ទៅឥណ្ឌា ២ ខែ ស្ត្រីធាត់បំផុតលើលោក សម្រកទម្ងន់បានពាក់កណ្ដាល

2017-04-23 04:32:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីធាត់ជាងគេបំផុតក្នុងលោក សម្រកទម្ងន់បានជាងពាក់កណ្ដាលហើយ ក្រោយពីធ្វើដំណើរនៅកាន់ប្រទេសឥណ្ឌាបានរយៈពេល ២ ខែ។

អ្នកស្រី Eman Ahmed Abd El Aty ជាជនជាតិអេហ្ស៊ីបមានទម្ងន់ ៤៩៩ គីឡូក្រាម ពេលមកព្យាបាលនៅប្រទេសឥណ្ឌាលើកដំបូងក្នុងខែកុម្ភៈ។ ទោះជាបែបនេះក្ដី គាត់បានសម្រកអស់ ២៥៤ គីឡូក្រាម បន្ទាប់ពីគ្រូពេទ្យឥណ្ឌាបានវះកាត់សម្រកទម្ងន់នៅខែមិនា។

ស្ត្រីវ័យ ៣៧ ឆ្នាំ ខាងលើបានជិះយន្តហោះដឹកទំនិញពីប្រទេសអេហ្ស៊ីប ទៅកាន់ប្រទេសឥណ្ឌា ដោយទទួលបានជំនួយពីសប្បុរសជនក្នុង និងក្រៅប្រទេសជាច្រើននាក់ ដើម្បីស្វែងរកការព្យាបាលសម្រកទម្ងន់ ព្រោះគាត់មិនអាចដើរចេញពីផ្ទះជាង ២ទសវត្សមកហើយ។

បើតាមប្រភពពីក្រុមវេជ្ជបណ្ឌិតទីក្រុងម៉ុមបៃ ការសម្រកទម្ងន់នេះ គឺគេបានវះកាត់បង្រួញទំហំក្រពះដោយកាត់ផ្នែកក្រពះខ្លះចោល។ តាមរយៈវីដេអូថ្មីចុងក្រោយផ្ដល់ដោយមន្ទីរពេទ្យ Saifee Hospital អ្នកជំងឺ Abd El Aty ត្រូវគេឃើញអង្គុយសើចពេលកំពុងស្ដាប់តន្ត្រី។

វេជ្ជបណ្ឌិតម្នាក់និយាយថា "អ្នកស្រីមានទឹកមុខរីករាយជាងមុន និងស្គមជាងមុន។ ពេលនេះគាត់អាចអង្គុយត្រូវនឹងកៅអីរុញបាន និងអង្គុយបានយូរថែមទៀត។ មុនពេលវះកាត់ គ្រូពេទ្យបានឲ្យសារធាតុរាវពិសេសម្យ៉ាងបរិភោគ ដើម្បីឲ្យការវះកាត់មានប្រសិទ្ធភាព។

ក្រុមគ្រួសាររបស់អ្នកស្រីបញ្ជាក់ថា អ្នកស្រីមានជំងឺធាត់ដូចដំរី Elephantiasis បណ្ដាលឲ្យអវយវៈត្រូវហើមទាំងអស់ស្ទើរតែមិនអាចធ្វើចលនារួច។ គាត់បានកើតជំងឺជាច្រើនជាប់ខ្លួនដូចជា មិនអាចនិយាយច្បាស់ ទឹកនោមផ្អែម លើសឈាម និងគេងមិនសូវលក់ជាដើម ដោយសារធាត់ពេក។ ក្រុមគ្រូពេទ្យសង្ឃឹមថា អ្នកស្រីនឹងបន្តស្រកទម្ងន់បន្ថែមទៀតនាពេលខាងមុខ៕