Apple និង Google កំពុងតែដើរតាម Samsung

2017-04-11 04:43:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឡប់ទៅឆ្នាំ ២០១៥ Samsung បាននាំយកស្មាតហ្វូនអេក្រង់រាងកោងទាំងសងខាងដំបូងគេគឺ Galaxy S6 Edge ដោយទទួលបានភាពជោគជ័យគួរឲ្យកត់សម្គាល់។ ឆ្នាំបន្ទាប់ Samsung ក៏នៅបន្តប្រើការរចនាអេក្រង់រាងកោងនេះលើ Galaxy S7 Edge។

នៅឆ្នាំ ២០១៧ នេះដែរ Samsung ក៏បានបង្ហាញ Galaxy S8/S8+ មានអេក្រង់រាងកោងដែលកាន់តែពិសេសជាងមុនព្រោះគែមខាងលើ និង ខាងក្រោមរបស់ស្មាតហ្វូនស្ទើរតែលែងមាន មើលទៅផ្នែកខាងមុខដូចមានតែផ្ទាំង OLED មួយយ៉ាងអ៊ីចឹង។ ការរចនារបស់ Galaxy S ជំនាន់ចុងក្រោយបង្អស់នេះទទួលបានការកោតសរសើរពីសំណាក់អ្នករាយការណ៍ព័ត៌មានជាច្រើនដែលបានចាប់កាន់ស្មាតហ្វូននេះមុនគេ។

រូបរាងគំរូ iPhone 8

ហើយបើតាមពាក្យចចាមអារ៉ាមចុងក្រោយបំផុតបានឲ្យដឹងថា Apple និង Google ទំនងជាចម្លងការរចនាអេក្រង់រាងកោងនេះដាក់លើស្មាតហ្វូនជំនាន់ថ្មីរបស់ខ្លួន។ ដំបូងគេគឺ Apple ដោយគេរំពឹងថាក្រុមហ៊ុននេះនឹងបង្ហាញ iPhone ម៉ូដែលពិសេសសម្រាប់ខួប ១០ ឆ្នាំនៃការកកើត iPhone។ iPhone ម៉ូដែលពិសេសនេះត្រូវបានគេឲ្យឈ្មោះថា iPhone 8 ដោយតាមចចាមអារ៉ាមឲ្យដឹងថាវានឹងមានការរចនារូបរាងថ្មីក្នុងនោះរួមមានអេក្រង់ OLED រាងកោងតាមស្ទីលរបស់ Galaxy S8 ផងដែរ។

ដោយឡែក Google ឯណោះវិញក៏រំពឹងថានឹងបញ្ចេញស្មាតហ្វូន Pixel ស៊េរីថ្មីក្នុងឆ្នាំនេះដែរ ហើយបើតាមការរាយការណ៍ចុងក្រោយសន្និដ្ឋានថាស្មាតហ្វូនថ្មីនេះនឹងមានបំពាក់អេក្រង់ OLED ដែលមានរាងកោង។ ត្បិតថាទាំងនេះត្រឹមជាពាក្យចចាមអារ៉ាម ប៉ុន្តែមានភាគរយច្រើនដែលវាអាចក្លាយជាការពិត ព្រោះថាអ្នកប្រើប្រាស់នាពេលបច្ចុប្បន្នហាក់មានទំនោរចាប់អារម្មណ៍លើអេក្រង់រាងកោងច្រើនជាងអេក្រង់រាបស្មើ៕

ប្រភព៖ Businessinsider ប្រែសម្រួល៖ សុខហេង