ជក់ចិត្ត! Chelsea ទម្លាក់ Spurs ឡើងវគ្គផ្ដាច់ព្រ័ត្រ FA Cup

2017-04-23 01:49:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ Chelsea បានយកឈ្នះទៅលើក្រុម Totttenham Hotspur ៤-២កាលពីយប់មិញនេះក្នុងជំនួបវគ្គពាក់កណ្ដាលផ្ដាច់ព្រ័ត្រពានរង្វាន់ FA Cup នៅកីឡដ្ឋាន Wembley Stadium ក្រោមការទស្សនាផ្ទាល់ចំនួន ៨៦៣៥៥ នាក់។

ការប្រកួតក្រុមទាំងពីរចាប់ផ្ដើមបានត្រឹម ៥នាទី Chelsea មានឱកាសរកបានមួយគ្រាប់មុនដោយការទាត់បាល់ពិន័យយ៉ាងស្អាតពីកីឡាករសញ្ជាតិប្រេស៊ីល Willian។ ប៉ុន្តែចូលដល់នាទីទី១៨ ខ្សែប្រយុទ្ធជម្រើសជាតិអង់គ្លេស Harry Kane បានតែតយ៉ាងស្អាតតាមបានស្មើ១-១។

ជិតនឹងបញ្ចប់វគ្គទី១ទៅហើយ ពោលគឺនាទីទី៤៣ Chelsea រកបានមួយគ្រាប់ទៀតដោយការទាត់បាល់ពិន័យ១១ម៉ែត្ររបស់កីឡាករប្រេស៊ីលខាងលើដដែល ដោយសារខ្សែបម្រើជម្រើសជាតិកូរ៉េខាងត្បូង Heung-Min Son បង្កកំហុសក្នុងប្រអប់គ្រោះថ្នាក់។ ចូលដល់វគ្គទី២ ខ្សែបម្រើឆ្នើម Bamidele Alli បានរកគ្រាប់បាល់តាមស្មើឲ្យ Spurs ជាលើកទី២នៅនាទីទី៥២។

ការប្រកួតឈានចូលនាទីទី៧៥ ខ្សែបម្រើឆ្នើមជម្រើសជាតិបែលហ្សិករបស់តោខៀវ Eden Hazard រកបានគ្រាប់បាល់នាំមុខជាថ្មី ៣-២ និងគ្រាប់បាល់ចុងក្រោយរបស់ Chelsea រកបានដោយកីឡាករ Nemanja Matić នៅនាទី៨០។ បញ្ចប់ការប្រកួត Chelsea យកឈ្នះ Totttenham Hotspur ៤-២ ឡើងវគ្គផ្ដាច់ព្រ័ត្រ ហើយរង់ចាំក្រុមខ្លាំង១ក្នុងចំណោម Arsenal និង Man City ដែលត្រូវប្រកួតគ្នាម៉ោង៩:០០នាទីយប់នេះនៅកីឡដ្ឋាន Wembley Stadium របស់អង់គ្លេសនេះដដែល៕