ដឹង ឧកញ៉ា ម៉ុង ឫទ្ធី រៀនដល់ថ្នាក់ណាអត់?

2017-04-24 08:40:21
ចំនួនមតិ 0 | ចំនួនចែករំលែក 0

ចន្លោះមិនឃើញ

"ខ្ញុំរៀនក្រោមបាក់ឌុបទេ បើយាយទៅអត់ដល់បាក់ឌុបទេ អត់បានប្រឡងបាក់ឌុបទេ គឺខ្ញុំបួស។ ហើយសួរថា ម៉េច បានចេះចឹង នេះមកពីបទពិសោធន៍ទាំងអស់"។ នេះជាសម្ដីពិតរបស់ឧកញ៉ា ម៉ុង ឬទ្ធី ម្ចាស់ជំនួញផ្នែកកសិឧស្សាហកម្មដ៏ល្បីឈ្មោះនៅកម្ពុជា ធ្លាប់ផ្ដល់បទសម្ភាសដោយផ្ទាល់ មកកាន់ Sabay នាពេលកន្លងទៅ។

លោកឧកញ៉ា ម៉ុង ឬទ្ធី បន្តទៀតថា អ្វីដែលលោកទទួលបានមកដល់បច្ចុប្បន្ននេះ គឺតាមរយៈបទពិសោធន៍ផ្ទាល់ ព្រោះសាលាកសិកម្មក៏លោកមិនបានរៀនដែរ ដោយសារមិនប្រឡងបាក់ឌុបគេមិនឱ្យចូលរៀនទេ។ ម្យ៉ាងវិញទៀត បើគេឱ្យចូលរៀនក៏គ្មានលុយរៀនដែរ ព្រោះជីវភាពមានការខ្វះខាតខ្លាំង។

លោកឧកញ៉ា ចិត្តសប្បុរស ម៉ុង ឬទ្ធី បន្ថែមទៀតថា ថ្ងៃឈប់សម្រាកគេដើរលេងកម្សាន្ត ច្រៀងខារ៉ាអូខេ ប៉ុន្តែចំពោះរូបលោកវិញថ្ងៃឈប់សម្រាកគឺត្រូវមកចម្ការ ដើម្បីមើលផលដំណាំ និងរិះរកគំនិតអ្វីថ្មីបន្ថែមទៀត។ លោកឧកញ៉ា លើកឡើងថា ជីវិតមនុស្សម្នាក់ៗគឺតែងខុសគ្នាដូច្នេះហើយ ក្នុងមួយខែលោកត្រូវមកចម្ការបួនដង ដើម្បីពិសោធន៍វិធីផ្សាំដំណាំផ្សេងៗ ថាតើគួរធ្វើបែបណាទើបអាចបង្កើនចំនួនទិន្នផលកាន់តែច្រើន។ ឧទាហរណ៍ថា ពីមុនជ្រូកចិញ្ចឹម ១ឆ្នាំទើបបាន ១០០ គីឡូ ហើយត្រូវរកវិធីសាស្ត្រយ៉ាងម៉េច ឱ្យចិញ្ចឹម ៥ខែ បាន ១០០គីឡូ។

បន្ថែមលើពីនេះទៀត លោក ឧកញ៉ា ម៉ុង ឬទ្ធី ប្រាប់ថានឹងបង្រៀនដល់បងប្អូនប្រជាកសិករទាំងអស់ ដើម្បីមានចំណេះដឹងផ្នែកកសិកម្មនេះ យកទៅប្រើប្រាស់ក្នុងជីវភាពរស់នៅ ធ្វើយ៉ាងណាឱ្យការធ្វើកសិកម្មកាន់តែល្អប្រសើរឡើង។ លោកនិយាយថា គ្មានអ្វីល្អក្រៅពីការរៀនសូត្រឱ្យច្បាស់មុនចាប់ផ្ដើមនោះទេ ហើយអ្វីដែលលោកចង់ឃើញគឺ ប្រជាពលរដ្ឋមានជីវភាពល្អប្រសើរឡើង ចាកផុតពីភាពក្រីក្រ៕

អត្ថបទ៖ វឌ្ឍនៈ