តៃវ៉ាន់ ក្លាយជាប្រទេសដំបូងនៅអាស៊ី ហាមឃាត់មិនឲ្យបរិភោគសាច់ឆ្កែ និងឆ្មា

2017-04-12 04:58:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តៃវ៉ាន់ បានអនុម័តច្បាប់ការពារសត្វ កាលពីថ្ងៃអង្គារ ម្សិលមិញនេះ ដោយដាក់ពិន័យលើការបរិភោគសាច់ឆ្កែ និងឆ្មា ព្រមទាំងដាក់ពន្ធនាគារសម្រាប់អ្នកសម្លាប់ និងធ្វើទារុណកម្មលើសត្វផងដែរ។

ជាមួយនឹងច្បាប់ថ្មីនេះ ការលក់ ទិញ ឬ បរិភោគសាច់ឆ្កែ ឬ ឆ្មា នឹងត្រូវពិន័យជាប្រាក់ ចន្លោះពី ១ ៦០០ដុល្លារ ដល់ ៦៥ ០០០ដុល្លារ។ មិនតែប៉ុណ្ណោះ ការធ្វើវិសោធនកម្មនេះ បានពង្រឹងការផ្ដន្ទាទោស សម្រាប់អ្នកដែលមានចេតនាបង្កគ្រោះថ្នាក់ដល់សត្វ ឲ្យជាប់ពន្ធនាគាររយៈពេលអតិបរមា ចំនួន២ឆ្នាំ និងពិន័យជាប្រាក់ចន្លោះពី ៦ ៥០០ដុល្លារ ដល់ ៦៥ ០០០ដុល្លារទៀតផង។

លើសពីនេះទៅទៀត ជនល្មើសអាចត្រូវជាប់ពន្ធនាគារ ពី ១ឆ្នាំ ដល់ ៥ឆ្នាំ និងពិន័យជាប្រាក់ ចន្លោះពី ១៦ ០០០ដុល្លារ ដល់ ១៦០ ០០០ដុល្លារ ប្រសិនបើនៅតែល្មើសម្ដងហើយម្ដងទៀត។ ក្រៅពីនេះ ម្ចាស់សត្វចិញ្ចឹម ដែលបណ្ដើរសត្វតាមម៉ូតូ នឹងត្រូវពិន័យជាប្រាក់រហូតដល់ទៅ ៥០០ដុល្លារ។

គួរបញ្ជាក់ថា តៃវ៉ាន់ គឺជាប្រទេសដំបូងបង្អស់នៅអាស៊ី ដែលបានចេញច្បាប់ហាមឃាត់បែបនេះ៕

ប្រភព៖ Chinapost ប្រែសម្រួល៖ សេង ឡុង