ពីអ្នកដឹកជញ្ជូនឥវ៉ាន់តាមកូនឡានខុសច្បាប់ ក្លាយជាមហាសេដ្ឋីលេខ៤នៅចិន
- 2017-03-30 07:59:29
- ចំនួនមតិ 0 | ចំនួនចែករំលែក 0
ពីអ្នកដឹកជញ្ជូនឥវ៉ាន់តាមកូនឡានខុសច្បាប់ ក្លាយជាមហាសេដ្ឋីលេខ៤នៅចិន
ចន្លោះមិនឃើញ
លោក Wang Wei ធ្លាប់ជាអ្នកដឹកជញ្ជូនឥវ៉ាន់រឆ្លងដែនខុសច្បាប់ទៅកាន់ប្រទេសចិនតាមរយៈកូនឡានតូចមួយ រហូតមានលទ្ធភាពទិញយន្តហោះប្រភេទ Boeing ដឹកឥវ៉ាន់ជាច្រើនគ្រឿង។
ស្ថាបនិកក្រុមហ៊ុនដឹកជញ្ជូនឥវ៉ាន់តាមយន្តហោះ SF Express រូបនេះប្រាប់ថា បន្ទាប់ពីសេវាកម្មក្រុមហ៊ុនរបស់លោកចុះបញ្ជីទៅក្នុងភាគហ៊ុន Shenzhen មក បានធ្វើឲ្យលោកក្លាយជាមហាសេដ្ឋីពាន់លានដុល្លារចំនួន ២០ដងហើយ។
ពេលនេះលោកក្លាយជាអ្នកមានបំផុតទី ៤ នៅប្រទេសចិន និងទី ៣០នៅលើលោកជាមួយទ្រព្យសម្បត្តិ ២៣,៣ពាន់លានដុល្លារ។ នេះបើតាមបញ្ជីមហាសេដ្ឋីរបស់ Bloomberg's Billionairs Index ថ្ងៃទី ២៩មិនា ដោយនៅពីក្រោយលោកប៉ូលីម៉ា លេខ៣ វ៉ាងជៀនលីន លេខ២ និង ជេកម៉ា លេខ១។
ជាធម្មតាលោកមិនចង់ធ្វើបទសម្ភាសន៍ជាមួយប្រព័ន្ធផ្សព្វផ្សាយណាមួយឡើយ ព្រោះអៀនខ្មាស និងចង់ស្ងៀមស្ងាត់ ប៉ុន្តែពេលនេះដោយចៀសមិនរួចទើបលោកព្រមទម្លាយឲ្យដឹងពីក្រុមហ៊ុន SF Express។ ក្រុមហ៊ុនលោកមានបុគ្គលិកប្រមាណ ៨ម៉ឺននាក់ យន្តហោះ ៣៦គ្រឿង និងយានជំនិះម៉ូតូ រថយន្តរាប់ពាន់គ្រឿងផ្សេងទៀតសម្រាប់ដំណើរការនៅទូទាំងទីក្រុងធំៗក្នុងប្រទេសចិន។
បើនិយាយពីប្រវត្តិវិញ លោកជាកូនប្រុសរបស់អ្នកបកប្រែបម្រើការឲ្យកងទ័ពចិនម្នាក់ និងធំដឹងក្ដីនៅហុងកុង។ លោកចាប់ផ្ដើមដំណើរការក្រុមហ៊ុន SF Express ជាផ្លូវការក្នុងឆ្នាំ ១៩៩៣ ដើម្បីផ្ទេរឥវ៉ាន់រវាងក្រុងហុងកុង និងចិនដីគោក។ ជំនួញនេះ លោកបានចាត់ទុកថាជាការងារប្រថុយប្រថានមួយពេលចាប់ផ្ដើមប្រតិបត្តិការ ប៉ុន្តែចំណេញប្រាក់ច្រើនដោយប្រើប្រាស់បុគ្គលិកមួយក្ដាប់តូចប៉ុណ្ណោះ។
ក្រុមហ៊ុន SF ចាប់ផ្ដើមដឹកជញ្ជូនឥវ៉ាន់ដំបូងក្នុងឆ្នាំ ១៩៩០ គឺជាជំនួញខុសច្បាប់ ឬហៅ Black delivery ដោយលោកនឹងត្រូវផាកពិន័យប្រសិនបើមន្ត្រីប្រៃសណីយ៍ចាប់បាន ដូច្នេះលោកត្រូវធ្វើការយ៉ាងលួចលាក់បំផុត។ នេះបើតាមលោក Wang ធ្វើសម្ភាសន៍កាលឆ្នាំ ២០១១។
បច្ចុប្បន្ន ជំនួញរបស់លោកបានរីកលូតលាស់ខ្លាំងដោយសារមនុស្សជាច្រើនទិញម្សៅទឹកដោះគោទារក និងថ្នាំពេទ្យពីហុងកុងយកទៅលក់នៅចិនប្រើប្រាស់សេវាកម្មក្រុមហ៊ុនលោក៕