ចុងក្រោយនេះ តាហ៊្វុយហ្សូ ជំងឺសន្លាក់ធ្វើទុក្ខខ្លាំង
- 2017-04-13 02:54:35
- ចំនួនមតិ 0 | ចំនួនចែករំលែក 0
ចុងក្រោយនេះ តាហ៊្វុយហ្សូ ជំងឺសន្លាក់ធ្វើទុក្ខខ្លាំង
ចន្លោះមិនឃើញ
អតីតតារាកំប្លែងជើងចាស់ និងជាប្រធានអង្គការ N.A.C.A លោក ស៊ូ សាវ៉ាង ហៅ ហ៊្វុយហ្សូ ពេលនេះកំពុងតែមានជំងឺសន្លាក់យ៉ាងធ្ងន់ធ្ងរ លោកថា មិនមានលទ្ធភាពទៅព្យាបាលនៅមន្ទីរពេទ្យទេ បច្ចុប្បន្នទ្រាំព្យាបាលនេះផ្ទះ។
ជំងឺសន្លាក់នេះតាហ៊្វុយហ្សូ ទើបតែកើតជាង១ខែមកនេះ ដែលកន្លងមកមិនធ្លាប់កើតឡើយ។ អាការបានធ្វើទុក្ខជាខ្លាំងស្ទើររាល់ថ្ងៃ លោកមិនបានសម្រាកឡើយ។ តាហ៊្វុយសូ បានបន្តរៀបរាប់ថា ចាប់ពីត្រគាករហូតដល់ចុងជើង គឺមានអាការក្ដៅក្រហាយជាខ្លាំង មិនអាចដេកនិង ដើរបានឡើយ។
តាមការលើកឡើងរបស់អតីតតារាកំប្លែងវ័យ៧៤ឆ្នាំរូបនេះ កន្លងមក លោកធ្លាប់ទៅពិនិត្យសុខភាពនៅមន្ទីរពេទ្យជ័យជំនះតាខ្មៅម្ដង និងមន្ទីរពេទ្យកាល់ម៉ែត្រម្ដង ប៉ុន្តែការទៅពិនិត្យមិនមានជំងឺអ្វីធ្ងន់ធ្ងរឡើយ គឺទើបតែលេចចេញមានជំងឺសន្លាក់នាពេលចុងក្រោយនេះប៉ុណ្ណោះ។
តាហ៊្វុយហ្សូ មានបំណងចង់ទៅពិនិត្យសុខភាពរបស់លោកនៅក្រៅប្រទេសផងដែរ ប៉ុន្តែរាល់ថ្ងៃនេះលោកមិនមានលទ្ធភាព ព្រោះបច្ចុប្បន្នលោកត្រូវរាប់រងអង្គការដែលមានក្មេងៗកំព្រា ជាង២០នាក់ ទាំងការស្នាក់នៅហូបចុក ក៏ដូចជារៀនសូត្រជាដើម។
ទោះបីជាមានបញ្ហាសុខភាពធ្ងន់ធ្ងរបែបក្ដី តាហ៊្វុយហ្សូ មិនបារម្ភខ្លាំងទៅហ្នឹងអង្គការរបស់លោកឡើយ ព្រោះបច្ចុប្បន្ន បានប្រគល់កិច្ចការទាំងនោះឲ្យកូនបង្កើតរបស់លោកជាមើលការខុសត្រូវ។ ចំពោះជំនួយវិញ លោកថា សប្បុរសជនដែលធ្លាប់តែជួយកន្លងមក នៅតែបន្តជួយមិនទាន់មានការខ្វះខាត់នោះទេ ។
ជាមួយគ្នានោះ ក្មេងៗនៅក្នុងអង្គការរបស់លោក បច្ចុប្បន្នក៏នៅតែមានទីផ្សារដដែល ដោយពួកគេបានមានកម្មវិធីសម្ដែងតាមកម្មវិធីផ្សេងៗជាបន្តបន្ទាប់ ដើម្បីរកចំណូលមកផ្គត់ផ្គង់អង្គការដែរ៕