គ្រូអាស៊ីអឺរ៉ុប មិនពេញចិត្តចំពោះដំណឹងរបស់ FFC មួយ ទោះឈ្នះប៉ូលិសយប់មិញ
- 2017-04-23 03:16:05
- ចំនួនមតិ 0 | ចំនួនចែករំលែក 0
គ្រូអាស៊ីអឺរ៉ុប មិនពេញចិត្តចំពោះដំណឹងរបស់ FFC មួយ ទោះឈ្នះប៉ូលិសយប់មិញ
ចន្លោះមិនឃើញ
លោក សុខ វាសនា គ្រូបង្វឹកក្រុមអាស៊ីអឺរ៉ុប បានសំដែងការមិនពេញចិត្តចំពោះដំណឹងយឺតពេលរបស់សហព័ន្ធបាល់ទាត់កម្ពុជា (FFC) ដោយកូនក្រុមរបស់លោកចំនួនពីររូបមិនអាចលេងបានក្នុងជំនួបតទល់ជាមួយក្លឹបប៉ូលិស ដោយសារជាប់កាតលឿងពីរដង។
អតីតគ្រូថ្នាលយុវជនរបស់ក្លឹបព្រះខ័នរាជស្វាយរៀងរូបនេះមិនបានពេញចិត្តឡើយ ទោះក្រុមរបស់ខ្លួនយកឈ្នះប៉ូលិស ២-១ ក្នុងជំនួបសប្ដាហ៍ទី៨ នៃក្របខណ្ឌលីគកំពូលកម្ពុជាកាលពីយប់មិញនេះនៅកីឡដ្ឋានស្តាតចាស់។ ក្រោយប្រកួតចប់ភ្លាមគ្រូបង្វឹករូបនេះបានឲ្យដឹងថា សហព័ន្ធផ្ដល់ដំណឹងមកកាន់ក្លឹបកាលពីព្រឹកម្សិលមិញពោលគឺមុនការប្រកួតចាប់ផ្ដើមប្រហែលជាង១០ម៉ោងប៉ុណ្ណោះ ដែលការផ្ដល់ដំណឹងយឺតបែបនេះធ្វើឲ្យលោកមានការលំបាករកកីឡាករផ្សេងមកជំនួស។
កីឡាករ ជុំ សំបូរ និង យ៉ម វណ្ណា របស់អាស៊ីអឺរ៉ុបមិនបានចូលលេងទេក្នុងពេលជំនួបប្រកួតយប់មិញ ដោយសារកាតលឿងចំនួនពីរដង។ លោកបញ្ជាក់ថា ដំណឹងគួរតែផ្ដល់ឲ្យបានមុនការប្រកួត ៣ ឬ ៤ ថ្ងៃ ដើម្បីឲ្យក្លឹបរបស់លោកបានត្រៀមកីឡាករផ្សេងជំនួសបានល្អ។
ក្រោយឈ្នះប៉ូលិសយប់មិញក្រុមបាល់ទាត់ អាស៊ីអឺរ៉ុប មាន ៦ ពិន្ទុ សម្រាប់ ៨ ប្រកួត ស្ថិតនៅលេខ ១០ ក្នុងតារាងលីគកំពូលកម្ពុជា។ សប្តាហ៍ក្រោយ អាស៊ីអឺរ៉ុបនឹងត្រូវជួបគីរីវង់សុខសែនជ័យសម្រាប់ជំនួបសប្ដាហ៍ទី ៩ នាម៉ោង ៣:០០នាទី ដែលនឹងធ្វើឡើងនៅទីលានក្លិបគិរីវង់នៅទីរួមខេត្តតាកែវ ៕