ ប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជា បានបង្កើនថវិកាប្រចាំឆ្នាំ សម្រាប់មន្ទីរពេទ្យ ហើយរដ្ឋាភិបាលប្រទេសស្វីសតាមរយៈភ្នាក់ងារសម្រាប់កិច្ចសហប្រតិបត្តិការ និងការអភិវឌ្ឍន៍របស់ស្វីសបានគាំទ្រ មន្ទីរពេទ្យគន្ធបុប្ផា ចាប់តាំងពីកកើតមុនដំបូងមក ហើយនៅតែបន្តការគាំទ្រ ចំពោះមន្ទីរពេទ្យនេះ ដែលថវិកាជំនួយ គឺប្រហែលជា១០% នៃថវិកាចំណាយប្រចាំឆ្នាំរបស់មន្ទីរពេទ្យ។
មូលនិធិគន្ធបុប្ផា រួមជាមួយនឹងរដ្ឋាភិបាលស្វីស តំណាងដោយភ្នាក់ងារសម្រាប់កិច្ចសហប្រតិបត្តិការ និងការអភិវឌ្ឍរបស់ស្វីស នឹងធ្វើការសហការជាមួយនឹងព្រះករុណា ព្រះបាទសម្ដេច ព្រះបរមនាថ នរោត្តម សីហមុនី និងរាជរដ្ឋាភិបាលកម្ពុជា ដើម្បីធ្វើការលើភាពថិតថេរនៃហិរញ្ញវត្ថុរយៈពេលវែងរបស់មន្ទីរពេទ្យនោះ៕