យុវជនឆ្នើម យាង សិដ្ឋសមប្រាថ្នា ប្រាប់ពីគន្លឹះរៀនឱ្យជោគជ័យ ទោះមិនមែនសិស្សពូកែ
- 2017-04-21 05:01:34
- ចំនួនមតិ 0 | ចំនួនចែករំលែក 0
យុវជនឆ្នើម យាង សិដ្ឋសមប្រាថ្នា ប្រាប់ពីគន្លឹះរៀនឱ្យជោគជ័យ ទោះមិនមែនសិស្សពូកែ
ចន្លោះមិនឃើញ
យុវជនឆ្នើម យាង សិដ្ឋសមប្រាថ្នា អតីតនិស្សិតនៅសាកលវិទ្យាល័យកម្ពុជា បានបញ្ចប់ការសិក្សាផ្នែកអក្សរសាស្ត្រអង់គ្លេស ជាយុវជនម្នាក់តែងតែចូលរួមក្នុងការងារសង្គមយ៉ាងសកម្មបំផុត តាមរយៈអង្គការក្រៅរដ្ឋាភិបាលនានា និងនិស្សិតឆ្នើមម្នាក់ប្រចាំសាកលវិទ្យាល័យទៀតផង។ យុវជនរូបនេះលើកឡើងថា ជាសិស្សឆ្នើម ឬ និស្សិតជោគជ័យក្នុងការសិក្សាមិនមែនសម្រាប់តែសិស្សពូកែនោះទេ។ ដូច្នេះតើមានគន្លឹះអ្វីខ្លះ ដើម្បីជោគជ័យក្នុងការសិក្សា ទោះមិនមែនជាសិស្សឆ្នើម?
១. កុំប្រៀបធៀបខ្លួនឯងជាមួយអ្នកដទៃ
បុគ្គលិកក្នុងសារមន្ទីរឧក្រិដ្ឋកម្មទួលស្លែង ផ្នែកទំនាក់ទំនងអន្តរជាតិរូបនេះប្រាប់ថា ចំណុចសំខាន់បំផុត គឺមិនត្រូវប្រៀបធៀបខ្លួនឯងជាមួយអ្នកដទៃដាច់ខាត។ ប្រាថ្នា និយាយថា ការប្រៀបធៀបខ្លួនឯងជាមួយអ្នកដទៃ គឺធ្វើឱ្យខ្លួនឯងបាក់ទឹកចិត្តទៅវិញទេ ត្រូវចាំថា មនុស្សម្នាក់ៗ មានចំណុចពិសេស និងសក្ដានុពលរៀងៗខ្លួន។ ដូច្នេះត្រូវរកឱ្យឃើញ នូវអ្វីដែលជាភាពខ្លាំងរបស់ខ្លួន ហើយត្រូវយកវាមកប្រើប្រាស់ឱ្យអស់ ហើយនៅថ្ងៃណាមួយប្រាកដជាជោគជ័យមិនខាន។
២. គោរពវិន័យខ្លួនឯង និងវិន័យសាលា
នៅត្រង់ចំណុចនេះមានន័យថា ដើម្បីជោគជ័យក្នុងការសិក្សា ទោះមិនមែនជាសិស្សពូកែក៏ដោយ គឺត្រូវគោរពវិន័យខ្លួនឯង ធ្វើខ្លួនឱ្យមានរបៀបរៀបរយនៅក្នុងសាលា ត្រូវទៅសិក្សាឱ្យទៀងទាត់ ថ្ងៃប្រឡងទៅតែទៅប្រឡងឱ្យគ្រប់មុខវិជ្ជា។ ចំពោះវិន័យសាលា នៅពេលដែលលោកគ្រូ អ្នកគ្រូ ដាក់កិច្ចការអ្វីមួយឱ្យ ធ្វើត្រូវតែធ្វើ។ មូលហេតុចម្បងដែលធ្វើបរាជ័យក្នុងការសិក្សា អាចបណ្ដាលមកពីចំណុចនេះ ពេលដែលគ្រូដាក់កិច្ចការអ្វីមួយឱ្យធ្វើបែរជាទុកចោល។
៣. ការចូលរួមធ្វើការជាក្រុម
យាង សិដ្ឋសមប្រាថ្នា ជាប្រធានក្លឹបយុវជនមួយកន្លែងផងនោះ ប្រាប់ថា ដើម្បីក្លាយជាសិស្សម្នាក់គួរតែចូលរួមការងារជាក្រុមឱ្យបានច្រើន។ ការចូលរួមការងារជាក្រុម ពិតជាសំខាន់ណាស់ ព្រោះអាចទទួលបានគំនិតល្អៗ ពីមិត្តរួមក្រុម បង្កើនភាពក្លាហាន ការបញ្ចេញយោបល់ល្អ ការចែករំលែកចំណេះដឹងឱ្យគ្នាទៅវិញទៅមក។ ដូច្នេះបើដឹងខ្លួនឯងថា ជាសិស្សមិនពូកែគួរសង្វាតការងារទាំងនេះឱ្យច្រើនបន្តិច កុំបណ្ដែតបណ្ដោយទៅតាមពេលវេលា។
៤. ការចូលរួមការងារក្នុងសង្គម
មកដល់ចំណុចនេះ ប្រាថ្នា លើកឡើងថា ការងារសង្គមពិតជាមានតម្លៃ និងសារសំខាន់បំផុតចំពោះនិស្សិតដែលកំពុងសិក្សា។ ការងារសង្គមជួយឱ្យនិស្សិតបង្កើនសមត្ថភាព ការចាប់ឱកាស ការអភិវឌ្ឍខ្លួន និងជាពិសេសការងារសង្គមទាំងនោះហើយ គឺអាចយកមកអនុវត្តនៅក្នុងការសិក្សា អាចឱ្យនិស្សិតដឹងថា ខ្លួនឯងកំពុងធ្វើអ្វី ដើរដល់ផ្លូវណា ហើយក៏ជាផ្លូវមួយអាចឱ្យយើងសម្លឹងឃើញពីអនាគតរបស់ខ្លួនឯងផងដែរ។
៥. លើកទឹកចិត្តខ្លួនឯង
នេះជាចំណុចចុងក្រោយបំផុតក្នុងការឈានទៅរកភាពជោគជ័យក្នុងការសិក្សា គ្មានអ្នកណាអាចបណ្ដុះទឹកចិត្តឱ្យប្រឹងប្រែងតស៊ូ ក្រៅពីខ្លួនឯងនោះទេ។ ដូច្នេះហើយត្រូវលើកទឹកចិត្តឱ្យខ្លួនឯង កុំគិតថា មិនអាចធ្វើបាន លើលោកនេះអ្វីក៏មនុស្សអាចធ្វើបានដែរឱ្យតែមានការតាំងចិត្ត ព្យាយាមមិនបោះបង់ ថ្ងៃណាមួយអ្នកនឹងទទួលបានជោគជ័យ។ ប្រាថ្នា បន្ថែម៕