Ancelotti ៖ យើងមិនអាចឱ្យ Ronaldo ក្រឡុកបានតាមចិត្តនោះទេ

2017-04-18 03:55:35
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Carlo Ancelotti ដាស់តឿនកូនក្រុមរបស់ខ្លួនទាំងអស់ថា មិនត្រូវទុកឱកាសឱ្យ Cristiano Ronaldo នៅតែម្នាក់ឯងបាននោះទេ ព្រោះខ្សែប្រយុទ្ធរូបនេះតែងតែបង្កគ្រោះថ្នាក់បានជានិច្ច។

ក្រុម Bayern Munich នឹងត្រូវតតាំងជាមួយក្រុម Real Madrid នាជំនួបជើងទី២ ម៉ោង១:៤៥នាទីរំលងអាធ្រាត្រនេះ ដើម្បីកាត់សេចក្ដីរកក្រុមឡើងទៅវគ្គ៤ក្រុមចុងក្រោយពាន UEFA Champions League ។ ដោយឡែកកាលពីជើងទី១កន្លងទៅនៅប្រទេសអាល្លឺម៉ង់ ក្រុមរបស់លោក Ancelotti បានបរាជ័យ ១-២ ម្ដងមកហើយ ដែលគ្រានោះពួកគេអវត្តមានកីឡាករ Robert Lewandowski ។ ចំពោះជើងទី២នេះវិញ Bayern ពេញជើងល្អណាស់សម្រាប់តំបន់ប្រយុទ្ធរបស់ពួកគេ ព្រោះខ្សែប្រយុទ្ធ Lewandowski ចូលលេងបានវិញហើយ ខណៈដែលខ្សែការពារ Mats Hummels ក៏អាចលេងបានដូចគ្នា។

ក្នុងការប្រកួតនៅយប់នេះដែរ Ancelotti ដែលធ្លាប់ដឹកនាំក្រុម Real Madrid ផងនោះ មានក្ដីបារម្ភខ្លាំងចំពោះកីឡាករ Ronaldo ។ ដោយលោកបានបញ្ជាក់ថា៖ “រឿងរ៉ាវបានបញ្ជាក់កាលពីជើងទី១រួចហើយ យើងនឹងផ្ដោតសំខាន់ទៅលើរឿងនាំោះ។ យើងមិនអាចឱ្យ Ronaldo មានឱកាសច្រើននោះទេ។ ជើងទី២ យើងនឹងកាន់តែមានឱកាសតិចជាងជើងទី១ទៅទៀត។ Lewandowski ជាកីឡាករល្អ ហើយការត្រលប់មកវិញរបស់គាត់ នឹងកាន់តែប្រសើរឡើង”។

កាលពីជើងទី១កន្លងទៅ Cristiano Ronaldo ជាអ្នករកបាន២គ្រាប់ជួយក្រុម Real Madrid យកឈ្នះ Bayern Munich ខណៈដែលគ្រានោះ ក្រុមនៅអាល្លឺម៉ង់មួយនេះសល់គ្នាត្រឹមតែ១០នាក់ប៉ុណ្ណោះនៅនាទី៦១៕

ប្រភព៖ Goal ប្រែសម្រួល៖ មុន្នីរម្យ