សៀវ ង៉ុយ បើចង់បង្ហាញមុខញឹកញាប់ត្រូវខំប្រឹងវ៉ៃឲ្យឈ្នះ
- 2017-04-13 23:31:00
- ចំនួនមតិ 0 | ចំនួនចែករំលែក 0
សៀវ ង៉ុយ បើចង់បង្ហាញមុខញឹកញាប់ត្រូវខំប្រឹងវ៉ៃឲ្យឈ្នះ
ចន្លោះមិនឃើញ
អ្នកប្រដាល់ទម្ងន់ស្រាលនិងជាជើងខ្លាំងមានខ្សែក្រវាត់ច្រើនគ្រឿងក្នុងដៃ សៀវ ង៉ុយ ប្រាប់ថា ទោះជាបច្ចុប្បន្នមានការជោគជ័យយ៉ាងនេះក៏ដោយ ប៉ុន្តែគេមិនព្រងើយកន្តើយនោះទេ នៅតែព្យាយាមហ្វឹកហាត់ជានិច្ចទើបឡើងប្រកួតឈ្នះញឹកញាប់។
សៀវ ង៉ុយ បាននិយាយថា បើរាប់ពីចំនួនខ្សែក្រវាត់វិញសព្វថ្ងៃនេះគេមាន៣គ្រឿងគឺទី១ ខ្សែក្រវាត់ សមរភូមិអ្នកប្រយុទ្ធ (PNN) ទី២ ខ្សែក្រវាត់ CBS (អប្សរា) និងទី៣ គឺខ្សែក្រវាត់ SkyLand និងរួមទាំងពានរង្វាន់ទូទាំងប្រទេស២ទៀតផង។ ទោះជោគជ័យខ្លាំង និងមានឈ្មោះបោះសម្លេងនាពេលបច្ចុប្បន្នក៏ដោយ តែជើងខ្លាំងរូបនេះនៅតែបន្តខំប្រឹងប្រែងហ្វឹកហាត់ដូចមុន ពីព្រោះមិនចង់ឲ្យធ្លាក់សមត្ថភាពនោះទេ។
ម្ចាស់ខ្សែក្រវាត់ SkyLand ថ្មីថ្មោងរូបនេះឲ្យដឹងទៀតថា ដោយការស្រឡាញ់អាជីពប្រដាល់មួយនេះ ទើបជំរុញទឹកចិត្តខ្លួនឲ្យខិតខំហ្វឹកហាត់ជាបន្តបន្ទាប់។ មិនចាំបាច់មានការដាស់តឿនច្រើនពីគ្រូបង្ហាត់ឡើយ គឺស្វះស្វែងហ្វឹកហាត់ដោយខ្លួនតែម្ដង។ ណាមួយអាជីពប្រដាល់នេះ បានផ្ដល់ឲ្យជីវភាពគ្រួសាររបស់គេធូរធារជាងមុនច្រើន។ បើចង់ឡើងប្រកួតឲ្យបានញឹកញាប់នោះ លុះត្រាតែខ្លួនខំប្រឹងនិងវ៉ៃឲ្យឈ្នះគេ ទើបបានខាងស្ថានីយគេហៅឡើងប្រកួតច្រើន។
សៀវ ង៉ុយ ជាកូនសិស្សរបស់លោកគ្រូ ធន់ សុភា នៃក្លឹបសមាគមប្រដាល់ក្រសួងការពារជាតិ។ ពេលថ្មីៗនេះ អ្នកប្រដាល់វ័យ២៦ឆ្នាំបានឈ្នះខ្សែក្រវាត់ទម្ងន់ ៥៤គីឡូក្រាម របស់ Sky land ដែលរៀបចំកម្មវិធីប្រកួតម៉ារាតុងកាលពីថ្ងៃទី១០-១២ ខែមីនា ឆ្នាំ២០១៧កន្លងទៅនេះ៕