អេ ភូថង លើកពីផលលំបាកក្នុងការបង្ហាត់កីឡាករជម្រើសជាតិ

2017-04-20 06:27:53
ចំនួនមតិ 0 | ចំនួនចែករំលែក 0

ចន្លោះមិនឃើញ

អេ ភូថង ដែលជាគ្រូជម្រើសជាតិប្រដាល់គុនខ្មែរ លើកឡើងពីផលលំបាកមួយចំនួនពីការបង្ហាត់កីឡាករជម្រើសជាតិនាពេលបច្ចុប្បន្នដើម្បីត្រៀមទៅចូលរួមកីឡាស៊ីហ្គេមឆ្នាំ២០១៧នៅប្រទេសម៉ាឡេស៊ី។

អេ ភូថង កំពុងបង្ហាត់សិស្ស

លោកគ្រូ អេ ភូថង បាននិយាយថា សម្រាប់បញ្ហាចម្បងចំពោះការបង្ហាត់បង្រៀនកីឡាករជម្រើសជាតិនោះគឺ ពេលវេលាតែម្ដង ដោយមើលឃើញថាកីឡាករជម្រើសជាតិសព្វថ្ងៃនេះ ពួកគេមានការមមាញឹកច្រើនមិនសូវជុំគ្នានោះទេ។ កីឡាករទាំងនោះពេលខ្លះត្រូវឡើងវ៉ៃតាមប៉ុស្តិ៍ និងពេលខ្លះទៀតជាប់រវល់រឿងផ្ទាល់ខ្លួន ហើយជួនការត្រូវចេញទៅប្រកួតនៅក្រៅប្រទេសអីជាដើម។

អេ ភូថង កំពុងបង្ហាត់សិស្ស

អតីតអ្នកប្រដាល់មានកេរ្តិ៍ឈ្មោះល្បីល្បាញរូបនេះបន្ថែមទៀតថា កត្តាទាំងនេះហើយធ្វើឲ្យលោកក៏ដូចជាគ្រូដទៃទៀតពិបាកក្នុងការបង្រៀនតែម្ដង ព្រោះអីពេលបង្រៀនត្រូវការសិស្សជុំគ្នាទើបអាចបង្រៀនបាន។ ដូចនេះការបង្ហាត់កីឡាករជម្រើសជាតិហាក់ដូចជាយឺតកម្មវិធីបន្តិច ដោយសារមានចំណុចប៉ះពាល់ទាំងនេះ។

គ្រូជម្រើសជាតិកីឡាប្រដាល់គុនខ្មែរនាពេលបច្ចុប្បន្ន២រូបគឺ លោកគ្រូ ឈិត សារឹម និងលោកគ្រូ អេភូថង គ្រូទាំងពីខាងលើមានតួនាទីជាអ្នកបង្ហាត់កីឡាករជម្រើសជាតិត្រៀមចូលរួមប្រកួតស៊ីហ្គេមនៅឆ្នាំ២០១៧នេះ។ បច្ចុប្បន្នកីឡាករជម្រើសជាតិប្រដាល់គុនខ្មែរមានដូចជា ម៉ឺន សុភា, ម៉ឺន សុខហ៊ុច, ឡៅ ចន្រ្ទា, យ៉េន ឌីណា, ឡៅ ចិត្រា និង សុខ ទូ ជាដើម៕

អត្ថបទ៖ នួន ស៊ីណា