ស្ងាត់ៗ Neymar បង្ហាញរូបភាពជប់ខ្យល់...តើមានរឿងអ្វីទៅ?

2017-04-26 14:03:58
ចំនួនមតិ 0 | ចំនួនចែករំលែក 0

ចន្លោះមិនឃើញ

Neymar ខ្សែបម្រើប្រយុទ្ធឆ្នើមក្រុមអ្នកមានបុណ្យ FC Barcelona បានបង្ហាញរូបភាពជប់ខ្យល់លើបណ្តាញសង្គម Instagram កាលល្ងាចមិញ ធ្វើឲ្យអ្នកគាំទ្រជាច្រើនងឿងឆ្ងល់ និងព្រួយបារម្ភ។

តាមពិតការជប់ខ្យល់ដោយប្រើកែវ ជាវិធីសាស្ត្របូរាណមួយ ហើយ Neymar ប្រើវិធីនេះ គឺដើម្បីសម្រួលសាច់ដុំ ឬសម្រួលសរសៃក្នុងខ្លួនប្រាណរបស់គេ ឲ្យមានដំណើរការកាន់តែល្អ និងមានថាមពល រួមទាំងអារម្មណ៍ស្រស់ស្រាយឡើងវិញ មុនវិលត្រឡប់ចូលកាន់ទីលានប្រកួត នៅចុងសប្តាហ៍នេះវិញ។ ដូច្នេះកីឡាករជម្រើសជាតិប្រេស៊ីលរូបនេះ ពុំមានបញ្ហាអ្វីនោះទេ។

កីឡាករវ័យ២៥ឆ្នាំ បានជាប់បម្រាម៣ប្រកួត ដោយសារទទួលបានកាតក្រហម កាលក្រុម Barcelona ចាញ់ Malaga ២-០ ហើយរូបគេបានប្រើកាយវិការទះដៃដាក់អាជ្ញាកណ្តាល។ រហូតដល់ពេលនេះ Neymar អវត្តមាន២ប្រកួតរួចហើយ ពោលគឺអវត្តមានពេល Barca ឈ្នះ Real Sociedad ៣-២ និងអវត្តមានកាលឈ្នះ Real Madrid ៣-២ ចុងសប្តាហ៍កន្លងទៅទៀត។ សម្រាប់យប់នេះ Neymar នឹងបន្តអវត្តមាន១ប្រកួតទៀត ពេល Barca ប៉ះ Osasuna ប៉ុន្តែរូបគេនឹងត្រឡប់លេងបានវិញ ពេលជួប Espanyol នៅចុងសប្តាហ៍នេះ៕

ប្រភព៖ Dailymail ប្រែសម្រួល៖ វិន ជីវ័ន្ត