តំបន់ទេសចរណ៍មានទឹក អាកាសធាតុត្រជាក់ៗទាំង៤ ត្រូវប៉ាន់សម្រាប់លម្ហែចូលឆ្នាំខ្មែរនេះ

2017-04-13 04:46:35
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយថ្ងៃទៀតដល់បុណ្យចូលឆ្នាំខ្មែរហើយ ខណៈមនុស្សម្នាភាគច្រើនប្រាកដជាមានដំណើរកម្សាន្តជាលក្ខណៈគ្រួសារ ឬមិត្តភ័ក្ដិ បើទោះចំពេលក្ដៅខ្លាំងស្ទើរបែកក្បាលក៏ដោយ។

តែមិនថ្វីទេ Sabay នឹងណែនាំតំបន់ទេសចរណ៍មួយចំនួនដែលមានខ្យល់អាកាសត្រជាក់ ត្រូវប៉ាន់ក្នុងរដូវក្ដៅ ជាពិសេសឱកាសចូលឆ្នាំខ្មែរតែម្ដង សម្រាប់ភ្ញៀវទេសចរជាតិ និងអន្តរជាតិ៖

១. រមណីយដ្ឋានភ្នំគូលែន ខេត្តសៀមរាប មនុស្សជាច្រើន ជាពិសេសយុវវ័យនាំគ្នាសម្រុកទៅលេងអង្គរសង្ក្រាន្ត ខេត្តសៀមរាប បើទោះបីក្ដៅ និងមនុស្សច្រើនណែនតាន់តាប់ក៏ដោយ។ បើមិនចង់ក្ដៅ អ្នកអាចទៅលេងភ្នំគូលែន មានទឹកជ្រោះ អាកាសធាតុត្រជាក់ត្រហឹមស្រួលខ្លួនម៉ង។

ភ្នំគូលែនស្ថិតនៅក្នុងស្រុកស្វាយលើ និងស្រុកវ៉ារិន ចម្ងាយ ៦០គីឡូម៉ែត្រពីក្រុងសៀមរាប និងប្រហែល ២៥គីឡូម៉ែត្រពីប្រាសាទបន្ទាយស្រី។ នៅលើភ្នំគូលែនមានទឹកធ្លាក់ ២ ជាន់។ ជាន់ទី១ មានកម្ពស់ប្រហែល ៤ ទៅ ៥ ម៉ែត្រ ហើយមានប្រវែងប្រហែល ២០ ទៅ ២៥ ម៉ែត្រ។ ជាន់ទី២ មានកម្ពស់ ១៥ ទៅ ២០ ម៉ែត្រ ហើយមានប្រវែង ១០ ទៅ ១៥ ម៉ែត្រ។ ប្រវែងនេះអាស្រ័យទៅលើរដូវប្រាំង និង រដូវវស្សា។

២. មាត់ព្រែកកំពត ជាតំបន់កម្សាន្តបែបអេកូទេសចរណ៍កំពុងពេញនិយមខ្លាំង ហើយព្រៃលិចទឹកនៅសងខាងព្រែកកំពតដែលភ្ញៀវទេសចរអាចទៅលំហែកម្សាន្តជាមួយធម្មជាតិ ធ្វើធូរស្រាលបំបាត់ភាពតានតឹងអស់រលីង។ ភ្ញៀវទេសចរ អាចជិះទូកលេង ជិះខ្សែរ៉ត នៅតាមមាត់ព្រែកកំពតបាន ហើយបានគេងមួយយប់ទៀត នឹងដឹងថា មាត់ព្រែកស្រស់ស្អាតបែបណា ព្រោះអីអ្នកនឹងងើបឡើង ឃើញទេសភាពស្រស់ស្អាតមានភ្នំ និងទឹកជិតខ្លួន នាពេលព្រឹកព្រលឹម។

៣. ទឹកធ្លាក់តាតៃ ខេត្តកោះកុង និយាយដល់ខេត្តកោះកុង គ្រប់គ្នានឹកដល់ទឹកធ្លាក់តាតៃភ្លាម។ ទឹកធ្លាក់តាតៃ ជារមណីយដ្ឋានធម្មជាតិស្ថិតនៅភាគនិរតី ដ៏ទាក់ទាញ និងល្បីឈ្មោះ ដោយសារសម្រស់ដ៏ទាក់ចិត្តប្រៀបឋានសួគ៌ប្រតិស្ឋានលើផែនដី។

ភ្ញៀវទេសចរដែលមកទស្សនានៅទីនេះ ភាគច្រើនត្រូវជ្រើសរើសសេវាជិះទូក ត្បិតអីនៅតំបន់នេះមិនមានផ្លូវល្អនោះឡើយ។ ម្យ៉ាងទៀតការធ្វើដំណើរតាមទូកប្រមាណ ២០នាទី អាចនាំចក្ខុប្រទះទិដ្ឋភាពដ៏ស្រស់ត្រកាល និងវាយោបោកបក់មកប៉ះកាយរំសាយអារម្មណ៍នារដូវខែក្ដៅនេះផងដែរ។

៤. កោះនៅខេត្តកំពង់សោម ខេត្តនេះពោរពេញដោយកន្លែងកម្សាន្តទឹកសមុទ្រ ក្នុងនោះមានកោះមួយកំពុងមានភ្ញៀវទេសចរទៅលេងច្រើនទៀតផង នោះគឺកោះរ៉ុង។

កោះរ៉ុង ទើបតែត្រូវបានភ្ញៀវទេសចរស្គាល់ច្រើន បន្ទាប់ពីមានរូបភាពជាច្រើនបង្ហាញពីសម្រស់ស្រស់ស្អាតនៃកោះឋានសួគ៌នេះ ព្រមទាំងបានផ្សព្វផ្សាយពីក្រុមភ្ញៀវទេសចរបរទេសដែលបានមកកម្សាន្តទៀតផង។

មិនត្រឹមតែបានគយគន់ទេសភាព និងកម្សាន្តសប្បាយជាមួយទិដ្ឋភាពកោះរ៉ុង ប្រិយមិត្តអាចមុជទឹកក្រោមបាតសមុទ្រ មើលផ្កាថ្ម មច្ឆាជាតិ ជីវិតជាច្រើន និងដើម្បីស្វែងយល់ពីភាពស្រស់ស្អាតដ៏អស្ចារ្យ កម្របានឃើញនៅក្រោមបាតសមុទ្រ។

ក្រៅពីការកម្សាន្តតាមឆ្នេរខ្សាច់ ស វែងអន្លាយទាក់ចិត្តភ្ញៀវទេសចរគ្រប់គ្នា ការជិះខ្សែរ៉កដ៏រំភើប កាត់ព្រៃ និងនាំបទពិសោធន៍ដ៏ព្រឺព្រួចសម្រាប់ភ្ញៀវទេសចរដែលមកកម្សាន្តនៅកោះរ៉ុង ជាពិសេសបានទស្សនាទិដ្ឋភាពដ៏ស្រស់ស្អាតនៃកោះឋានសួគ៌នេះយ៉ាងច្បាស់ពីលើកំពូលភ្នំ៕

អត្ថបទ៖ ថា ម៉ាលីដា