បងក្រមិនសមគិតពីអនាគតអូន បងសុំទោស

2017-04-24 04:21:47
ចំនួនមតិ 0 | ចំនួនចែករំលែក 0

ចន្លោះមិនឃើញ

អូនតែងជាកូនក្មេងក្នុងកែវភ្នែកបង អូននៅតែជាមនុស្សដែលបងបារម្ភ ទោះអូនតែងប្រាប់បងថា អូនធំហើយតែអូននៅតែជាកូនក្មេងសម្រាប់បងជារៀងរហូត។ បងសុំទោសដែលបងគ្មានឱកាសកាន់ដៃកូនក្មេងម្នាក់នេះតទៅទៀត បងសុំទោសដែលបងសន្យាតែបងធ្វើមិនបាន តែដើម្បីអនាគតអូន ដើម្បីគ្រួសារអូនបងអាចលះបង់បាន។

រូបតំណាង

ជាស្នេហាដំបូងរបស់ខ្ញុំ ហើយក៏ជាមេរៀនឈឺចាប់បំផុតក្នុងជីវិតដូចគ្នា។ ខ្ញុំបានស្រឡាញ់គ្នាជាមួយក្មេងស្រីម្នាក់រយៈពេលជាច្រើនឆ្នាំ តែចុងក្រោយខ្ញុំបានចាកចេញពីនាង ទាំងនាងកំពុងស្រឡាញ់ខ្ញុំខ្លាំង ហេតុផលព្រោះខ្ញុំដឹងថាគ្មានផ្លូវអាចបន្តទៀត។ ខ្ញុំគ្មានអ្វីទាំងអស់ មានតែចំណេះវិជ្ជា តែខ្ញុំគ្មានទ្រព្យសម្បត្តិ មិនអាចបំពេញចិត្តគ្រួសារនាងបានទេ។ ប៉ាម៉ាក់នាងបាននិយាយថា ប្រសិនបើខ្ញុំស្រឡាញ់នាងពិតប្រាកដមែន កុំធ្វើបាបនាង ដើរចេញពីនាងទៅ ខ្ញុំមិនអាចចិញ្ចឹមកូនគាត់ឱ្យរស់នៅសុខស្រួលបានទេ។ បែបនេះតើខ្ញុំគួរបន្តទៀតទេ បើគាត់មិនផ្ដល់ឱកាសឱ្យខ្ញុំផងនោះ។

អូនបន្ទោសបង ថាបងគ្មានការតស៊ូ ថាបងឆាប់ចុះចាញ់ តែគ្រប់ពេលដែលបងនៅក្បែរអូន បងគិតថាបងជាមនុស្សអាត្មានិយមបំផុតដែលស្រឡាញ់អូន ទាំងខ្លួនឯងគ្មានអ្វីសោះ។ បងស្រឡាញ់អូន បងមិនចង់បាត់បង់អូនទេ តែអូនមើលសភាពបងរាល់ថ្ងៃមើល តើបងអាចផ្ដល់សេចក្ដីសុខឱ្យអូនបានទេ? បងមានតែដើរចេញ ទាំងទឹកភ្នែក បងគ្មានលទ្ធភាពស្រឡាញ់អូនទេឱ្យបងសុំទោសណា យ៉ា។

បងក្របងមិនសមគិតពីអនាគតអូនទេ តែអូនត្រូវចាំទោះបងទៅដល់ទីណា នៅកន្លែងណា អូនគឺជានារីក្នុងបេះដូងបងអស់មួយជីវិត។ បងគ្រាន់តែចង់ឃើញអូនញញឹមទោះជាគ្មានបង បងចង់ឃើញអូនរីករាយនឹងជីវិតថ្មីជាមួយបុរសម្នាក់នោះ តែប៉ុណ្ណឹងបងអាចចាកចេញពីអូនទាំងស្ងប់ចិត្តហើយ បងនិងអូនប្រៀបដូចព្រះច័ន្ទ និងកង្កែបគ្មានថ្ងៃបានជួបគ្នាទេ។ បងឈឺចាប់បងអាចទ្រាំបាន តែបងមិនអាចឃើញអូនបែកបាក់គ្រួសារ ដោយសារបងបានទេ។ អូនស្អប់បងទៅ បងជឿថា មិនយូរទេ អូននឹងអាចភ្លេចបងហើយ។

អូនកុំចូលចិត្តញ៉ាំហិលពេក ព្រោះអូនឈឺក្រពះហើយ ហើយខែនេះក្ដៅណាស់អូនកុំស្លៀកខ្លីៗពេកណា ថ្នាំដាក់ភ្នែកអូនត្រូវបន្តក់ឱ្យទៀងទាត់ ហើយកុំខ្ជិលច្រអូសរឿងរៀនដូចពីមុនទៀតណាក្មេងតូច។ បងលាអូនហើយ ក្មេងតូចរបស់បង៕

មានរឿងរ៉ាវចង់ចែករំលែក សូមផ្ញើទៅកាន់ e-mail: thor.chanreth@sabay.com ឬទូរសព្ទទៅកាន់លេខ 015 828 595

ចុចអានអត្ថបទ Sabay-news ទាំងអស់ ដើម្បីដឹងពីរបៀបនៃការសរសេរផ្សេងៗគ្នា

អត្ថបទ៖ បុរសម្នាក់ដែលគិតដល់អូន