ទ័ព ប៉ះស្វាយរៀងសប្ដាហ៍នេះ នឹងមានកម្មវិធីពិសេសៗខុសពីរាល់ដង
- 2017-04-18 03:57:31
- ចំនួនមតិ 0 | ចំនួនចែករំលែក 0
ទ័ព ប៉ះស្វាយរៀងសប្ដាហ៍នេះ នឹងមានកម្មវិធីពិសេសៗខុសពីរាល់ដង
ចន្លោះមិនឃើញ
ជំនួបរវាងក្លឹបបាល់ទាត់ក្រសួងការពារជាតិ (ទ័ព) និងក្លឹបព្រះខ័នរាជស្វាយរៀងនាម៉ោង៦:០០នាទីថ្ងៃទី២៣ ខែមេសា ឆ្នាំ២០១៧ ចុងសប្ដាហ៍នេះនៅស្តាតចាស់ នឹងមានព្រឹត្តិការណ៍ពិសេសៗមួយចំនួនសម្រាប់អ្នកទស្សនាផ្ទាល់ខុសពីរាល់ដង។
ក្លឹបក្រសួងការពារជាតិ នឹងបើកទ្វារស្វាគមន៍ក្លឹបព្រះខ័នរាជស្វាយរៀងសម្រាប់ការប្រកួតលីគកំពូលកម្ពុជាសប្ដាហ៍ទី៨។ ជំនួបនេះលោក ខូវ ឆាយ អ្នកចាត់ការទូទៅរបស់ក្លឹបទ័ពបានឲ្យដឹងថា ជាការប្រកួតដំបូងនៃក្លឹបរបស់ខ្លួន ដែលធ្វើឡើងនាពេលយប់ក្រោមអំពូលភ្លើងទើបបំពាក់ថ្មី។
អ្នកចាត់ការរូបនេះបញ្ជាក់ថា ក្នុងឱកាសបើកសម្ពោធភ្លើងថ្មីនេះក្លឹបបានគ្រោងរៀបចំព្រឹត្តិការណ៍ ប្រគំតន្ត្រីតូចមួយ និងមានដាក់លក់ផលិតផលមួយចំនួន ដែលផលិតផលទាំងនោះជារបស់អ្នកឧបត្ថម្ភរបស់ក្លឹបក្រសួងការពារជាតិផ្ទាល់។ លើសពីនេះទៅទៀតក្លឹប នឹងអនុញ្ញាតឲ្យសិស្ស និស្សិតចូលទស្សនាជំនួបនេះដោយមិនគិតថ្លៃ ដោយគ្រាន់តែបង្ហាញកាតសិស្សដល់អ្នកត្រួតពិនិត្យសំបុត្រតែប៉ុណ្ណោះ។
ការប៉ះគ្នារវាងក្លឹបក្រសួងការពារជាតិ និងក្លឹបព្រះខ័នរាជស្វាយរៀងនេះ គឺជាការប្រកួតដ៏ធំមួយ ដើម្បីប្រជែងយកកំពូលតារាងលីគកំពូលកម្ពុជាឆ្នាំ២០១៧ ខណៈក្រុមភ្ញៀវស្ថិតនៅកំពូលតារាងមាន១៩ពិន្ទុ ស្របពេលម្ចាស់ផ្ទះមាន១៧ពិន្ទុស្ថិតនៅលេខ២៕