ថៃ អ៊ូរ បង្កើតកម្មវិធីប្រកួតយ៉ាងតិច១ដងក្នុងមួយខែនៅប៉ោយប៉ែត
- 2017-04-24 02:34:14
- ចំនួនមតិ 0 | ចំនួនចែករំលែក 0
ថៃ អ៊ូរ បង្កើតកម្មវិធីប្រកួតយ៉ាងតិច១ដងក្នុងមួយខែនៅប៉ោយប៉ែត
ចន្លោះមិនឃើញ
ប្រធានសមាគមប្រដាល់គុនខ្មែរនៅក្រុងប៉ោយប៉ែតខេត្តបន្ទាយមានជ័យ លោក ថៃ អ៊ូរ លើកឡើងថា ដើម្បីជំរុញឲ្យប្រដាល់ខ្មែរកាន់តែសំបូរកីឡាករល្អៗនៅប៉ុន្មានឆ្នាំខាងមុខទៀត លោកជួយបណ្ដុះបណ្ដាលយុវជនក្មេងៗជាច្រើននិងបង្កើតកម្មវិធីប្រកួតផ្សេងៗសម្រាប់យុវជន។
លោក ថៃ អ៊ូរ ដែលជាអ្នកស្រឡាញ់ប្រដាល់ម្នាក់បានឲ្យដឹងថា ដោយចង់ឲ្យប្រដាល់គុនខ្មែរមានការរីកចម្រើនដូចប្រទេសជិតខាង ហើយសំបូរកីឡាករល្អៗនាពេលអនាគត លោកព្យាយាមបង្កើតកម្មវិធីសម្រាប់យុវជនប្រកួតក្នុងមួយខែបាន១ដងយ៉ាងតិច។
ដោយកម្មវិធីប្រកួតនេះដែរ ចំណាយត្រឹមតែ១លាន ទៅ ១លាន ៥០ម៉ឺនរៀលប៉ុណ្ណោះ ហើយសម្រាប់អ្នកឈ្នះបាន ៦ម៉ឺន ខណៈអ្នកចាញ់បាន៤ម៉ឺនរៀល និងបន្ថែមលុយថ្លៃសាំងម៉ូតូបន្តិចបន្តួចដល់គ្រូដែលនាំសិស្សមកប្រកួត។ ថវិកាសម្រាប់ទ្រទ្រង់កម្មវិធីនេះបានមកពីមិត្តភ័ក្ដិនិងថវិការផ្ទាល់ខ្លួនរបស់លោក។ ការប្រកួតនេះដែរមិនផ្ដោតលើប្រាក់រង្វាន់នោះទេ ព្រោះបង្កើតឡើងដើម្បីឲ្យពួកយុវជនទាំងនោះមានឱកាសបានឡើងប្រកួត ស្វែងរកបទពិសោធនិងពង្រឹងសមត្ថភាព។
ប្រធានសមាគមប្រដាល់ក្រុងប៉ោយប៉ែតរូបនេះបន្តទៀតថា បច្ចុប្បន្ននៅខេត្តបន្ទាយមានជ័យមានក្លឹបប្រដាល់ចំនួន៧ ហើយមានយុវជនថ្នាលប្រហែល ៣០ទៅ ៤០នាក់។ យុវជនទាំងនោះអាយុចន្លោះពី១០ឆ្នាំដល់១៣ឆ្នាំ ពួកគេប្រកួតក្នុងទម្ងន់ចាប់ពី ២០គីឡូក្រាម ដល់ ៤០គីឡូក្រាម៕