គ្រូជម្រើសជាតិថា កម្ពុជានឹងខ្លាំងជាងនេះក្នុងរយៈពេលដ៏ខ្លី

2017-04-06 04:28:20
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Leonardo Vitorino គ្រូបង្វឹកក្រុមជម្រើសជាតិកម្ពុជាបានលើកឡើងកាលពីថ្ងៃទី៣០ ខែមីនា ឆ្នាំ២០១៧ថា ក្រុមគោព្រៃកម្ពុជា នឹងមានទម្រង់លេងកាន់តែខ្លាំងជាងបច្ចុប្បន្នក្នុងរយៈពេល ២ឬ៣ខែក្រោយពោលគឺការប្រមូលផ្ដុំលើកក្រោយ។

លោក Leonardo Vitorino

ក្រុមកម្ពុជា នឹងត្រូវជួបក្រុមបាល់ទាត់អាហ្វហ្គានីស្ថាននាថ្ងៃទី១៣ ខែមិថុនា ឆ្នាំ២០១៧ នៅពហុកីឡដ្ឋានជាតិក្នុងការប្រកួតសន្សំពិន្ទុលើកទី២ក្នុងពូល C នៃវគ្គជម្រុះពានរង្វាន់ AFC Asian Cup 2019។ ស្របពេលគ្រូបង្វឹកក្រុមកម្ពុជាខាងលើបង្ហាញជំនឿចិត្តថា ក្រុមរបស់ខ្លួន នឹងមានទម្រង់លេងកាន់តែខ្លាំងក្នុងរយៈពេលនៃការប្រមូលផ្ដុំលើកក្រោយនេះ។

គ្រូបង្វឹកសញ្ជាតិប្រេស៊ីលរូបនេះបន្ថែមថា ទទឹមនឹងការរីកចម្រើនរបស់ក្រុមជម្រើសជាតិក៏ត្រូវការ ការគាំទ្រពីសំណាក់មហាជនផងដែរ។ ចំពោះចំណុចខ្វះខាតលោកមើលឃើញមួយចំនួន ដែលត្រូវតែកែប្រែរួមទាំងបច្ចេកទេស និងល្បឿន។

លោក Leonardo Vitorino ត្រូវបានសហព័ន្ធកីឡាបាល់ទាត់កម្ពុជាប្រកាសតែងតាំងជាគ្រូបង្វឹកក្រុមគោព្រៃកម្ពុជាចំនួន ១រដូវកាលគិតចាប់ពីដើមខែមីនា ឆ្នាំ២០១៧៕