ថ្នាក់ដឹកនាំក្លឹបណាហ្កាវើល លើកទឹកចិត្តជាថវិកាដល់កីឡាករពេលចូលឆ្នាំថ្មីនេះ

2017-04-12 03:25:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្នាក់ដឹកនាំក្រុមបាល់ទាត់ ណាហ្គាវើល យកថវិកាផ្ទាល់ខ្លួនមួយចំនួនឲ្យកីឡាករជាការលើកទឹកចិត្ត សម្រាប់ពួកគេនាឱកាសបុណ្យចូលឆ្នាំប្រពៃណីខ្មែរខាងមុខនេះ។

កីឡាករ ណាហ្គាវើល

លោក មាស ចាន់ណា ដែលគ្រូបង្វឹកក្រុមបាល់ទាត់ណាហ្កាវើលបានឲ្យដឹងថា សម្រាប់ចូលឆ្នាំប្រពៃណីខ្មែរដែលនឹងប្រារព្ធទៅនៅថ្ងៃទី១៤-១៦ ខែមេសា ឆ្នាំ២០១៧ ខាងមុខនេះ អ្នកគ្រប់គ្រងក្លឹបប្រាប់ថា លោកយកថវិកាផ្ទាល់ខ្លួនមួយចំនួនសម្រាប់ផ្ដល់ជូនដល់កីឡាករទាំងអស់ សម្រាប់ជាការលើកទឹកចិត្តក្នុងឱកាសចូលឆ្នាំនេះ។ ចំពោះថវិកាចំនួនប៉ុន្មាននោះគ្រូបង្វឹករូបនេះមិនបានប្រាប់ឲ្យដឹងនោះទេ ដោយដឹងថានេះជាកញ្ចប់ថវិការបស់អ្នកគ្រប់គ្រង។

កីឡាករ ណាហ្គាវើល

គ្រូរូបនេះបន្តទៀតថា ការផ្ដល់ជាថវិកាឬជារង្វាន់មុនពិធីបុណ្យអ្វីមួយនេះ ជាការលើកទឹកចិត្តមួយដល់កីឡាករ ធ្វើឲ្យពួកគេរឹតតែស្រឡាញ់ក្រុមខ្លួន រឹតតែមានឆន្ទៈលេងកាន់តែខ្លាំងថែមទៀត នឹងពង្រឹងស្មារតីកាន់តែខ្លាំង។ បើទោះជាថវិកាបន្តិចបន្តួចមិនដូចក្រុមគេមែន តែនេះជាទឹកចិត្តរបស់អ្នកគ្រប់គ្រងទៅដល់កីឡាកររបស់ខ្លួនក្នុងឱកាសបុណ្យទាននេះដែរ។

សម្រាប់សប្ដាហ៍ទី៧ នៃពានរង្វាន់លីគកំពូលកម្ពុជាកន្លងទៅ ក្រុមណាហ្គាវើលយក៣ពិន្ទុយ៉ាងស្រួល ពីក្រុមបាល់ទាត់អាស៊ីអ៊ឺរ៉ុបនៅពហុកីឡដ្ឋានជាតិ ដោយឈ្នះក្នុងលទ្ធផល ៤-០។ នៅចុងសប្ដាហ៍ថ្ងៃទី១៥-១៦ នេះដែរលីគកំពូលកម្ពុជាមិនមានធ្វើការប្រកួតនោះឡើយ សម្រាករហូតដល់សប្ដាហ៍បន្ទាប់ទើបចាប់ផ្ដើមលេងវិញ៕

អត្ថបទ៖ នួន ស៊ីណា